ដោយ៖ ប៉ូ សុភា
 

 

 

ឈើហូបផ្លែដូចជា ខ្នុរ មៀន ស្វាយ ទៀបស្វិត ទៀបបារាំង ព្នៅ ស្ពឺ កន្ទួត ត្របែក ត្នោត ក្រូចឆ្មារ ទ្រលឹងទឹង ក្រខុប ល្ហុង ប័រ ល្វា ព្រីង ជាដើម សរុបប្រមាណជាង៥០ប្រភេទ ត្រូវបានដាំក្នុងបរិវេណសាកលវិទ្យាល័យភូមិន្ទវិចិត្រសិល្បៈ ដែលមានផ្ទៃដីជាង១ម៉ឺនម៉ែត្រក្រឡា កណ្ដាលរាជធានីភ្នំពេញ។ 
 

លោក ហេង សុផាឌី សាកលវិទ្យាធិការនៃសាកលវិទ្យាល័យភូមិន្ទវិចិត្រសិល្បៈ បានថ្លែងប្រាប់សារព័ត៌មានថ្មីៗ២៥ថា នៅក្នុងសាលានេះ មានដើមឈើខ្លះមានអាយុកាលយូរឆ្នាំណាស់ហើយ។ ចំពោះការដាំដើមឈើចម្រុះ ក៏ដូចជាឈើហូបផ្លែនៅក្នុងសាលារចនា លោក ហេង សុផាឌី ថាគេដាំដើម្បីជួយដល់បរិស្ថាន ផ្ដល់ជាម្លប់ឱ្យសិស្សក្នុងការស្វ័យសិក្សាក្នុងបរិវេណសាលា។
 

លោក ហេង សុផាឌី បានបញ្ជាក់ថា៖«ក្នុងចំណោមដើមឈើហូបផ្លែទាំងអស់ មានតែដើមល្វាទេ ដែលមានអាយុកាលវែងជាងគេ ប៉ុន្តែលោកមិនដឹងថា គេដាំក្នុងឆ្នាំណានោះឡើយ។ ដើមឈើខ្លះមានអាយុច្រើន ហើយដើមឈើខ្លះទៀត លោកគ្រូអ្នកគ្រូ និងសិស្សនិស្សិត គាត់បានដាំ។ ប៉ុន្តែដើមឈើកម្រមួយចំនួន យើងដាំដើម្បីឱ្យសិស្សបានស្គាល់ ព្រោះវាមានតែនៅក្នុងមុខវិទ្យាសិក្សា តែមិនសូវមានដាំច្រើន»៕