COVID-19
ជាតិ
COVID-19៖ វិជ្ជមាន៦៤នាក់ទៀត ខណៈករណី២០កុម្ភៈរាលដាលដល់សៀមរាប លោកស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល នាសន្និសីទសារព័ត៌មានកន្លងមក
× ក្រសួងសុខាភិបាលនាព្រឹកពុធថ្ងៃ ទី៩ ខែមីនា នេះ បានប្រកាសពីការរកឃើញអ្នកកើតកូវីដ-១៩ ចំនួន៦៤នាក់បន្ថែមទៀត ដែលពាក់ព័ន្ធករណីសហគមន៍២០កុម្ភៈ។ សរុបមកដល់ពេលនេះ ករណីកូវីដ-១៩នៅកម្ពុជាឡើងដល់១១២៤នាក់ ដោយ៦១៣នាក់ជាករណីសហគមន៍២០កុម្ភៈ ដែលបានរាលដាលចេញពីភ្នំពេញ ដល់ខេត្តកណ្តាល ព្រះសីហនុ បន្តដល់ស្វាយរៀង កោះកុង ព្រៃវែង កំពង់ធំ កំពង់ចាម ហើយបន្តដល់សៀមរាប។ ករណីឆ្លង៦៤នាក់នៅថ្ងៃនេះ ជាករណីឆ្លងប្រចាំថ្ងៃដ៏ច្រើនបំផុត ដូចកាលពីថ្ងៃទី២៥ ខែកុម្ភៈ។
ក្នុងចំណោមករណីទាំង៦៤ មាន៣០ករណីនៅកណ្តាល ២៦ករណីនៅភ្នំពេញ ៥ករណីនៅព្រៃវែង ២ករណីនៅខេត្តព្រះសីហនុ ១ករណីសៀមរាប។
នៅខេត្តកណ្តាលដែលមានដល់ទៅ៣០ករណី អ្នកជំងឺជាជនជាតិខ្មែរ និងចិន ដោយភាគច្រើនមានអាសយដ្ឋាននៅឃុំពាមឧកញ៉ាអុង ឃុំអរិយក្សត្រ ស្រុកល្វាឯម, និងនៅភូមិជ្រៃធំ ឃុំសំពៅពូន ស្រុកកោះធំ។
២៦ករណីនៅរាជធានីភ្នំពេញ មានអ្នកជំងឺជាជនជាតិខ្មែរ ចិន និងវៀតណាម ដោយភាគច្រើនមានអាសយដ្ឋាននៅសង្កាត់អូឡាំពិក ខណ្ឌបឹងកេងកង សង្កាត់គោកឃ្លាំង ខណ្ឌសែនសុខ និងបណ្តាសង្កាត់ជាច្រើនទៀត។
៥ករណីនៅព្រៃវែង សុទ្ធតែស្ថិតក្នុងស្រុកពាមរក៍ ដោយមានខ្មែរ៤នាក់ និងវៀតណាម១នាក់។ ២នាក់នៅខេត្តព្រះសីហនុជាបុរសជនជាតិចិន រីឯករណីសហគមន៍ដំបូងនៅសៀមរាប ជាស្ត្រីអាយុ៣២ឆ្នាំ នៅភូមិព្រៃវែង ឃុំសំរោងយា ស្រុកពួក។
ជាមួយគ្នានេះ ក្រសួងបានប្រកាសពីករណីជាសះស្បើយ១១នាក់ដែលពាក់ព័ន្ធនឹងព្រឹត្តិការណ៍សហគមន៍២០កុម្ភៈក្នុងនោះមានចិន៨នាក់ វៀតណាម២នាក់ និងខ្មែរ១នាក់។
សរុបមកដល់បច្ចុប្បន្ន កម្ពុជាមានអ្នកឆ្លងកូវីដ-១៩ ចំនួន១១២៤ករណី ក្នុងនោះ៦១៣ករណីពាក់ព័ន្ធសហគមន៍២០កុម្ភៈ។ អ្នកសះស្បើយមាន៥៤៩នាក់៕
© រក្សាសិទ្ធិដោយ thmeythmey.com