COVID-19
ជាតិ
អ្នកឆ្លងកូវីដ-១៩ថ្មី មាន៤៩នាក់ទៀតនៅភ្នំពេញ ព្រះសីហនុ កណ្តាល និងព្រៃវែង ទីតាំងចត្តាឡីស័កមួយនៅខេត្តព្រះសីហនុ។ រូបរដ្ឋបាលខេត្ត
× ក្រសួងសុខាភិបាលនាព្រឹកថ្ងៃអង្គារ ទី៩ ខែមីនា នេះ បានប្រកាសពីការរកឃើញអ្នកកើតកូវីដ-១៩ ចំនួន៤៩នាក់បន្ថែមទៀត ដែលក្នុងនោះមាន៤៨ នាក់ពាក់ព័ន្ធករណីសហគមន៍២០កុម្ភៈ។ សរុបមកដល់ពេលនេះ ករណីកូវីដ-១៩នៅកម្ពុជាឡើងដល់១០៦០នាក់ ដោយ៥៤៩នាក់ជាករណីសហគមន៍២០កុម្ភៈ ដែលបានរាលដាលចេញពីភ្នំពេញ ដល់ខេត្តកណ្តាល ព្រះសីហនុ បន្តដល់ស្វាយរៀង កោះកុង ព្រៃវែង កំពង់ធំ និងកំពង់ចាម។
ករណី១ដែលមិនពាក់ព័ន្ធនឹងសហគមន៍២០កុម្ភៈ មានអ្នកជំងឺជាបុរសជនជាតិលីប៊ីអាយុ៥០ឆ្នាំ ដែលមកពីប្រទេសខ្លួន បន្តហោះហើរតាមកូរ៉េខាងត្បូង និងមកដល់កម្ពុជានៅថ្ងសទី៧ ខែមីនា។ អ្នកដំណើរ៩៦នាក់ទៀតកំពុងធ្វើចត្តាឡីស័ក។
រីឯករណីសហគមន៍២០កុម្ភៈ ចំនួន៤៨ករណី មាន២៣នាក់នៅភ្នំពេញ (ចិន១៥នាក់ ខ្មែរ៨នាក់) ១២នាក់នៅខេត្តព្រះសីហនុ (ចិនទាំងអស់) ១១នាក់នៅព្រៃវែង (ខ្មែរទាំងអស់) និង២នាក់នៅកណ្តាល (ចិន១នាក់ ឥណ្ឌូណេស៊ី១នាក់)។
ជាមួយគ្នានេះ ករណីសះស្បើយថ្មីមាន២១នាក់បន្ថែមទៀត ដោយ២០នាក់ពាក់ព័ន្ធព្រឹត្តិការណ៍សហគមន៍២០កុម្ភៈ (១១នាក់ចេញពីមន្ទីរពេទ្យបង្អែកខេត្តព្រះសីហនុ ៦នាក់ចេញពីមណ្ឌលកំចាត់ជំងឺរបេង និងហង់សិន ២នាក់ចេញពីពេទ្យជ័យជម្នះខេត្តកណ្តាល និង១នាក់ចេញពីពេទ្យមិត្តភាពខ្មែរសូវៀត។ រីឯ១នាក់ទៀតជាបុរសជនជាតិស្វីសអាយុ៦២ឆ្នាំ ជាករណីអ្នកដំណើរពីបរទេស ដោយគាត់ត្រូវបានអនុញ្ញាតឲ្យចាកចេញពីមន្ទីរពេទ្យមិត្តភាពខ្មែរសូវៀត។
កាលពីរាត្រីថ្ងៃទី៨ ខែមីនា សម្តេចនាយករដ្ឋមន្ត្រី ហ៊ុន សែន បានចេញសារបន្ទាន់មួយដោយអំពាវនាវឲ្យស្ថាប័នរដ្ឋ និងឯកជន ផ្អាករាល់ការជួបជុំដែលមិនមានការចាំបាច់ ខណៈករណីកូវីដ-១៩ កាន់តែរាលដាលខ្លាំង។ សម្តេចបានអះអាងថា ករណីឆ្លងនេះ បានរាលដាលចូលដល់ជួរមន្ត្រីរាជការ ក្របខណ្ឌនគរបាលជាតិ និងសិល្បករ សិល្បការិនី។
© រក្សាសិទ្ធិដោយ thmeythmey.com