COVID-19
ជាតិ
អាជ្ញាធរខេត្តព្រះសីហនុ យកសណ្ឋាគារសាកាណា ធ្វើជាកន្លែងព្យាបាលអ្នកជំងឺកូវីដ-១៩ រូបភាពពីហ្វេសប៊ុកផេក SAKANA HOTEL
×
ដោយ៖ ស៊ុល រ៉វី
ភ្នំពេញ៖ អភិបាលខេត្តព្រះសីហនុ បានកំណត់យកសណ្ឋាគារ សាកាណា (SAKANA HOTEL) ជាកន្លែងសម្រាប់ព្យាបាលអ្នកជងឺកូវីដ-១៩ បន្ទាប់ពីមានអ្នកឆ្លងវីរុសកូរូណាជាបន្តបន្ទាប់។ នេះបើតាមលិខិតរដ្ឋបាលខេត្តព្រះសីហនុ នៅថ្ងៃទី០២ ខែមីនា ២០២១។
រដ្ឋបាលខេត្តព្រះសីហនុ បានតម្រូវឲ្យម្ចាស់សណ្ឋាគារសាកាណា ផ្អាកទទួលភ្ញៀវមកស្នាក់នៅក្នុងសណ្ឋាគារ ។ លើសពីនេះ ម្ចាស់សណ្ឋាគារ ក៏ត្រូវរៀបចំសណ្ឋាគារជាកន្លែងព្យាបាលអ្នកជំងឺ ឲ្យមានលក្ខណៈសមស្រប។
ម្ចាស់សណ្ឋាគារត្រូវរៀបចំសម្អាតអនាម័យ បាញ់ថ្នាំសម្លាប់មេរោគទាំងក្នុង និងបរិវេណសណ្ឋាគារ មុននិងក្រោយពេលអ្នកជំងឺមកព្យាបាល។ ជាពិសេសត្រូវណែនាំដល់បុគ្គលិក និងអ្នកពាក់ព័ន្ធក្នុងសណ្ឋាគារឲ្យបំពេញតួនាទីសម្អាតអនាម័យ ដាំស្លរ សន្តិសុខជាដើម ព្រមទាំងអនុវត្តតាមការណែនាំរបស់ក្រសួងសុខាភិបាល ដោយមិនត្រូវចេញក្រៅដោយគ្មានការអនុញ្ញាតពីអាជ្ញាធរឡើយ។
គិតត្រឹមថ្ងៃទី២ មីនានេះ រដ្ឋបាលខេត្តព្រះសីហនុ បានសម្រេចផ្អាកដំណើរការសណ្ឋាគារ ភោជនីយដ្ឋាន អគារស្នាក់នៅ ផ្សារទំនើប មន្ទីរពេទ្យឯកជន ចំនួន ៣២កន្លែង បន្ទាប់ពីរកឃើញអ្នកពាក់ព័ន្ធវិជ្ជមានជំងឺកូវីដ-១៩ជាបន្តបន្ទាប់។
បច្ចុប្បន្ន កម្ពុជាមានអ្នកឆ្លងជំងឺកូវីដ១៩សរុបចំនួន ៨៤៤ករណី។ ក្នុងនោះមានអ្នកពាក់ព័ន្ធព្រឹត្តិការណ៍សហគមន៍២០ កុម្ភៈ ចំនួន៣៤០ករណី ដែលភាគច្រើនជនជាតិចិន៕
Tag:
ThmeyThmey
កូវីដ-១៩
រដ្ឋបាលខេត្តព្រះសីហនុ
សណ្ឋាគារសាកាណា
© រក្សាសិទ្ធិដោយ thmeythmey.com