បន្ទាប់ពីរដ្ឋប្រហារយោធាថ្ងៃទី១ ខែកុម្ភៈ អង្គការក្រៅរដ្ឋាភិបាលមួយចំនួន និងក្រុមប្រឹក្សាសិទ្ធិមនុស្សអង្គការសហប្រជាជាតិ បានអំពាវនាវទៅក្រុមប្រឹក្សាសន្តិសុខនៃអង្គការសហប្រជាជាតិ និងប្រទេសជាដៃគូលក់អាវុធឱ្យមីយ៉ាន់ម៉ាផ្សេងទៀត ដាក់ទណ្ឌកម្មលើរបបសឹកមីយ៉ាន់ម៉ា។ កូរ៉េខាងត្បូង នៅថ្ងៃទី១២ ខែមីនា បានប្រកាសសម្រេចចិត្តចាត់វិធានការប្រឆាំងរបបយោធា។

 

ក្នុងសេចក្ដីថ្លែងការណ៍របស់ខ្លួន ក្រសួងការបរទេសកូរ៉េខាងត្បូង ប្រកាសថា ទីក្រុងសេអ៊ូលនឹងផ្អាកការផ្លាស់ប្តូរទៅវិញទៅមកលើវិស័យការពារជាតិ និងហាមឃាត់នាំចេញអាវុធទៅប្រទេសអាស៊ីគ្នេយ៍មួយនេះ ថែមទៀត។ ទន្ទឹមនេះ រដ្ឋាភិបាលកូរ៉េខាងត្បូង ក៏សម្រេចរឹតត្បិតលើការនាំចេញឧបករណ៍យុទ្ធសាស្រ្តមួយចំនួន និងអនុញ្ញាតឱ្យជនជាតិមីយ៉ាន់ម៉ាបន្តស្នាក់នៅកូរ៉េខាងត្បូងផងដែរ រហូតដល់ស្ថានភាពមានភាពធូរស្បើយ។ នេះបើតាមការចុះផ្សាយរបស់ទីភ្នាក់ងារព័ត៌មានYonhap ។ 

 

បើតាមក្រសួងការបរទេសកូរ៉េខាងត្បូង ការសម្រេចចិត្តរបស់ខ្លួន ធ្វើឡើងបន្ទាប់ពីរដ្ឋាភិបាលយោធាមីយ៉ាន់ម៉ា មិនស្តាប់តាមការអំពាវនាវរបស់សហគមន៍អន្តរជាតិ និងរដ្ឋាភិបាលទីក្រុងសេអ៊ូល ស្របពេលចំនួនអ្នករងគ្រោះនៅតែបន្តកើនឡើង ដោយសារតែការបង្រ្កាបរបស់ក្រុមកម្លាំងសន្តិសុខ។ 

 

មិនត្រឹមតែប៉ុណ្ណោះ រដ្ឋាភិបាលកូរ៉េខាងត្បូង នឹងពិចារណាលើកិច្ចសហប្រតិបត្តិការអភិវឌ្ឍលើវិស័យមួយចំនួនជាមួយមីយ៉ាន់ម៉ាផងដែ។ ការបណ្ដុះបណ្ដាលយោធា និងប៉ូលិស នឹងត្រូវផ្អាក ជំនួយទៅរដ្ឋាភិបាលនឹងត្រូវផ្អឹបទុកដូចគ្នា ប៉ុន្តែគម្រោងដែលជួយលើស្ទួយជីវភាពប្រជាជនមីយ៉ាន់ម៉ា និងជំនួយមនុស្សធម៌ ត្រូវរក្សាទុកនៅដដែល។ 

 

ដោយផ្អែកតាមទិន្នន័យអង្គការគំនិតផ្តួចផ្តើមតម្លាភាពជំនួយអន្តរជាតិ ការនាំចេញលើវិស័យការពារជាតិពីកូរ៉េខាងត្បូងទៅមីយ៉ាន់ម៉ាចុងក្រោយ គឺនៅឆ្នាំ២០១៩។ កូរ៉េខាងត្បូងបានចំណាយថវិកាជាច្រើនលានដុល្លារលើគម្រោងអភិវឌ្ឍន៍នៅមីយ៉ាន់ម៉ាផងដែរ។ 

 

គួររំលឹកថា កន្លងមកអាមេរិក ក៏បានហាមឃាត់នាំចេញលើប្រភេទអាវុធជាក់លាក់មួយចំនួន ទៅមីយ៉ាន់ម៉ាផងដែរ ខណៈពេលនូវែលសេឡង់ បានផ្អាកទស្សនកិច្ចកម្រិតខ្ពស់ជាមួយរបបសឹកទៀតផង៕