បើតាមការចុះផ្សាយរបស់ទីភ្នាក់ងារព័ត៌មាន Reuters កីឡាករវ័យ ៣៩ ឆ្នាំ នឹងត្រូវជួយក្រុមស៊ុយអែតលេងតទល់នឹងក្រុមហ្សកហ្ស៊ី និងកូសូវ៉ូ ក្នុងវគ្គជម្រុះពានរង្វាន់ពិភពលោក ក្រោយចូលនិវត្តន៍ពីក្រុមជម្រើសជាតិអស់រយៈពេល៥ឆ្នាំ។ ខ្សែប្រយុទ្ធកំពុងឡើងជើងរបស់ក្លិប AC Milan បានព្យួរស្បែកជើងពីក្រុមជម្រើសជាតិ នៅក្រោយការប្រកួតពានរង្វាន់អឺរ៉ុប Euro ឆ្នាំ ២០១៦មក។
 

Ibrahimovic ដែលជាអ្នករកគ្រាប់បាល់ស៊ុតបញ្ចូលទីច្រើនជាងគេសម្រាប់ស៊ុយអែត ចំនួន ៦២ គ្រាប់ ក្នុងការប្រកួតអន្តរជាតិចំនួន១១៦លើក ធ្លាប់បានបង្ហើបកាលពីខែវិច្ឆិកាថា រូបគេបានត្រៀមខ្លួនរួចជាស្រេចហើយក្នុងការត្រឡប់ពីការចូលនិវត្តន៍ ដើម្បីចូលជួយក្រុមជម្រើសជាតិវិញ។
 

គ្រូបង្វឹកស៊ុយអែតលោក Andersson បានធ្វើដំណើរទៅជួប Ibrahimovic នៅអ៊ីតាលីដើម្បីអនុញ្ញាតសម្រប់ការវិលត្រឡប់នេះ ហើយត្រូវបានប្រកាសជាផ្លូវការនៅថ្ងៃទី១៦ ខែមីនា។ ដំបូងឡើង លោក Andersson ក៏ធ្លាប់បដិសេធមិនទទួលយកខ្សែប្រយុទ្ធវ័យចំណាស់នេះចូលក្រុមជម្រើសជាតិវិញផងដែរ។ កាលណោះគ្រូសញ្ជាតិស៊ុយអែត វ័យ៥៨ឆ្នាំ អះអាងថាទ្វារត្រូវបានបិទហើយសម្រាប់ការវិលត្រឡប់របស់អតីតប្រធានក្រុមរូបនេះ។
 

យ៉ាងណា លោក Andersson នៅតែសម្រេចទទួលយក Ibrahimovic បន្ទាប់ពីរូបគេបានធ្វើឱ្យមានការភ្ញាក់ផ្អើលយ៉ាងខ្លាំងពីទម្រង់លេងរបស់ខ្លួនក្រោយរកបាន ១៤ គ្រាប់ក្នុងការបង្ហាញខ្លួន ១៤ ប្រកួតនៅក្របខណ្ឌ Serie A រដូវកាលនេះ។ អតីតសមាជិក Manchester United, Juventus, Barcelona, PSG, Inter Milan និង LA Galaxy រូបនេះបានជួយ AC Milan លេចធ្លោ និងជាក្រុមបេក្ខភាពប្រជែងពានលីគកំពូលអ៊ីតាលីរដូវកាលនេះផងដែរ៕