បើតាមរបាយការណ៍ដដែល វិស័យកសិកម្ម គឺជាស្នូលសេដ្ឋកិច្ចខេត្តកណ្តាល ដោយមានពលរដ្ឋចំនួន ៥០.៥ភាគរយ ប្រកបរបរនេះ ខណៈអ្នកប្រកបរបរក្នុងវិស័យសេវាកម្មមាន៤៨.៣ភាគរយ និងវិស័យសិប្បកម្ម ១.២ភាគរយ។ សម្រាប់លោក ម៉ៅ ភារុណ វិស័យសំខាន់ៗនេះ បានជំរុញកំណើនសេដ្ឋកិច្ចខេត្តកណ្ដាល និងបានជួយកាត់បន្ថយអត្រាភាពក្រីក្ររបស់ពលរដ្ឋផងដែរ។ «នៅឆ្នាំ២០១៩ អត្រាភាពក្រីក្របានថយចុះត្រឹម ៤.៥៧ភាគរយ និងមានកំណើនសេដ្ឋកិច្ចកម្រិតខ្ពស់៦ភាគរយ ដែលមានវិស័យអាទិភាពបីរួមមាន វិស័យកសិកម្ម ៣៧.១ភាគរយ វិស័យឧស្សាហកម្ម ៣៦.៣ភាគរយ និងវិស័យសេវាកម្ម ២៦.៧ភាគរយ»។ នេះជាការរៀបរាប់របស់លោក ម៉ៅ ភារុណ។ 

 

ទាក់ទងនឹងការដាំដុះបន្លែនេះដែរ កន្លងមកលោក ហ៊ សុផល អនុប្រធានមន្ទីរកសិកម្មខេត្តកណ្ដាលធ្លាប់ប្រាប់សារព័ត៌មានThmeyThmey25ថា កសិករខេត្តកណ្ដាល ដាំបន្លែចម្រុះគ្រប់ប្រភេទ ពិសេសប្រភេទបន្លែស្លឹក ដូចជាសាលាដ ស្ពៃ និងខាត់ណាជាដើម។ ក្នុងមួយថ្ងៃៗ ខេត្តកណ្ដាល អាចផ្គត់ផ្គង់បន្លែប្រមាណ ៤០០តោន មកកាន់ទីផ្សារក្នុងរាជធានីភ្នំពេញ។

 

សូមជម្រាបថា ខេត្តកណ្ដាល មានផ្ទៃដីកសិកម្មជាង១៤ម៉ឺនហិកតា ក្នុងនោះផ្ទៃដីដាំស្រូវមានជាង ១០ម៉ឺនហិកតា ផ្ទៃដីដាំដំណាំឧស្សាហកម្ម និងដំណាំរួមផ្សំ មានជាង ៣ម៉ឺនហិកតា និងផ្ទៃដីដំណាំអនុផលជិត ៦ពាន់ហិកតា៕