ពីនេះ ពីនោះ
ព័ត៍មានសុខភាព
សុខភាព
×![]()
ដោយ: សារព័ត៌មានថ្មីៗ
បញ្ហាពិបាកក្នុងការរំលាយអាហារអាចកើតឡើងនោះពេលអ្នកទទួលទានច្រើនពេក ឬអ្វីដែលក្រពះទទួលយកមិនបាន។ បញ្ហាពិបាករំលាយអាហារអាចធ្វើឱ្យអ្នកជួបប្រទះនឹងអាការៈឈឺពោះ ភើរ ឬហើមពោះគួរឱ្យរំខាន។ គួរធ្វើយ៉ាងណាទប់ទល់នឹងបញ្ហានេះមែនទេ? កុំបារម្ភ! ថ្ងៃនេះវេបសាយសុខភាព Health.com.kh នឹងបង្ហាញឱ្យដឹងពីរូបមន្តបែបធម្មជាតិងាយៗ ប៉ុន្តែមានប្រសិទ្ធិភាពខ្ពស់ដោះស្រាយបញ្ហាពិបាករំលាយអាហារ ៖
១. ខ្ញី
អ្វីដែលអ្នកត្រូវការ គឺខ្ញីហាន់រួចជាចំណិតតូចៗចំនួន ១ ស្លាបព្រាបាយ ទឹកក្រូចឆ្មារស្រស់ ២ ស្លាបព្រាបាយ ទឹកឃ្មុំ ១ ស្លាបព្រាបាយ និងស្លឹកជីអង្កាមចិញ្ច្រាំ ១ ស្លាបព្រាកាហ្វេ។ អ្វីដែលអ្នកត្រូវធ្វើ គឺដំបូងត្រូវដាក់ទឹក ២ ពែងនិងខ្ញីចូលក្នុងឆ្នាំងមួយ បន្ទាប់មកដាក់ដាំឱ្យពុះ។ ចាប់ផ្ដើមបន្ថយកម្ដៅឱ្យទាបសម្រាប់រយៈពេលពី ១០ ទៅ ២០ នាទី។ ស្រងយកកាកខ្ញីចេញ រួចបន្ថែមទឹកក្រូចឆ្មារនិងទឹកឃ្មុំចូល ហើយកូរឱ្យសព្វ។ បន្ថែមស្លឹកជីអង្កាមខ្លះចូល សឹមទទួលទានឱ្យទាន់ក្ដៅឧណ្ហៗ។
២. ទឹកខ្មេះផ្លែប៉ោម
អ្វីដែលអ្នកត្រូវធ្វើដើម្បីបំបាត់អាការៈពិបាករំលាយអាហារ គឺគ្រាន់តែលាយទឹកខ្មេះផ្លែប៉ោម ១ ស្លាបព្រាកាហ្វេជាមួយទឹកកន្លះពែង។ កូរឱ្យសព្វ សឹមទទួលទាន។
៣. ម្សៅ Baking soda
លាយម្សៅ Baking soda កន្លះស្លាបព្រាកាហ្វេជាមួយទឹកកន្លះពែង។ កូរឱ្យសព្វ សឹមទទួលទាន។ វិធីនេះក៏ជួយបំបាត់អាការៈហើមពោះកំឡុងពេលពិបាករំលាយអាហារផងដែរ។
៤. ទឹកក្រូចឆ្មារ
អ្វីដែលអ្នកត្រូវធ្វើ គឺគ្រាន់តែទទួលទានទឹកក្រូចឆ្មារក្ដៅឧណ្ហៗ ១ កែវពេលព្រឹក និងជាពិសេសនៅមុនពេលអាហារ។ វាបង្កើនការរំលាយអាហារដោយរញោចការផលិតទឹកប្រមាត់។ ទឹកក្រូចឆ្មារក្ដៅឧណ្ហៗក៏ជួយបំបាត់អាការៈផ្សេងទៀតនៃបញ្ហាពិបាករំលាយអាហារផងដែរ។
៥. តែផ្កា Chamomile
ការទទួលទានតែផ្កា Chamomile ជួយបំបាត់អាការៈពិបាករំលាយអាហារបានយ៉ាងប្រសើរ។ ដូច្នេះចូរព្យាយាមទទួលទានតែផ្កា Chamomile ឱ្យបាន ២ ទៅ ៣ ពែងរាល់ថ្ងៃដើម្បីបង្កើនសុខភាពប្រព័ន្ធរំលាយអាហារ។ អ្នកអាចរកទិញតែផ្កា Chamomile បាននៅតាមផ្សារទំនើប។
៦. តែជីអង្កាម
ល្អណាស់ម្រាប់ដោះស្រាយបញ្ហាចង្អោរចង់ក្អួតនិងពិបាករំលាយអាហារ។ អ្វីដែលអ្នកត្រូវធ្វើ គឺគ្រាន់ទទួលទានតែជីអង្កាម ១ពែង ភ្លាមៗក្រោយពេលអាហារ។ ទោះជាយ៉ាងណាប្រសិនបើអាការៈពិបាករំលាយអាហារបង្កឡើងដោយអាការៈច្រាលទឹកអាស៊ីតក្រពះ អ្នកមិនគួរទទួលទានតែជីអង្កាមឡើយ។ ភេសជ្ជៈនេះមិនសាកសមសម្រាប់អ្នកជំងឺច្រាលទឹកអាស៊ីតក្រពះ ឬដំបៅក្រពះឡើយ។
ពេលណាគួរទៅជួបគ្រូពេទ្យ?
អាការៈពិបាករំលាយអាហារអាចមិនធម្មតាឡើយប្រសិនបើកើតឡើងញឹកញាប់ ព្រោះវាអាចជារោគសញ្ញាមួយនៃបញ្ហាប្រព័ន្ធរំលាយអាហាររ៉ាំរ៉ៃរួមមានច្រាលទឹកអាស៊ីតក្រពះ ជំងឺរលាកក្រពះ និងសូម្បីតែជំងឺមហារីកក្រពះ។ ដូច្នេះអ្នកចាំបាច់គួរទៅជួបពិគ្រោះជាមួយគ្រូពេទ្យជំនាញ ប្រសិនបើអាការៈពិបាករំលាយអាហារមិនបាត់ទៅវិញក្នុងរយៈពេលយូរជាងពីរសប្តាហ៍ ឬប្រសិនបើអមមកជាមួយនូវរោគសញ្ញាផ្សេងទៀតដូចជាស្រកទម្ងន់ បាត់បង់ចំណង់អាហារ ក្អួត លាមកពណ៌ខ្មៅ ពិបាកលេបអាហារ និងអស់កម្លាំង៕
ត្រួតពិនិត្យដោយ www.health.com.kh
© រក្សាសិទ្ធិដោយ thmeythmey.com
