អន្តរជាតិ
លោក វីដូដូ ជំរុញឱ្យប្រជាជនឥណ្ឌូណេស៊ីស្រឡាញ់ផលិតក្នុងស្រុកជាងទំនិញនាំចូល
ប្រធានាធិបតីឥណ្ឌូណេស៊ី ចូកូ វីដូដូ ចុះត្រួតពិនិត្យហាងលក់ទំនិញមួយ។ រូបថត AFP
×![]()
ដោយ: ឈួន ឈីវអុីង
ប្រធានាធិបតីឥណ្ឌូណេស៊ី លោក ចូកូ វីដូដូ នៅថ្ងៃទី៤ ខែមីនា បានជំរុញឱ្យប្រជាជនឥណ្ឌូណេស៊ី ស្រលាញ់ផលិតផលក្នុងស្រុកជាជាងផលិតផលនាំចូលពីបរទេស។ បើតាមលោក វីដូដូ ការជំរុញផលិតផលក្នុងស្រុក នឹងជួយលើកកម្ពស់សេដ្ឋកិច្ចជាតិ ស្របពេលដែលរដ្ឋាភិបាលរបស់លោកដាក់គោលដៅជំរុញកំណើនសេដ្ឋកិច្ច៥ភាគរយក្នុងឆ្នាំ២០២១ នេះ។ 
ថ្លែងក្នុងកិច្ចប្រជុំមួយរបស់ក្រសួងពាណិជ្ជកម្មនៅថ្ងៃទី៤ ខែមីនា លោកប្រធានាធិបតី ចូកូ វីដូដូ បានជំរុញឱ្យរោងចក្រឧស្សាហកម្មនានាប្រើប្រាស់វត្ថុធាតុដើមក្នុងស្រុកជាជាងប្រើប្រាស់សម្ភារដែលនាំចូលពីបរទេស។ ជាមួយនឹងវត្តមានផលិផលក្នុងស្រុកបែបនេះ លោក វីដូដូ ក៏ប្រាប់ឱ្យប្រជាជនឥណ្ឌូណេស៊ីទាំងអស់ មានមោទកភាពចំពោះផលិតផលក្នុងស្រុក ស្រឡាញ់ផលិតផលក្នុងស្រុកឱ្យលើសផលិតផលបរទេស។
«សូមនាំគ្នាស្រលាញ់ផលិតផលក្នុងស្រុក និងស្អប់ផលិតផលនាំចូលពីបរទេស។ ដូច្នេះប្រជាជនរបស់យើងនឹងក្លាយជាអ្នកគាំទ្រទំនិញឥណ្ឌូណេស៊ីដ៏ស្មោះត្រង់»។ នេះជាការលើកឡើងរបស់លោក ចូកូវី ដែលជាឈ្មោះហៅក្រៅរបស់លោក វីដូដូ ។ សម្រាប់លោក ចូកូវី ប្រជាជនឥណ្ឌូណេស៊ីទាំងជាង២៧០លាននាក់ ជាអតិថជនដ៏ធំមួយ ហើយដែលគួរតែទិញផលិតផលក្នុងស្រុកឱ្យច្រើនដែរ។
បើតាមទូរទស្សន៍ CNA ប្រធានាធិបតីឥណ្ឌូណេស៊ីរូបនេះ ចាត់ទុកម៉ាកទំនិញជារឿងសំខាន់ ពិសេសទំនិញផលិតដោយឥណ្ឌូណេស៊ីផ្ទាល់។ លោកថែមទាំងលើកយោបល់ថា ម៉ាកទំនិញផលិតក្នុងស្រុក ឬផលិតផលរបស់សហគ្រាសតូច និងមធ្យមនៅឥណ្ឌូណេស៊ី គួរតែត្រូវបានដាក់តាំងនៅតាមផ្សារទំនើបនៅត្រង់ប្លង់ល្អ ឯម៉ាកផលិតផលនាំចូលពីបរទេសអាចដាក់នៅខាងកៀនក៏បាន។
ជាមួយគ្នានេះ លោក ចូកូវី ក៏បានបញ្ជាក់ថា គោលដៅកំណើនសេដ្ឋកិច្ច៥ភាគរយ ដូចដែលបានចែង ក្នុងគម្រោងថវិកាជាតិ ត្រូវតែសម្រេចឱ្យបាន។ លោកបន្តថា ឆ្នាំ២០២១ នេះ ជាឆ្នាំនៃការស្តារសេដ្ឋកិច្ចឡើងវិញរបស់ឥណ្ឌូណេស៊ី ដែលត្រូវតែផ្អែកលើស្មារតីសុទិដ្ឋិនិយម។
«សម្រាប់បញ្ហានេះ ខ្ញុំសូមស្នើជាពិសេសដល់មន្ត្រីគ្រប់ជាន់ថ្នាក់នៃក្រសួងពាណិជ្ជកម្ម សូមកុំធ្វើការតាមតែបទដ្ឋានធម្មតា ត្រូវតែមានគំនិតបង្កើតថ្មីប្រកបដោយភាពច្នៃប្រឌិត»។ នេះជាការស្នើឡើងរបស់លោកប្រធានាធិបតីក្នុងកិច្ចប្រជុំនាថ្ងៃទី៤ ខែមីនា។
សូមបញ្ជាក់ថា នៅឆ្នាំ២០២០ អាត្រានាំចូលទំនិញពីបរទេសធ្លាក់ចុះសរុប០,៥ភាគរយ ឯសេដ្ឋកិច្ចរបស់ប្រទេសធ្លាក់ចុះ២,០៧ភាគរយ ដែលជាការធ្លាក់ចុះប្រចាំឆ្នាំលើកដំបូង ចាប់តាំងពីមានវិបត្តិហិរញ្ញវត្ថុនៅអាស៊ីក្នុងឆ្នាំ ១៩៩៨ ។ ទោះជាយ៉ាងណា រដ្ឋមន្ត្រីក្រសួងហិរញ្ញវត្ថុលោកស្រី Sri Mulyani បានកត់សម្គាល់ថា ការធ្លាក់ចុះនេះស្ថិតនៅក្នុងកម្រិតមធ្យមប៉ុណ្ណោះ បើប្រៀបធៀបទៅនឹងប្រទេសដទៃទៀត៕
Tag:
ឥណ្ឌូណេស៊ី
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
5 ថ្ងៃ
