សម័យប្រជុំលើកទី៤ នៃសភាប្រជាជនចិននីតិកាលទី១៣ ចាប់ផ្តើមជាផ្លូវការនៅថ្ងៃទី៥ ខែមីនា។ កិច្ចប្រជុំប្រចាំឆ្នាំនេះ ជាឱកាសនៃការបង្ហាញពីគោលនយោបាយចម្បងៗសម្រាប់ឆ្នាំ២០២១ និងសមិទ្ធផលរបស់រដ្ឋាភិបាលចិននៅឆ្នាំ២០២០។ មិនខុសអ្វីពីឆ្នាំមុន បញ្ហាហុងកុងក៏ស្ថិតនៅក្នុងរបៀបវារៈនៃកិច្ចប្រជុំនេះដែរ ដោយទីក្រុងប៉េកាំង នឹងកែទម្រង់ប្រព័ន្ធបោះឆ្នោតនៅហុងកុង ដែលគេជឿថា នឹងបំបាត់សំឡេងប្រឆាំងនៅទីក្រុងនេះ។
សំឡេងអ្នកនយោបាយមាននិន្នាការរកប្រជាធិបតេយ្យនៅហុងកុង ទំនងជាបាត់បង់បន្តិចម្ដងៗ ខណៈដែលចិនប្រកាសផែនការធ្វើកំណែទម្រង់ប្រព័ន្ធបោះឆ្នោតនៅទីក្រុងពាក់កណ្ដាលស្វយ័តមួយនេះ។ តាមការគ្រោងទុក សភាប្រជាជនចិនដែលបើកសម័យប្រជុំប្រចាំឆ្នាំនៅថ្ងៃទី៥ ខែមីនា នឹងជជែកពីការផ្លាស់ប្ដូររបៀបបោះឆ្នោតនៅហុងកុង ដែលសំដៅផាត់ចេញសំឡេងប្រឆាំងទីក្រុងប៉េកាំងតែម្ដង។ សេចក្ដីស្នើមួយលើការកែទម្រង់ ត្រូវបានដាក់ឱ្យសភាចិនជជែក មុនអនុម័ត។
នៅមុនកិច្ចប្រជុំសភាប្រជាជនចិនមួយសប្តាហ៍ លោក Xia Baolong ប្រធានការិយាល័យកិច្ចការហុងកុង និងម៉ាកាវ និយាយថា មានតែអ្នកស្នេហាជាតិប៉ុណ្ណោះ អាចបម្រើការងារនៅហុងកុងបាន។ ចំណែកលោកស្រី Carrie Lam ប្រមុខតំបន់ហុងកុង និយាយថា អស្ថិរភាពនយោបាយ និងបាតុកម្មទ្រង់ទ្រាយធំក្នុងឆ្នាំ២០១៩ ជាកត្តាជំរុញឱ្យរដ្ឋាភិបាលចិនប្រកាន់ជំហរហុងកុងត្រូវដឹកនាំដោយអ្នកស្នេហាជាតិ។
ថ្លែងក្នុងកិច្ចប្រជុំថ្ងៃដំបូង លោក វ៉ាង ឈិន អនុប្រធានសភាប្រជាជនចិនពន្យល់ពីសំណើខាងលើ ថា រដ្ឋាភិបាលចិននឹងកែប្រែសមាសភាពនៃគណៈកម្មការបោះឆ្នោតហុងកុងដែលជាស្ថាប័នជ្រើសរើសមេដឹកនាំហុងកុង។ លោក វ៉ាង បន្តថា ការកែទម្រង់ថ្មី នឹងផ្ដល់អំណាចបន្ថែមឱ្យគណៈកម្មការនេះក្នុងការតែងតាំង និងជ្រើសរើសបេក្ខភាពសមាជិកសភាហុងកុងផងដែរ។ នេះបើតាមការផ្សាយរបស់ទីភ្នាក់ងារព័ត៌មានរដ្ឋចិន Xinhua ។
មួយថ្ងៃមុនកិច្ចប្រជុំសភា ទូរទស្សន៍ហុងកុងផ្សាយថា អង្គបោះឆ្នោតនៃគណៈកម្មការខាងលើដែលបច្ចុប្បន្នមាន១,២០០នាក់ នឹងត្រូវបង្កើនដល់១,៥០០នាក់។ ចំណែកសភាហុងកុងនឹងត្រូវបង្កើនអាសនៈពី៧០ ដល់៩០។
អ្នកសង្កេតការណ៍មួយចំនួន អះអាងថា កំណែទម្រង់នេះនឹងកាត់បន្ថយសំឡេងអ្នកប្រជាធិបតេយ្យក្នុងគណៈកម្មការបោះឆ្នោត ក៏ដូចជាលទ្ធភាពរបស់អ្នកប្រជាធិបតេយ្យក្នុងការស្នើឈ្មោះបេក្ខភាពតំណាងរាស្ត្រ និងនាយកប្រតិបត្តិផងដែរ។ ចំណែកការពង្រីកអាសនៈសភាហុងកុង នឹងធ្វើឱ្យចំនួនតំណាងរាស្ត្រដែលចេញពីការបោះឆ្នោតដោយផ្ទាល់មានចំនួនកាន់តែតិចទៅ។
កំណែទម្រង់បែបណាមួយនៃប្រពន្ធបោះឆ្នោតហុងកុង ត្រូវបានរំពឹងថា នឹងប៉ះពាល់ដល់ក្រុមប្រជាធិបតេយ្យដែលប៉ុនប៉ងកាន់កាប់សភាហុងកុង។ ជាទម្លាប់ អ្នកប្រជាធិបតេយ្យទទួលបានសំឡេងគាំទ្រច្រើនជាងអ្នកគាំទ្ររដ្ឋាភិបាលចិនក្នុងការបោះឆ្នោតសភា។ បច្ចុប្បន្ន សភាហុងកុងមានតំណាងរាស្ត្រចំនួន៧០រូប ដែល៣៥រូបជ្រើសរើសតាមការបោះឆ្នោតជាសាកល ៣០តំណាងឱ្យវិស័យផ្សេងៗក្នុងទីក្រុង និង៥រូបចុងក្រោយជ្រើសតាំងដោយក្រុមប្រឹក្សាសង្កាត់។ ការបោះឆ្នោតសភាហុងកុង ត្រូវបានរំពឹងថា នឹងធ្វើឡើងនៅខែកញ្ញា ឆ្នាំ២០២២ ឯណោះ បន្ទាប់ពីត្រូវពន្យារដោយសារជំងឺកូវីដ-១៩។
តបទៅនឹងផែនការកំណែទម្រង់នេះ ការិយាល័យអ្នកនាំពាក្យរដ្ឋាភិបាលហុងកុងបង្ហាញពីជំហរគាំទ្រ ដែរ ដោយលើកឡើងថា ការដឹកនាំហុងកុងដោយអ្នកស្នេហាជាតិ អាចជាចំណុចដែលរដ្ឋាភិបាលកណ្តាលចិនមានអំណាចក្នុងការអនុវត្តដើម្បីធានាស្ថិរភាពនៃទីក្រុង៕