COVID-19
ជាតិ
កម្មករ៧១៦នាក់ នៅរោងចក្រ Y&W អវិជ្ជមានកូវីដ-១៩ ទិដ្ឋភាពនៅមុខរោងចក្រ Y&W
× ក្នុងចំណោមកម្មករ-ការិនី៧១៦នាក់ នៅរោងចក្រកាត់ដេរសម្លៀកបំពាក់ Y&W ស្ថិតក្នុងភូមិព្រែកជ្រៃ សង្កាត់ស្ពានថ្ម ខណ្ឌដង្កោ រាជធានីភ្នំពេញ ដែលត្រូវបានយកសំណាកទៅធ្វើតេស្ត គ្មានអ្នកណាម្នាក់ ផ្ទុកជំងឺកូវីដ-១៩ឡើយ។ នេះបើតាមលទ្ធផលធ្វើតេស្តរកវីរុសកូវីដ-១៩ ដែលផ្សាយលើទំព័រហ្វេសប៊ុកនាយកដ្ឋានប្រយុទ្ធនឹងជំងឺឆ្លង (CDC) នៃក្រសួងសុខាភិបាល នៅព្រឹកថ្ងៃទី៣ ខែមីនា ឆ្នាំ២០២១។
ការយកសំណាកកម្មករ-កម្មការិនីទាំង៧១៦នាក់ ទៅធ្វើតេស្ត គឺបន្ទាប់ពីរកឃើញកម្មការិនីវ័យ៤៨ឆ្នាំម្នាក់ ដែលបម្រើការងារនៅរោងចក្រ Y&W នេះ ផ្ទុកជំងឺកូវីដ-១៩។ លោកវេជ្ជបណ្ឌិត ជី មានហេង ប្រធានមន្ទីរសុខាភិបាលភ្នំពេញ ប្រាប់សារព័ត៌មានថ្មីៗថា ក្រៅពីកម្មករ-កម្មការិនីទាំង៧១៦នាក់នោះ ក្រុមគ្រូពេទ្យ ប្រហែលជាគ្មានគម្រោងយកសំណាកកម្មករ-កម្មការិនីផ្សេងទៀត នៅរោងចក្រ Y&W ទៅធ្វើតេស្តឡើយ។
លោក កេង ថា នាយករងរដ្ឋបាលខណ្ឌដង្កោ អះអាងថា កម្មករ-កម្មការិនីទាំង៧១៦នាក់នោះ គឺធ្វើការក្នុងអគារ D8 ជាមួយកម្មការិនី ដែលផ្ទុកជំងឺកូវីដ-១៩ ដូច្នេះហើយទើបពួកគេ ត្រូវយកសំណាកទៅធ្វើតេស្ត។ លោក បន្តថា ចំពោះកម្មករ-កម្មការនី ដែលធ្វើក្នុងអគារផ្សេងទៀត ប្រហែលជាមិនត្រូវយកសំណាកទៅតេស្តនោះទេ។ លោក បន្ថែមថា កម្មករ-កម្មការិនីសរុបនៅរោងចក្រ Y&W មានជាង៥ពាន់នាក់។
មន្រ្តីរដ្ឋបាលខណ្ឌដង្កោរូបនេះ ថ្លែងមកកាន់សារព័ត៌មានថ្មីៗថា អគារ D8 ត្រូវបានបិទបណ្តោះអាសន្ន ខណៈអគារផ្សេងទៀត របស់រោងចក្រ Y&W នេះ នៅដំណើរការធម្មតា។ លោក ផ្តល់ព័ត៌មានថា មកដល់ពេលនេះ ក្នុងចំណោមកម្មករ-កម្មការិនី៧១៦នាក់នោះ មាន៤០ ត្រូវបានដាក់ឲ្យធ្វើចត្តាឡីស័ក។ តែលោក មិនទាន់ដឹងព័ត៌មានបន្ថែមឡើយថា អាចមានកម្មករ-កម្មការិនីផ្សេងទៀត នឹងត្រូវដាក់ឲ្យធ្វើចត្តាឡីស័កដែរឬអត់។
កាលពីព្រឹកថ្ងៃទី២ ខែមីនា អាជ្ញាធរ បានចុះទៅប្រមូលសំណាកពីកម្មករ-កម្មការិនី នៅរោងចក្រ Y&W យកទៅធ្វើតេស្ត ក្រោយទទួលបានដំណឹង កាលពីយប់ថ្ងៃទី១ ខែមីនា ថា មានកម្មការិនីម្នាក់ ដែលធ្វើការរោងចក្រនេះដែរ បានផ្ទុកជំងឺកូវីដ-១៩៕
Tag:
COVID-19
កម្មកររោងចក្រ Y&W
© រក្សាសិទ្ធិដោយ thmeythmey.com