ទោះបីជំងឺកូវីដ-១៩គំរាមកំហែង តែកញ្ញា អ៊ឹង មរកត នៅតែបន្តមហិច្ឆតារៀននៅបរទេស

ជាតិ

សង្គមជាតិ

ទោះបីជំងឺកូវីដ-១៩គំរាមកំហែង តែកញ្ញា អ៊ឹង មរកត នៅតែបន្តមហិច្ឆតារៀននៅបរទេស

08, Mar 2021 , 7:59 am

រូបភាព

រូបកញ្ញា អ៊ឹង មរកត អតីតនិស្សិតផ្នែកបុរាណវិទ្យា នៅមហាវិទ្យាល័យបុរាណវិទ្យា បានជាប់អាហារូបករណ៍ផ្នែកប្រវត្តិសិល្បៈអាស៊ីអាគ្នេយ៍នៅប្រទេសអង់គ្លេស

ដោយ:

ភ្នំពេញ៖ បច្ចុប្បន្នទំហំនៃការរាតត្បាតកូវីដ-១៩ជុំវិញពិភពលោកមិនទាន់ស្រាកស្រាន្តនៅឡើយទេ។ ទោះបីពិភពលោកស្ថិតនៅក្នុងស្ថានភាពបែបនេះក្តី ក៏និស្សិត អ៊ឹង មរកត អតីតនិស្សិតផ្នែកបុរាណវិទ្យានៅមហាវិទ្យាល័យបុរាណវិទ្យា នៅតែមិនបោះបង់ក្តីស្រមៃ ដែលចង់ទៅសិក្សានៅក្រៅប្រទេសឡើយ។

កញ្ញា អ៊ឹង មរកត អតីតនិស្សិតផ្នែកបុរាណវិទ្យានៅមហាវិទ្យាល័យបុរាណវិទ្យា ទើបតែបានប្រឡងជាប់អាហារូបករណ៍ថ្នាក់សញ្ញាបត្រប្រវត្តិសិល្បៈអាស៊ីអាគ្នេយ៍នៅចក្រភពអង់គ្លេសកាលពីខែកុម្ភៈ ឆ្នាំ២០២១។ អាហារូបករណ៍នេះជាបំណងប្រាថ្នារបស់និស្សិតដែលមានវ័យ២៥ឆ្នាំរូបនេះ។

និស្សិតដែលមានស្រុកកំណើតនៅរាជធានីភ្នំពេញរូបនេះបានរៀបរាប់ប្រាប់អ្នកសារព័ត៌មានថ្មីៗតាមទូរសព្ទដូច្នេះថា៖«ពីព្រោះមិនដឹងថាពេលណាទើបវិបត្តិកូវីដ-១៩នេះសាបរលាបទៅវិញនោះទេ។ បរិបទកូវីដ-១៩មិនមែនជាឧបសគ្គរាំងស្ទះក្នុងការសិក្សា និងសម្រេចគោលបំណងរបស់ខ្ញុំនោះទេ។ យើងនៅតែបន្តការសិក្សាបានតាមរយៈការសិក្សាពីចម្ងាយ និងការសម្របខ្លួនរៀនរស់នៅតាមបែបគន្លងថ្មី»។

ការចាកចេញទៅសិក្សានៅប្រទេសអង់គ្លេសរបស់កញ្ញា អ៊ឹង មរកត មិនទាន់អាចកំណត់ថាកញ្ញានឹងទៅសិក្សានៅទីនោះនៅពេលណានៅឡើយទេ។

ថ្វីដ្បិតកញ្ញាមរកត នៅមានពេលដ៏យូរទៀតទើបដល់ទាន់ពេលដែលត្រូវចាកចេញមាតុភូមិខ្លួនទៅសិក្សានៅអង់គ្លេស ប៉ុន្តែកញ្ញាត្រូវរៀនបំប៉នភាសាអង់គ្លេសរយៈពេលបន្ថែមរយៈពេល៤ខែសិន។

ទោះបីខ្លួនមិនទាន់បានសិក្សានៅទីនោះក្តី ប៉ុន្តែមរកតអះអាងថាខ្លួននឹងយកចំណេះជំនាញពីបរទេសត្រឡប់មកអភិវឌ្ឍប្រទេសកម្ពុជាវិញ។ កញ្ញា មរកត បានថ្លែងប្រាប់ដូច្នេះថា៖«ខ្ញុំនឹងយកចំណេះដឹងដែលរៀនសូត្របាន រួមទាំងបទពិសោធន៍ដែលទទួលបានមកប្រើប្រាស់ក្នុងវិស័យខ្លួនវិញ តាមរយៈការចូលរួមជាកិច្ចការងារផ្សេងៗ ដូចជាការស្រាវជ្រាវ បោះពុម្ពផ្សាយ និងចែករំលែកអំពីអ្វីដែលខ្ញុំនឹងទទួលបានពីទីនោះ មកអភិវឌ្ឍប្រទេសកម្ពុជាឲ្យកាន់តែរីកចម្រើន»។

បច្ចុប្បន្ននេះ និស្សិតដែលត្រូវសិក្សាបន្តនៅបរទេសនោះ ត្រូវពន្យារពេលសិក្សា ពីសំណាក់ប្រទេសសាមីនីមួយៗ។ កាលពីឆ្នាំ២០២០ មាននិស្សិតជាង៤០០នាក់ ដែលត្រូវសិក្សានៅបរទេស តាមរយៈកម្មវិធីក្រសួងអប់រំ យុវជន និងកីឡា មិនទាន់បានចេញទៅសិក្សាតាមគម្រោងឡើយ។

តែយ៉ាងណាសម្ដេចនាយករដ្ឋមន្ត្រី ហ៊ុន សែន បានប្រកាសក្នុងសន្និសីទកាសែត ក្រោយចាក់វ៉ាក់សាំងបង្ការជំងឺកូវីដ-១៩ កាលពីថ្ងៃទី៤ មីនា ដោយផ្ដល់អាទិភាពដល់និស្សិតរៀនបន្តនៅក្រៅប្រទេស អាចចាក់វ៉ាក់សាំងផងដែរ ដើម្បីអាចឱ្យពួកគេមានឱកាសចេញទៅសិក្សានៅប្រទេសក្រៅ៕