រដ្ឋមន្ត្រីការបរទេសចិន វ៉ាង យី នៅថ្ងៃទី៧ ខែមីនា ព្រមានអាមេរិកឱ្យឈប់លូកលាន់ចូលកិច្ចការផ្ទៃក្នុងរបស់ចិន។ នេះជាព្រមានដោយត្រង់ៗទៅអាមេរិកជាលើកទីមួយបន្ទាប់ពីលោកចូ បៃឌិនកាន់តំណែងប្រធានាធិបតីអាមេរិក។ បន្ថែមពីនេះ លោកថា អាមេរិក មានទំនួលខុសត្រូវក្នុងការស្រោចស្រង់នូវទំនាក់ទំនងទ្វេភាគីដែលខូចខាតក្នុងរយៈពេល៤ឆ្នាំចុងក្រោយ។
ថ្លែងក្នុងសន្និសីទសារព័ត៌មានអំឡុងកិច្ចប្រជុំនៃសភាប្រជាជនចិន នាថ្ងៃទី៧ ខែមីនា លោក វ៉ាង យី បានរិះគន់អាមេរិកដែលនៅតែមានចេតនាជ្រៀតជ្រែកចូលកិច្ចការផ្ទៃក្នុងនៃប្រទេសដទៃក្នុងនាមលទ្ធិប្រជាធិបតេយ្យ និងសិទ្ធិមនុស្ស។ រដ្ឋមន្ត្រីការបរទេសចិនរូបនេះ លើកឡើងថា គោលនយោបាយបែបនេះរបស់អាមេរិកបង្កបញ្ហាជាច្រើនក្នុងពិភពលោក ហើយនៅពេលខ្លះទៀតបង្កជារឿងរង្គោះរង្គើ និងជម្លោះផងដែរ។
ក្នុងសន្និសីទសារព័ត៌មានជិត២ម៉ោង លោក វ៉ាង លើកឡើងបញ្ហាជាច្រើនដូចជាសកម្មភាពនៃគោលនយោបាយការបរទេសចិន និងច្រានចោលការរិះគន់លើបញ្ហាហុងកុង តំបន់ស៊ីនជាំង តៃវ៉ាន់ និងបញ្ហាចម្រូងចម្រាស់ដទៃទៀត។ លោក វ៉ាង ដែលជាទីប្រឹក្សារដ្ឋចិន ក៏មិនភ្លេចលើកឡើងឡើយពីទំនាក់ទំនង និងកិច្ចសហប្រតិបត្តិការរវាងចិន និងអាមេរិក។
«វាជាសង្ឃឹមមួយដែលអាមេរិក និងចិនជួបគ្នានៅពាក់កណ្តាលផ្លូវ និងលុបចោលការរឹតត្បិតដែលមិនសក្តិសម ដែលបានដាក់ទៅលើទំនាក់ទំនងអាមេរិក-ចិន និងឈប់បង្កើតឧបសគ្គសិប្បនិម្មិតអ្វីទៀត»។ នេះជាការលើកឡើងរបស់លោក វ៉ាង។
ប្រមុខការទូតចិន ទទូចឱ្យអាមេរិក លុបចោលឧបសគ្គទាំងឡាយដែលរារាំងកិច្ចសហប្រតិបត្តិការទ្វេភាគី ហើយចិនត្រៀមខ្លួនជាស្រេចក្នុងការធ្វើការជាមួយអាមេរិកលើបញ្ហាអាកាសធាតុ ការស្រោចស្រង់សេដ្ឋកិច្ច និងការឆ្លើយតបទៅនឹងជំងឺកូវីដ-១៩។ លោកក៏ប្រាប់ឱ្យអាមេរិកពិចារណាពីរឿងនេះ បើពុំដូច្នេះទេពិភពលោកនឹងបន្តមានអស្ថិរភាព។
ទីប្រឹក្សារដ្ឋចិន ក៏សង្កត់ធ្ងន់ផងដែរថា ការធ្វើឱ្យប្រសើរឡើងវិញទំនាក់ទំនងរវាងអាមេរិក និងចិន ជាបន្ទុករបស់វ៉ាស៊ីនតោន ដ្បិតអីការខូចខាតកើតឡើងអំឡុងពេល៤ឆ្នាំមកនេះ បង្កដោយលោកអតីតប្រធានាធិបតីដូណាល់ ត្រាំ។
ចំពោះរឿងដែនដីតៃវ៉ាន់ ដែលសំណុំរឿងដ៏ចម្រូងចម្រាស់រវាងប៉េកាំង និងវ៉ាស៊ីនតោនវិញ លោកវ៉ាងទាមទារឱ្យប្រធានាធិបតីបៃឌិន លុបចោលសកម្មភាពទាំងឡាយដែលគាំទ្រកោះនេះ និងចាត់ទុកជាគោលនយោបាយមួយដ៏គ្រោះថ្នាក់។ សម្រាប់ចិន លោក វ៉ាង សង្កត់ធ្ងន់ថា តៃវ៉ាន់ជាបន្ទាត់ក្រហមដែលអាមេរិកមិនអាចដើរកាត់ឡើយ។
ថ្លែងទៅកាន់អ្នកកាសែតទាក់ទងទំនាក់ទំនងជាមួយអាមេរិក លោក វ៉ាង ក៏ទទួលស្គាល់ពីលក្ខណៈប្រកួតប្រជែងរបស់អាមេរិក និងចិនក្នុងប្រព័ន្ធអន្តរជាតិ។ លោកបន្ថែមថា ចិន និងអាមេរិកចៀសមិនផុតពីការប្រកួតប្រជែងឡើយព្រោះវាជាធាតុមួយនៃទំនាក់ទំនងរវាងប្រទេសទាំងពីរ។ ប៉ុន្តែលោករំឭកថា ការប្រកួតប្រជែងត្រូវតែធ្វើឡើងដោយស្មើភាព និងយុត្តិធម៌ដើម្បីធ្វើឱ្យប្រសើរឡើងសម្រាប់ប្រទេសទាំងពីរ។
ថ្លែងក្នុងឱកាសដាក់ចេញនូវគោលនយោបាយសន្តិសុខជាតិនាថ្ងៃទី៣ មីនា លោក អាន់តូនី ប្ល៊ីងខិន រដ្ឋមន្ត្រីការបរទេសអាមេរិកហៅទំនាក់ទំនងជាមួយចិន ថា មានលក្ខណៈប្រកួតប្រជែងផង មានកិច្ចសហប្រតិបត្តិការផង ហើយពេលខ្លះអាចឈានដល់ចំណុចជាសត្រូវនឹងគ្នាផង និងអះអាងថា ចិនជាវិញ្ញាសាភូមិសាស្ត្រនយោបាយដ៏ធំបំផុតសម្រាប់អាមេរិក៕