COVID-19
ជាតិ
វិជ្ជមានកូវីដ-១៩ ចំនួន២៤នាក់ទៀត ដែលនាំកម្ពុជាឡើងដល់ជាង១០០០ករណី លោក គួច ចំរើន អភិបាលខេត្តព្រះសីហនុ បង្ហាញទិដ្ឋភាពស្ងប់ស្ងាត់តាមផ្លូវនៅក្នុងខេត្ត ដោយពលរដ្ឋជាច្រើនត្រូវអនុវត្តវិធានចត្តាឡីស័ក។
× មនុស្សចំនួន២៤នាក់ទៀត មានលទ្ធផលតេស្តវិជ្ជមានកូវីដ-១៩ ដែលពាក់ព័ន្ធនឹងព្រឹត្តិការណ៍២០កុម្ភៈ។ គិតមកដល់ពេលនេះ កម្ពុជាមានអ្នកកើតកូវីដ-១៩សរុប១០១១ករណី ដោយករណីសហគមន៍២០កុម្ភៈ មាន៥០១នាក់ ភាគច្រើនជាជនជាតិចិន ខ្មែរ និងវៀតណាម នៅរាជធានីភ្នំពេញ ខេត្តព្រះសីហនុ ខេត្តកណ្តាល ហើយបន្តរាលដាលដល់ស្វាយរៀង កោះកុង កំពង់ធំ ព្រៃវែង និងកំពង់ចាម។
ក្នុងចំណោមករណីថ្មីទាំង២៤ មាន១២នាក់នៅរាជធានីភ្នំពេញ (វៀតណាម៥, ចិន៣, ខ្មែរ៤) ចិន៧នាក់នៅខេត្តព្រះសីហនុ ៣នាក់នៅខេត្តកណ្តាល (ចិន២, ខ្មែរ១) ស្ត្រីខ្មែរ១នាក់នៅកំពង់ធំ និងបុរសខ្មែរ១នាក់ជាករណីដំបូងនៅកំពង់ចាម។
បើតាមក្រសួងសុខាភិបាល អ្នកជំងឺ១នាក់នៅព្រៃវែង និង១នាក់នៅកណ្តាល ដែលត្រូវបានប្រកាសកាលពីម្សិលមិញ បានប្តូរទៅព្យាបាលនៅមន្ទីរពេទ្យមិត្តភាពខ្មែរសូវៀតវិញ។ ជាមួយគ្នា ករណីសះស្បើយមាន៧នាក់បន្ថែមទៀតដែលជាករណីសហគមន៍២០កុម្ភៈទាំងអស់ ក្នុងនោះមានខ្មែរ៤នាក់ និងចិន៣នាក់។
មកដល់ពេលនេះ កម្ពុជាមានករណីកូវីដ-១៩សរុប១០១១ករណី ដោយ៥០១ករណីពាក់ព័ន្ធសហគមន៍២០កុម្ភៈ។ អ្នកសះស្បើយមាន៥១៧ករណី ក្នុងនោះអ្នកជំងឺព្រឹត្តិការណ៍២០កុម្ភៈ មានចំនួន៣១នាក់ដែលត្រូវបានអនុញាតឲ្យចេញពីមន្ទីរពេទ្យ៕
© រក្សាសិទ្ធិដោយ thmeythmey.com