ក្រុមរបស់លោក Klopp បានរងបរាជ័យក្នុងដី៦ប្រកួតជាប់ៗគ្នាដ៏មិនគួរឱ្យជឿ ដែលធ្វើឱ្យហង្សក្រហមធ្លាក់ទៅចំណាត់ថ្នាក់លេខ៨ក្នុងតារាង Premier League និងប្រឈមមិនបានលេង Champions League រដូវកាលក្រោយ។
 

ស្របពេលម្ចាស់ការពារតំណែងជើងឯកកំពុងដុនដាមខ្លាំង Gerrard ឯណោះវិញបានដឹកនាំ Rangers ឱ្យក្លាយជាជើងឯកលីគកំពូលស្កុតឡែនជាលើកដំបូងក្នុងរយៈពេល១០ឆ្នាំ ដែលនេះបាននាំឱ្យមានការលើកឡើងថារូបគេអាចនឹងឡើងទៅគ្រប់គ្រង Liverpool នាពេលអនាគត។
 

បើទោះជាមានការលើកឡើងបែបនេះក្តី ប៉ុន្តែអតីតប្រធានក្រុមហង្សក្រហម វ័យ៤០ឆ្នាំបានប្រាប់ទូរទស្សន៍ ITV ថាមិនទោះជាលោកចង់ ក៏អ្នកគាំទ្រ Liverpool មិនចង់ឱ្យខ្លួនធ្វើជាអ្នកគ្រប់គ្រងនៅពេលនេះដែរ។
 

«ពួកគេចង់ឱ្យលោក Jurgen Klopp បន្តធ្វើជាអ្នកចាត់ការ Liverpool ហើយខ្ញុំពិតជាគាំទ្រពួកគេ។ យើងមិនគួរនិយាយអំពីរឿងនេះទេ។ យើងមានអ្នកចាត់ការទូទៅម្នាក់ដ៏ល្អដើម្បីដឹកនាំក្រុមហើយ។ ខ្ញុំពេញចិត្ត និងស្រឡាញ់ការដឹកនាំរបស់គាត់»។ Gerrard អះអាងដូច្នេះ មុនបន្ថែមថាលោកពិតជាចង់ឱ្យ Klopp បន្តនឹងស្នាក់នៅជាមួយ Liverpool ក្នុងរយៈពេលជាច្រើនឆ្នាំទៅមុខទៀត។
 

ស្របពេលគ្នានេះ អ្នកចាត់ការសញ្ជាតិអាល្លឺម៉ង់ វ័យ៥៣ឆ្នាំ ក៏ទើបប្រកាសពីការសម្រេចចិត្តមិនទៅដឹកនាំក្រុមឥន្ទ្រីដែក ជំនួសលោក Joachim Low ដែលនឹងចេញពីតំណែងនេះក្រោយ Euro 2020 នោះដែរ។ Klopp ដែលជួយ Liverpool ឈ្នះពាន Champions league និង Premier League ប្តេជ្ញាថានឹងមិនចេញពី Anfield នៅមុនកិច្ចសន្យារបស់លោកនៅឆ្នាំ ២០២៤ ឡើយ៕