នេះជាករណីទី២ហើយ ជុំវិញការតិះទៀនស្រ្តី ពីសំណាក់មន្ត្រីសំខាន់ៗនៅក្នុងព្រឹត្តិការណ៍លំដាប់ពិភពលោកមួយនេះ។ លោក Yoshiro Mori ជាបុរសដំបូងដែលបានចុះចេញពីតំណែងប្រធានគណៈកម្មកាធិការរៀបចំកីឡាអូឡាំពិកក្រុងតូក្យូឆ្នាំ ២០២០ ក្រោយអត្ថាធិប្បាយថា «ស្ត្រីនិយាយច្រើនពេក»។
 

ភ្នាក់ងារព័ត៌មាន Kyodo បានចុះផ្សាយថាលោក Sasaki បានលើកឡើងពីតារាជប៉ុនម្នាក់ឈ្មោះ Naomi Watanabe ដោយបានប្រាប់ក្រុមផែនការក្នុងន័យលេងសើចថា ស្រ្តីវ័យ៣៣ឆ្នាំដែលមានរាងធាត់ផងនោះ អាចដើរតួជា «Olympig» នៅក្នុងពិធីបើកកីឡាអូឡាំពិក។ 
 

ការនិយាយបែបនេះ ក៏ត្រូវបានស្សនាវដ្តីព័ត៌មានប្រចាំសប្តាហ៍របស់ជប៉ុន Shukan Bunshun យកទៅចុះផ្សាយ។
 

យ៉ាងណាលោក Sasaki ក៏បានដឹងពីកំហុសពីការនិយាយររបេញរបុញរបស់ខ្លួន និងបានសុំទោសតារាជប៉ុននោះផងដែរ។ លោកបញ្ជាក់ថា៖«ខ្ញុំសុំទោសដោយស្មោះចំពោះនាង និងមនុស្សដែលមានអារម្មណ៍មិនសប្បាយចិត្តនឹងការនិយាយបែបលេងសើចរបស់ខ្ញុំ»។
 

Sasaki វ័យ៦៦ឆ្នាំ ត្រូវបានតែងតាំងជាប្រធានក្រុមច្នៃលើការបើកបិទអូឡាំពិកកាលពីខែធ្នូ បានព្យាយាមកែលម្អផែនការសម្រាប់កម្មវិពិធីជាច្រើន បន្ទាប់ពីព្រឹត្តិការណ៍នេះត្រូវបានពន្យាររយៈពេលមួយឆ្នាំដោយសារតែជំងឺកូវីដ-១៩ រាតត្បាតជុំវិញពិភពលោក៕