កីឡាអន្តរជាតិ
អន្តរជាតិ
ម្ចាស់មេដាយអូឡាំពិកអ៊ីរ៉ង់ដែលភៀសខ្លួនទៅអាល្លឺម៉ង់ ចង់លេងអូឡាំពិកនៅតូក្យូ
×![]()
ដោយ: ទេព ពិទូរ្យ
ម្ចាស់មេដាយតេក្វាន់ដូអូឡាំពិកស្ត្រីអ៊ីរ៉ង់ Kimia Alizadeh ដែលត្រូវបានផ្តល់ឋានៈជាជនភៀសខ្លួននៅប្រទេសអាល្លឺម៉ង់ មានបំណងចូលរួមក្នុងក្រុមជនភៀសខ្លួនអូឡាំពិកក្រោមទង់ពណ៌ស ក្នុងព្រឹត្តិការណ៍កីឡាអូឡាំពិកក្រុងតូក្យូ ឆ្នាំ២០២០ រដូវក្តៅនេះ។
Alizadeh កីឡាការិនីអ៊ីរ៉ង់តែមួយគត់ដែលឈ្នះមេដាយសំរឹទ្ធតេក្វាន់ដូនៅអូឡាំពិកទីក្រុងរីយ៉ូ ប្រទេសប្រេស៊ីល ឆ្នាំ ២០១៦ បានភៀសខ្លួនទៅរស់នៅប្រទេសអាល្លឺម៉ង់កាលពីឆ្នាំ២០២០ ដោយសារនាងមិនអាចទ្រាំរស់នៅក្រោមការជិះជាន់ និងភាពអយុត្តិធម៌នៅក្នុងប្រទេសអ៊ីរ៉ង់។
មុនពេលសម្រេចជ្រើសយកអាល្លឺម៉ង់ កីឡាការិនីវ័យ២២ឆ្នាំរូបនេះ មានការផ្តល់ជូនពីប្រទេសឋានៈជាជនភៀសខ្លួនពីប្រទេសជាច្រើនដូចជាហូឡង់ កាណាដា ប៊ែលហ្សិក និងប៊ុលហ្គារី។ Alizadeh តែងតែរៀបរាប់ពីទុក្ខលំបាក និងធុញទ្រាន់នឹងឧបករណ៍ឃោសនា ទើបបង្ខំនាងឱ្យចាកចេញពីស្រុកកំណើត។
បើទោះចេញពីប្រទេសកំណើត ប៉ុន្តែម្ចាស់មេដាយសំរឹទ្ធតេក្វាន់ដូប្រភេទទម្ងង់៥៧គីឡូក្រាមនៅតែចង់បង្ហាញខ្លួនក្នុងព្រឹត្តិការណ៍កីឡាធំៗ ជាពិសេសនៅអូឡាំពិកតែម្តង។
Alizadeh បានប្រាប់ទីភ្នាក់ងារព័ត៌មាន Reuters ថាតេក្វាន់ដូបានផ្លាស់ប្តូរជីវិតរបស់នាងមកដល់សព្វថ្ងៃ។ យ៉ាងណាក៏ដោយ នាងអះអាងបន្ថែមថា៖ «នៅពេលខ្ញុំទទួលបានមេដាយខ្ញុំគឺជាអត្តពលិកដំបូងគេនៅអ៊ីរ៉ង់ហើយបន្ទាប់ពីនោះប្រជាជនទាំងអស់បានស្គាល់ខ្ញុំ ... នោះពិតជាពិបាកណាស់»។
Alizadeh ដែលសព្វថ្ងៃរស់នៅក្នុងទីក្រុង Aschaffenburg និងកំពុងហ្វឹកហាត់ជាមួយប្តីរបស់ខ្លួន អាចប្រជែងយកកៅអីទៅប្រកួតកីឡាអូឡាំពិកក្រុងតូក្យូបាន ប្រសិនបើនាងឈ្នះការប្រកួតជម្រុះតំបន់អឺរ៉ុបនៅក្រុង Sofia ប្រទេសប៊ុលហ្គារី ក្នុងខែឧសភាខាងមុខ។
អត្តពលិកវ័យក្មេងដ៏ស្រស់ស្អាតដែលធ្លាប់ឈ្នះមេដាយមាសតេក្វាន់ដូ ក្នុងព្រឹត្តិការណ៍កីឡាយុវជនអូឡាំពិកនៅក្រុងណានជីង ឆ្នាំ២០១៤ គ្រោងនឹងចូលរួមក្រុមជនភៀសខ្លួនអូឡាំពិកដែលនឹងត្រូវជ្រើសរើសនៅខែមិថុនា ពីក្រុមអត្តពលិកចំនួន៥៥រូប ក្នុង១២ប្រទេសកីឡា៕
Tag:
Kimia Alizadeh
Olympic
© រក្សាសិទ្ធិដោយ thmeythmey.com
