អតីតសមាជិកក្រុមជម្រើសជាតិជប៉ុន វ័យ៣៤ឆ្នាំ មិនមានក្លិបលេងឡើងចាប់តាំងពីរូបគេចាកចេញពីក្រុម Botafogo របស់ប្រេស៊ីលកាលពីចុងឆ្នាំ២០២០។ អ្វីដែលគួរភ្ញាក់ផ្អើលនោះ Honda បានចូលរួមជាមួយ Portimonense ប៉ុន្តែបានចែកផ្លូវគ្នាវិញក្រោយចុះកិច្ចសន្យាបានតែរយៈពេល៥ថ្ងៃ ដោយសារក្រុមនៃលីគកំពូលព័រទុយហ្គាល់មួយនេះមិនអាចចុះឈ្មោះរូបគេឱ្យបានទាន់ពេលវេលា។
 

បើតាមការផ្សាយរបស់កាសែត Kyodo អ្នកចាត់ការទូទៅក្រុមរហស្សនាមគោព្រៃកម្ពុជា និងជាកីឡាករជប៉ុនតែមួយគត់ដែលរកគ្រាប់បាល់បាននៅ World Cup ៣ព្រឹត្តិការណ៍ផ្សេងគ្នា នឹងពាក់អាវលេខ៤ សម្រាប់ក្លិបថ្មី Neftci PFK ដែលមានមូលដ្ឋានក្នុងក្រុងបាគូ ប្រទេសអាស៊ែបៃហ្សង់។
 

Neftci PFK ជាក្លិបទី១០ របស់ Honda ខណៈអាស៊ែបៃហ្សង់នឹងក្លាយជាប្រទេសទី៧ ក្រៅពីជប៉ុន ដែលអតីតតារាឆ្នើមរបស់ AC Milan ទៅប្រកបអាជីពជាកីឡាបាល់ទាត់ បន្ទាប់ពីធ្លាប់លេងនៅហូឡង់ រុស្ស៊ី អ៊ីតាលី ម៉ិកស៊ិក អូស្រ្តាលី និងប្រេស៊ីល៕