លោក ជា វ៉ាន់ដេត បានបញ្ជាក់នៅក្នុងវីដេអូខ្លីមួយរបស់ខ្លួនដែលមានរយៈពេលប្រមាណ២នាទីកន្លះ ថា ការរំលោភបំពាន តាមបណ្តាញអ៊ីនធឺណែតចំពោះកុមារមានសន្ទុះកើនឡើងកាន់តែខ្លាំង នៅទូទាំងសាកលលោក  ខណៈការឆ្លងរាលដាលនៃជំងឺកូវីដ-១៩ នៅកម្ពុជា ក៏ដូចនៅក្នុងពិភពលោក បានតម្រូវឱ្យកុមាររៀនសូត្រពីចម្ងាយដោយប្រើប្រាស់នូវប្រព័ន្ធអ៊ីនធឺណែតជាប្រចាំ។ 

 

 

ដើម្បីធានាបានថា ការតភ្ជាប់ និងការប្រើប្រាស់បច្ចេកវិទ្យានាំមកនូវផលវិជ្ជមានប្រកបទៅដោយសុវត្ថិភាពចំពោះកុមារកម្ពុជានោះ ក្រសួងប្រៃសណីយ និងទូរគមនាគមន៍ បានរៀបចំយុទ្ធនាការណ៍មួយដែលមានឈ្មោះថា«គិតគូរកូន» ជាភាសាបរទេស «KIT KOU KON» ដើម្បីជួយផ្តល់ព័ត៌មានដល់ឪពុកម្តាយ អាណាព្យាបាល គ្រូបង្រៀន និងសាធារណជន ក្នុងការការពារកុមារឱ្យចៀសផុតពីហានិភ័យនានា លើប្រព័ន្ធអនឡាញ។ 

 

លោករដ្ឋមន្ត្រីក្រសួងប្រៃសណីយ៍រូបនេះ  បានអំពាវនាវដល់ឪពុកម្តាយ អាណាព្យាបាល គ្រូបង្រៀន សូមតាមដានទំព័រហ្វេសប៊ុកឈ្មោះ«គិតគូរកូន» និងទំព័រហ្វេសប៊ុកក្រសួងប្រៃសណីយ៍ និងទូរគមនាគមន៍  ដើម្បីទទួលបានចំណេះដឹងជាមូលដ្ឋានបន្ថែមទៀត ក្នុងការការពារកូនលោក-អ្នក ពីការរំលោភបំពាននានាតាមប្រព័ន្ធអនឡាញ៕