ជាតិ
សម្ដេច ហ៊ុន សែន ប្រកាសធ្វើជាបេក្ខជននាយករដ្ឋមន្ត្រី សម្រាប់អាណត្តិទី៧ទៀត
× ភ្នំពេញ៖ ពីសន្និសីទកាសែតក្រោយពីចាក់វ៉ាក់សាំងAstraZeneca នៅព្រឹកថ្ងៃទី៤ មីនា សម្ដេច ហ៊ុន សែន បានប្រកាសប្រាប់មុនថា សម្ដេច នៅតែឈរជាបេក្ខជននាយករដ្ឋមន្ត្រី នៃការបោះឆ្នោតជ្រើសតាំងតំណាងរាស្ត្រអាណត្តិទី៧ នាឆ្នាំ២០២៣ខាងមុខ។
២ឆ្នាំទៀត ទើបការបោះឆ្នោតឈានមកដល់ ប៉ុន្តែសម្ដេច ហ៊ុន សែន មិនលាក់លៀមពីបំណងធ្វើនាយករដ្ឋមន្ត្រីខ្លួនឡើយ។ សម្ដេច ហ៊ុន សែន បានប្រកាសជាសាធារណៈច្បាស់ថា សម្ដេចនឹងធ្វើជាបេក្ខជននាយករដ្ឋមន្ត្រី សម្រាប់អាណត្តិទី៧ទៀត ។ ការប្រកាសរបស់នាយករដ្ឋមន្ត្រីនេះ គឺដើម្បីបញ្ចប់ចម្ងល់របស់មហាជន ដែលសង្ស័យថា សម្ដេច កំពុងរៀបចំការផ្ទេរអំណាចទៅឱ្យកូនប្រុសច្បងខ្លួន គឺលោក ហ៊ុន ម៉ាណែត។
ប្រមុខរដ្ឋាភិបាល ថ្លែងក្នុងសន្និសីទកាសែតយ៉ាងដូច្នេះថា៖«ឥឡូវឈប់ប្រកាសពីរឿង(ធ្វើនាយករដ្ឋមន្ត្រី)១០ឆ្នាំ ២០ឆ្នាំ ធ្វើរហូតទាល់តែឈប់ចង់ធ្វើ។ កុំឱ្យវាពិបាកពេក។ តិច(គេថា)ផ្ទេរតំណែងឱ្យ ហ៊ុន ម៉ាណែត តិចផ្ទេរអំណាចឱ្យទៅអ្នកនេះ ទៅអ្នកនោះ ។ អ៊ីចឹងមិនបាច់ផ្ទេរតែម្ដង នៅកាន់(តំណែងនាយករដ្ឋមន្ត្រី) តែហ្មង»។
នាយករដ្ឋមន្ត្រីរូបនេះ ក៏ឆ្លៀតផ្លែផ្កាទៅកាន់អ្នកនយោបាយប្រឆាំងថា ពួកគេទំនងជាគ្មានផ្លូវធ្វើនយោបាយឈ្នះគណបក្សប្រជាជនកម្ពុជា ក្រោមការដឹកនាំរបស់សម្ដេចនោះទេ។ ដោយមើលឃើញថា នយោបាយខ្លួនមានភាពរឹងមាំនោះ សម្ដេច ហ៊ុន សែន បាននិយាយបែបចំអកថា អ្នកនយោបាយបក្សប្រឆាំង អាចយកឈ្នះសម្ដេច នៅថ្ងៃទី៣១ កុម្ភៈ (ខែកម្ភៈ មានតែ២៨ ឬ ២៩ថ្ងៃប៉ុណ្ណោះ)។
កន្លងមក សម្ដេច ហ៊ុន សែន ធ្លាប់ប្រាប់ថា លោក អូន ព័ន្ធមុនីរ័ត្ន ក៏ជាបេក្ខភាពនាយករដ្ឋមន្ត្រីមួយរូបដែរ ក្នុងចំណោមបេក្ខភាពជាច្រើនរូបផ្សេងទៀត។ មូលហេតុដែលសម្ដេច បង្ហើបបែបនេះ គឺដើម្បីកុំឱ្យសាធារណជនដាក់ការសង្ស័យលើតែកូនប្រុសច្បងខ្លួន លោក ហ៊ុន ម៉ាណែត។
កម្ពុជា នឹងរៀបចំការបោះឆ្នោតក្រុមប្រឹក្សា ឃុំ-សង្កាត់ នៅថ្ងៃទី៥ មិថុនា ឆ្នាំ២០២២ ។ ចំណែកការបោះឆ្នោតជ្រើសតាំងតំណាងរាស្ត្រវិញ នឹងប្រព្រឹត្តទៅនៅខែកក្កដា ឆ្នាំ២០២៣។ នេះបើតាមនាយករដ្ឋមន្ត្រី ហ៊ុន សែន៕
© រក្សាសិទ្ធិដោយ thmeythmey.com