កីឡាអន្តរជាតិ
អន្តរជាតិ
លោក មូន ៖ អូឡាំពិកក្រុងតូក្យូ នឹងផ្តល់ឱកាសចរចាជាថ្មីដល់កូរ៉េទាំងពីរ ជប៉ុន និងអាមេរិក
× ប្រធានាធិបតីកូរ៉េខាងត្បូងលោក មូន ជេអ៊ីន នៅថ្ងៃទី១ ខែមីនា និយាយថាព្រឹត្តិការណ៍អូឡាំពិកក្រុងតូក្យូអាចផ្តល់ឱកាសចរចាជាថ្មី រវាងកូរ៉េខាងជើងជាមួយអាមេរិក ឬកូរ៉េខាងជើង និងជប៉ុន និងរវាងកូរ៉េទាំងពីរ ដើម្បីផ្សះផ្សាវិបត្តិនយោបាយដែលប្រេះស្រាំឡើងវិញ។
ថ្លែងក្នុងពិធីប្រារព្ធខួបលើកទី ១០២ នៃទិវាចលនាឯករាជ្យ ១មីនានៅទីក្រុងសេអ៊ូល លោក មូន ចេអ៊ីន ក៏បានអះអាងដែរថា កូរ៉េខាងត្បូងនឹងធ្វើការជាមួយជប៉ុនដើម្បីរៀបចំព្រឹត្តិការណ៍អូឡាំពិកក្រុងតូក្យូឆ្នាំ២០២០ ដែលនេះអាចជួយសម្រួលដល់ទំនាក់ទំនងប្រទេសទាំងពីរ និងការកាត់បន្ថយ ឬបង្ការការឆ្លងជំងឺ COVID-19 ផង។
ការលើកឡើងរបស់ប្រធានាធិបតីកូរ៉េខាងត្បូងបែបនេះ កើតឡើងនៅពេលដែលទំនាក់ទំនងរបស់កូរ៉េខាងជើងជាមួយកូរ៉េខាងត្បូង និងជប៉ុនហាក់ប្រេះស្រាំជាថ្មី និងការចរចាជុំវិញការរំសាយអាវុធនុយក្លេអ៊ែរជាមួយអាមេរិកកាលពីឆ្នាំ២០១៩ ដែលបរាជ័យ។
ដោយហេតុនេះ លោក មូន ចង់យកព្រឹត្តិការណ៍អូឡាំពិកក្រុងតូក្យូដែលពន្យារទៅឆ្នាំ២០២១ ដោយសារ COVID-19 ធ្វើជាកីឡាការទូតដើម្បីស្រោចស្រង់វិបត្តិនយោបាយរវាងប្រទេសទាំងបីជាមួយកូរ៉ខាងជើងឱ្យមានភាពប្រសើរឡើងវិញ។
«ព្រឹត្តិការណ៍ដែលបានគ្រោងទុកសម្រាប់ឆ្នាំនេះអាចជាឱកាសមួយសម្រាប់ការសន្ទនារវាងកូរ៉េខាងត្បូងនិងជប៉ុន, កូរ៉េខាងត្បូង ជាមួយកូរ៉េខាងជើង, កូរ៉េខាងជើង ជាមួយជប៉ុន និងកូរ៉េខាងជើងជាមួយអាមេរិក»។ លោកមូនបានលើកឡើងដូច្នេះនៅឯឧទ្យានសាធារណៈមួយក្នុងក្រុងសេអ៊ូលនាពិធីប្រារព្ធខួបលើកទី ១០២ នៃទិវាចលនាឯករាជ្យ ១ មីនា។
យ៉ាងណាក៏ដោយ គម្រោងនេះនៅមិនទាន់មានភាពប្រាកដប្រជានោះទេ ដ្បិតវិបត្តិ COVID-19 ផង ហើយក្រុងព្យុងយ៉ាងក៏បានកាត់ផ្តាច់ទំនាក់ទំនងជាមួយពិភពលោកផង ក្រោយកូរ៉េខាងជើង និងអាមេរិកក្រោមការគ្រប់គ្រងរបស់លោក ដូណាល់ ត្រាំ ចរចាគ្នាគ្មានទទួលបានផ្លែផ្កាអ្វីសោះនោះ។
បើមិនមានការផ្លាស់ប្តូរគម្រោងអ្វីទេនោះ ជប៉ុននឹងដឹកនាំព្រឹត្តិការណ៍កីឡាអូឡាំពិករដូវក្តៅក្រុងតូក្យូឆ្នាំ២០២០ ចាប់ពីថ្ងៃទី២៣ ខែកក្កដា ដល់ថ្ងៃទី៨ ខែសីហាឆ្នាំ ២០២១៕
Tag:
Olympic
មូន ជេអ៊ីន
© រក្សាសិទ្ធិដោយ thmeythmey.com