ជាតិ
កញ្ញា រ័ត្ន រសលក្ខណ៍ លក់នំសណ្ដែករូបផ្លែឈើចម្រុះពណ៌ បាន៧០០នំក្នុងមួយថ្ងៃ
×
ដោយ៖ ស៊ុល រ៉វី
ភ្នំពេញ៖ កញ្ញា រ័ត្ន រសលក្ខណ៍ ជាអ្នកលក់នំសណ្ដែករូបផ្លែឈើចម្រុះមួយរូប ជិតផ្សារអូរឫស្សី និងតាមបណ្តាញសង្គមហ្វេសប៊ុក។ ស្ត្រីវ័យ៣០ឆ្នាំ រូបនេះទើបនឹងចាប់ផ្ដើមលក់នំសណ្តែក ដែលមានវត្ថុធាតុដើមសំខាន់ គឺសណ្ដែកបាយ និងខ្ទិះដូងនេះ បានប្រមាណជា ៤ខែប៉ុណ្ណោះ ប៉ុន្តែទទួលបានការគាំទ្រច្រើនគួរសម។ ក្នុងមួយថ្ងៃ កញ្ញា រ័ត្ន រសលក្ខណ៍ អាចលក់នំបានពី ចន្លោះ ៧០០ ទៅ ១,០០០នំ ហើយចំណូលវិញបានពី៣០ម៉ឺន ទៅ៤០ម៉ឺនរៀល។
ដើម្បីជ្រាបកាន់តែច្បាស់ សូមអញ្ជើញលោកអ្នកនាង ទស្សនាបទសម្ភាសន៍ រវាងលោក ស៊ុល រ៉វី អ្នកសារព័ត៌មានThmeyThmey25 និងកញ្ញា រ័ត្ន រសលក្ខណ៍ អ្នកលក់នំសណ្ដែករូបផ្លែឈើចម្រុះ ដូចតទៅ៖
កញ្ញា រ័ត្ន រសលក្ខណ៍ ជាធ្វើ និងអ្នកលក់នំសណ្ដែករូបផ្លែឈើចម្រុះ ដែលមានទីតាំងនៅ ភូមិ៦ សង្កាត់អូរឫស្សី ខណ្ឌ៧មករា រាជធានីភ្នំពេញ។ កញ្ញា រសលក្ខណ៍ ទើបចាប់ផ្តើមអាជីវកម្មប្រមាណ៤ខែប៉ុណ្ណោះ ប៉ុន្តែនំសណ្តែករូបផ្លែឈើចម្រុះពណ៌នេះ ទទួលបានការគាំទ្រយ៉ាងរហ័ស។
បើតាម កញ្ញា រ័ត្ន រសលក្ខណ៍ នំសណ្តែករូបផ្លែឈើនេះ ជានំដែលខ្លួន ក៏ដូចជាមនុស្សដែលមានវ័យស្របាលខ្លួន ធ្លាប់ទទួលទានជាញឹកញាប់កាលពីកុមារ។ តាមរយៈការចងចាំ និងអនុស្សាវរីយទាំងអស់នោះហើយ ដែលនាំឱ្យ កញ្ញា រសលក្ខណ៍ នឹកឃើញដល់អាជីវកម្មមួយនេះ។
នៅក្នុងកិច្ចសម្ភាសជាមួយសារព័ត៌មាន Thmeythmey25 កញ្ញា រសលក្ខណ៍ បានរៀបរាប់ទៀតថា ការលក់ដូររបស់ខ្លួនសព្វថ្ងៃ ទទួលបានការការកម្មង់ឥតដាច់ពីអតិថិជនជាពិសេសនៅលើបណ្ដាញសង្គមផ្ទាល់។ ម្ចាស់អាជីវកម្មវ័យ៣០ឆ្នាំរូបនេះ ឱ្យដឹងទៀតថា ខ្លួនអាចលក់បានចន្លោះពី៧០០នំ ទៅ១០០០នំ ក្នុងមួយថ្ងៃ។ រីឯប្រាក់ចំណូល បានចន្លោះ៣០ម៉ឺន ទៅ៤០ម៉ឺនរៀល។
ទោះជាបច្ចុប្បន្ន នំសណ្តែករូបផ្លែឈើរបស់ខ្លួន ទទួលបានការគាំទ្រច្រើនក្តី ប៉ុន្តែយុវតីរូបនេះ អះអាងថា អាជីវកម្មផ្នែកម្ហូបអាហារនេះ មានការនឿយហត់ខ្លាំង បើធៀបនឹងការលក់ដូរសម្លៀកបំពាក់តាមអនឡាញដែលខ្លួនធ្លាប់ធ្វើ។ មិនតែប៉ុណ្ណោះ ពីដំបូងកញ្ញា ក៏ខ្វល់ចិត្ត និងប្រឹងប្រែងខ្លាំងដែរ ក្នុងការផ្សព្វផ្សាយពីផលិតនំរបស់ខ្លួន។ «ការផលិតនំនេះចាយពេលវេលា។ ចំនួននំ ប្រមាណជា ៧០០ ទៅ ១,០០០នំ ត្រូវចាយពេលប្រមាណពី ៣ ទៅ ៤ម៉ោង ក្នុងការផលិត។ ពីដំបូងទី លក់តែ ១០០នំ លក់អត់អស់ទេ ដោយសារអត់ទាន់មានអ្នកស្គាល់»។
បើតាម កញ្ញា រសលក្ខណ៍ រសជាតិ និងការកសាងទំនុកចិត្តអតិថិជន គឺជាកត្តាសំខាន់ ដែលជំរុញឲ្យអាជីវកម្មរបស់ខ្លួន ដំណើរការបានដូចពេលសព្វថ្ងៃនេះ ហើយវាបានក្លាយជាប្រភពចំណូលចម្បងសម្រាប់ កញ្ញា រសលក្ខណ៍ បន្ថែមពីការលក់ភេសជ្ជៈ។ ស្ត្រីរូបនេះ ក៏មានបំណងពង្រីកការផលិតបន្ថែមទៀត នៅពេលខាងមុខដែរ ដើម្បីឆ្លើយតបនឹងតម្រូវការរបស់អតិថិជន។ នំសណ្តែកមានវត្ថុធាតុដើមសំខាន់ គឺសណ្ដែកបាយ និងខ្ទិះដូង ហើយរូបផ្លែឈើ ឬរូបសត្វគឺមានពុម្ពសម្រាប់ចាក់ជាស្រេច។ ប៉ុន្តែរូបខ្លះ ក៏សូនដោយដៃភ្លាមៗដែរ។ បន្ទាប់ពីចាក់នំ ចេញជារូបរាងសត្វ ឬផ្លែឈើនីមួយៗតាមតម្រូវការហើយ ទើបកញ្ញា រសលក្ខណ៍ ចាប់ផ្តើមលាបពណ៌នំ ដោយប្រើពណ៌សម្រាប់ដាក់អាហារ ហើយជ្រលក់ចូលទៅក្នុងចាហួយ និងទុករហូតផ្នែកចាហួយនោះរឹង ទើបអាចដាក់លក់បាន។ បើតាម កញ្ញា រសលក្ខណ៍៕
Tag:
ThmeyThmey25
នំសណ្ដែកផ្លែឈើគ្រប់មុខ
រ័ត្ន រសវឡក្ខណ័
Voleak Roth
© រក្សាសិទ្ធិដោយ thmeythmey.com