ជាតិ
សេដ្ឋកិច្ច
ផ្តើម​អាជីវកម្ម​ជាមួយ​ទុន​១០​ម៉ឺន​រៀល អ្នកស្រី ច​ន្ធូ ប្រឹងប្រែង​រហូត​ក្លាយជា​ម្ចាស់​សិប្បកម្ម​បាយក្តាំង​ដ៏​ល្បី​មួយ​
07, Mar 2021 , 9:29 pm        
រូបភាព
​ភ្នំពេញ​៖ អ្នកស្រី សុខ ច​ន្ធូ ជា​ម្ចាស់​សិប្បកម្ម​បាយដំណើប​បំពង​គ្រឿង​ម៉ាក់​អូន​ឌី ស្ថិតនៅ​ខណ្ឌ​ច្បារអំពៅ រាជធានី​ភ្នំពេញ​។ ម្ចាស់​សិប្បកម្ម​វ័យ ២៧​ឆ្នាំ​រូបនេះ បាន​ប្រាប់​សារព័ត៌មាន ThmeyThmey25 ថា ការចាប់ផ្ដើម​សិប្បកម្ម​ដំបូង​មាន​ដើមទុន​ត្រឹម ១០​ម៉ឺន​រៀល​ប៉ុណ្ណោះ​។​បច្ចុប្បន្ន​មានការ​គាំទ្រ​ច្រើន​អាច​រក​ចំណូល​ពី ៤​ពាន់​ដុល្លារ ទៅ ៥​ពាន់​ដុល្លារ ក្នុង​មួយខែ​។

 
​ការបង្កើត​មុខរបរ ដើម្បី​រក​ចំណូល​តាម​ប្រព័ន្ធ​អន​ឡាញ ជា​គំនិត​ឆ្លាត​វៃ របស់​សហគ្រិន នាពេល​បច្ចុប្បន្ន​។ ហើយ​នេះ ក៏​ស្ថិតក្នុង​គំនិត​របស់​អ្នកស្រី សុខ ច​ន្ធូ ដែរ ដែល​បង្កើត​សិប្បកម្ម​បាយដំណើប​បំពង​គ្រឿង​ម៉ាក់​អូន​ឌី​។ «​ដំបូង​សាក​ធ្វើ​លក់​អន​ឡាញ​លេងៗ ត្រឹម​ដើមទុន​១០​ម៉ឺន​រៀល ព្រោះ​មិន​ចង់​នៅតែ​ធ្វើការ​ឲ្យ​គេ មិន​ស្មានថា ឥលូវ​មានការ​គាំទ្រ​ច្រើន​»​។ នេះ​ជាការ​លើកឡើង​របស់​អ្នកនាង សុខ ច​ន្ធូ​។​


បាយក្ដាំងដែលអ្នកស្រី ចន្ធូ រៀបផ្ញើឲ្យអតិថិជន 

​ស្ត្រី​វ័យក្មេង​រូបនេះ បាន​និយាយទៀតថា អ្វីដែល​ធ្វើ​ឲ្យ​សិប្បកម្ម​បាយក្ដាំង​របស់​អ្នកស្រី ទទួល​ការគាំទ្រ​ច្រើន​គឺ​ផ្ដោត​សំខាន់​លើ រសជាតិ និង​អនាម័យ​។ សម្រាប់​បាយក្ដាំង​ម៉ាក់​អូន​ឌី មាន​រសជាតិ​ប្លែក​ពី​បាយក្ដាំង​ដទៃ ព្រោះ​ផ្សំ​ពី​អង្ករដំណើប ៧០​ភាគរយ អង្ករខ្សាយ ៣០​ភាគរយ សាច់មាន់​ស​ម្ងួ​ត ការ​ផ្សំ​រសជាតិ​ទឹកត្រី រួម​នឹង​ការ​វេច​ខ្ចប់​។ លក្ខណៈពិសេស​នេះហើយ ធ្វើ​ឲ្យ​បាយក្ដាំង​អ្នកស្រី ច​ន្ធូ មិន​ត្រឹម​មានការ​គាំទ្រ​ច្រើន​ក្នុងស្រុក​ប៉ុណ្ណោះ​ទេ ថែមទាំង​មាន​តំណាង​ចែកចាយ​បន្តទៅ​ប្រទេស​កូរ៉េខាងត្បូង​ផងដែរ​។​
 
​នៅក្នុង​បទ​សម្ភាស​ជាមួយ​សារព័ត៌មាន ThmeyThmey25 តាម​ទូរ​សព្ទ​អ្នកស្រី សុខ ច​ន្ធូ បាន​លើកឡើងថា ការចាប់ផ្ដើម​អាជីវកម្ម​មួយ មិនចាំបាច់​ទាល់តែ​មាន​ដើមទុន​ច្រើន​នោះទេ ពិសេស​បច្ចុប្បន្ន សម្រាប់​មនុស្ស​ស្រី មិនត្រូវ​ពឹងផ្អែក​តែ​លើ​មនុស្ស​ប្រុស​នោះទេ​។ អ្នកស្រី​បន្ថែមថា​៖«​សម័យ​ហ្នឹងហើយ ជា​មនុស្ស​ស្រី កុំ​ចាំតែ​ចាយលុយ​មនុស្ស​ប្រុស ទោះ​លក់​អន​ឡាញ​ដើមទុន​តិច​ក៏ដោយ ឲ្យ​តែ​គាត់​ចង់​ធ្វើ ផ្ដោតចិត្ត​ថា​ធ្វើ​ឲ្យ​បាន និង​កុំ​បោះបង់​»​។​


រូបភាពផ្ដល់ឲ្យ

​សម្រាប់​ការងារ​គ្រប់គ្រង​សិប្បកម្ម ទោះជា​លក្ខណៈ​គ្រួសារ​ពិតមែន សម្រាប់​អ្នកស្រី សុខ ច​ន្ធូ ក៏មាន​គន្លឹះ​មួយចំនួន ដើម្បី​ឲ្យ​សិប្បកម្ម​ដំណើរការ​បានល្អ គឺ​ការរក្សា​អត្តសញ្ញាណ​ផលិតផល​របស់ខ្លួន​។ ក្នុងន័យនេះ អ្នកស្រី​ពន្យល់​យ៉ាង​ដូច្នេះ​៖«​គេ​ស្គាល់​បាយក្ដាំង​យើង ដោយសារ​រសជាតិ អ៊ីចឹង​យើង​ត្រូវ​រក្សា​គុណភាព និង​រសជាតិ របស់​បាយក្ដាំង​ឲ្យ​ដូចដើម​។ ហើយ​ត្រូវ​រក​វិធី​ធ្វើយ៉ាងណា ឲ្យ​ផលិតផល​យើង​កាន់តែ​ល្អ​»​។​
 
​ការផ្សព្វផ្សាយ​តាម​ប្រព័ន្ធ​អន​ឡាញ ធ្វើ​ឲ្យ​សិប្បកម្ម​បាយក្ដាំង របស់​អ្នកស្រី សុខ ច​ន្ធូ មានការ​គាំទ្រ​ខ្លាំង ដូច្នេះ​វា​ក៏​ជា​ឱកាស សម្រាប់​ស្ត្រី​ផ្សេងទៀត ដែល​ចង់រក​ចំណូល​បន្ថែម ពី​បណ្ដាញ​សង្គម​។ ដើម្បី​ឆ្លើយតប​នឹង​តម្រូវការ​ទីផ្សារ អ្នកស្រី ច​ន្ធូ គ្រោង​ពង្រីក​ទំហំ​សិប្បកម្ម និង​មាន​គម្រោង​លក់​ហ្វ្រេ​ន​ឆាយ បាយក្ដាំង​ម៉ាក់​អូន​ឌី នៅ​ថ្ងៃ​ខាងមុខ​។​
 
​សម្រាប់​បាយដំណើប​បំពង​គ្រឿង​ម៉ាក់​អូន​ឌី មាន​ពីរ​ទំហំ សម្រាប់​កញ្ចប់​តូច​តម្លៃ ៧ ០០០​រៀល និង​កញ្ចប់​ធំ​តម្លៃ ១៥ ០០០​រៀល ដែល​អាច​រក្សាទុក​រយៈ​ពេល ៣​ខែ ទៅ ៤​ខែ​។ បច្ចុប្បន្ន សិប្បកម្ម​របស់​អ្នកស្រី សុខ ច​ន្ធូ មាន​ផលិតផល​ដូចជា បាយក្ដាំង នំ​នុយ​បំពង បាញ់​ត្រាង និង​បន្លែ​បំពង ដែលមាន​តំណាង​ចែកចាយ​ទូទាំងប្រទេស រួមទាំង​ប្រទេស​កូរ៉េ​ផងដែរ​៕


អ្នកស្រី សុខ ចន្ធូ ម្ចាស់សិប្បកម្មបាយដំណើបបំពងម៉ាក់អូនឌី(រូបផ្ដល់ឲ្យ) 
 

 អ្នកស្រី សុខ ចន្ធូ ម្ចាស់សិប្បកម្មបាយដំណើបបំពងម៉ាក់អូនឌី(រូបផ្ដល់ឲ្យ) 
 
 
 

Tag:
 បាយក្ដាំង​
  សុខ ច​ន្ធូ
© រក្សាសិទ្ធិដោយ thmeythmey.com