ជាតិ
សេដ្ឋកិច្ច
រដ្ឋមន្ត្រីក្រសួងប្រៃសណីយ៍ លើកទឹកចិត្តដល់«អ្នកធុរកិច្ចថ្មីឌីជីថល» មកចុះបញ្ជីអាជ្ញាប័ណ្ណឱ្យបានច្រើន
លោក ជា វ៉ាន់ដេតរដ្ឋមន្ត្រី ក្រសួងប្រៃសណីយ៍។ រូបថត៖ PTC
×![]()
ភ្នំពេញ៖ លោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍និងទូរគមនាគមន៍ លើកទឹកចិត្តដល់«អ្នកធុរកិច្ចថ្មីឌីជីថល»ក្នុងការមកចុះបញ្ជីអាជ្ញាប័ណ្ណ ដើម្បីទទួលបានការបណ្តុះបណ្តាល ការលើកទឹកចិត្ត និងការគាំទ្រផ្នែកបច្ចេកទេសពីក្រសួង។ លោក បានលើកឡើងដូច្នេះ នៅក្នុងកិច្ចប្រជុំពិភាក្សាលើសេចក្តីព្រាងអនុក្រឹត្យស្តីពីការគ្រប់គ្រងនិងការលើកទឹកចិត្តធុរកិច្ចថ្មីឌីជីថល កាលពីចុងខែកុម្ភៈ ឆ្នាំ២០២១ នៅទីស្តីការក្រសួង។
បើតាម លោក ជា វ៉ាន់ដេត សេចក្តីព្រាងអនុក្រឹត្យនេះ គឺរៀបចំឡើងសម្រាប់កំណត់អំពីយន្តការ វិធានការ និងនីតិវិធីនៃការទទួលស្គាល់ ការលើកទឹកចិត្ត ការសម្របសម្រួល និងការបណ្តុះបណ្តាលលើផ្នែកធុរកិច្ចថ្មីឌីជីថល ដើម្បីជំរុញសហគ្រិនភាពនិងនវានុវត្តន៍លើវិស័យទូរគមនាគមន៍ បច្ចេកវិទ្យាគមនាគមន៍និងព័ត៌មាន សំដៅជំរុញឱ្យមានការបង្កើតធុរកិច្ចថ្មីឌីជីថលរួមចំណែកដល់ការអភិវឌ្ឍសេដ្ឋកិច្ចនិងសង្គមឌីជីថល។
សេចក្តីព្រាងនេះ នឹងលើកទឹកចិត្តចំពោះបុគ្គលដែលមានបំណងស្នើសុំការទទួលស្គាល់ធុរកិច្ចថ្មីឌីជីថល ដាក់ពាក្យស្នើមកក្រសួងប្រៃសណីយ៍និងទូរគមនាគមន៍ ដោយឥតបង់កម្រៃសេវាណាមួយឡើយ ហើយក៏នឹងអាចទទួលបានការលើកទឹកចិត្ត ការបណ្តុះបណ្តាល និងការគាំទ្របច្ចេកទេសពីក្រសួង ថែមទៀត។ រដ្ឋមន្ត្រីក្រសួងប្រៃសណីយ៍រូបនេះ បាននិយាយដូច្នេះ៖«សេចក្តីព្រាងអនុក្រឹត្យនេះនឹងលើកទឹកចិត្តឱ្យធុរកិច្ចថ្មីឌីជីថលដែលមានសក្តានុពលអាជីវកម្ម បន្តទៅចុះបញ្ជីពាណិជ្ជកម្មនិងបំពេញកាតព្វកិច្ចនានាស្របតាមច្បាប់និងបទដ្ឋានគតិយុត្តជាធរមាន ដើម្បីបន្តដំណើរការនិងពង្រីកអាជីវកម្ម តទៅទៀត»។
រូបថត៖ PTC
សេចក្តីព្រាងអនុក្រឹត្យនេះ បានកំណត់សមត្ថកិច្ចរបស់ក្រសួងប្រៃសណីយ៍និងទូរគមនាគមន៍ក្នុងការគ្រប់គ្រង សម្របសម្រួល និងជំរុញធុរកិច្ចថ្មីឌីជីថលនិងការអភិវឌ្ឍបច្ចេកវិទ្យាឌីជីថល។ ប៉ុន្តែក្រសួងនិងស្ថាប័នពាក់ព័ន្ធនានា ក៏អាចចូលរួមលើកទឹកចិត្ត ការសម្របសម្រួល និងការបណ្តុះបណ្តាលលើផ្នែកធុរកិច្ចថ្មីឌីជីថល បានដែរ។ នេះបើតាមចុះផ្សាយរបស់ក្រសួងប្រៃសណីយ៍និងទូរគមនាគមន៍។
តាមរយៈសេចក្តីព្រាងអនុក្រឹត្យនេះ លោក ជា វ៉ាន់ដេត សង្ឃឹមថា ធុរកិច្ចថ្មីឌីជីថលដែលត្រូវបង្កើត នឹងជួយជំរុញការអភិវឌ្ឍសហគ្រិនភាព និងនវានុវត្តន៍ក្នុងវិស័យទូរគមនាគមន៍ និងបច្ចេកវិទ្យាគមនាគមន៍និងព័ត៌មានដោយជោគជ័យនៅកម្ពុជា៕
Tag:
ធុរកិច្ចថ្មីឌីជីថល
លោក ជា វ៉ាន់ដេត
© រក្សាសិទ្ធិដោយ thmeythmey.com
