ចាប់ពីពេលនេះ រហូតដល់ ដំណាច់ឆ្នាំ២០២១ ភ្ញៀវទេសចរបរទេស អាចទស្សនារមណីយដ្ឋានអង្គរបានយូរថ្ងៃជាងមុន លើសំបុត្រដែលខ្លួនបានទិញ។ ទិញសំបុត្រសម្រាប់១ថ្ងៃ ដែលមានតម្លៃ ៣៧ដុល្លារ អាចចូលទស្សនាបាន ២ថ្ងៃ។ ទិញសំបុត្រ៣ថ្ងៃ  ដែលមានតម្លៃ៦២ដុល្លារ អាចចូលទស្សនាបាន ៥ថ្ងៃ ឬទិញសំបុត្រសម្រាប់៧ថ្ងៃ តម្លៃសរុប៧២ដុល្លារ នឹងអាចចូលទស្សនាបានរហូត១០ថ្ងៃ។ នេះបើយោងតាមតាមសេចក្តីជូនដំណឹង របស់គ្រឹះស្ថានអង្គរ ចុះថ្ងៃទី១០ មីនា។ 
 

តាមគ្រឹះស្ថានអង្គរ នេះនេះគឺជាគោលនយោបាយថ្មី ដែលរដ្ឋាភិបាលបានដាក់ចេញ ដើម្បីស្រោចស្រង់វិស័យទេសចរណ៍នៅក្នុងខេត្តសៀមរាប និងដើម្បីទាក់ទាញទេសចរបរទេស មកទស្សនាតំបន់អង្គរ នាអំឡុងវិបត្តិកូវីដ-១៩។ វិបត្តិជំងឺរាតដ្បាត កូវីដ-១៩ បានធ្វើឱ្យទេសចរណ៍ខេត្តសៀមរាបពឹងផ្អែកខ្លាំងលើភ្ញៀវបរទេស បានបានធ្លាក់ដុនដាបកាន់តែខ្លាំង។  
 

ក្រៅពីនេះ ការលើកទឹកចិត្តក៏ត្រូវបានអនុវត្តចំពោះបណ្ណ ឬសំបុត្រ សម្រាប់រយៈពេលវែងផងដែរ។ តាមសេចក្តីជូនដំណឹងរបស់គ្រឹះស្ថានអង្គរ បើទិញបណ្ណចូលរមណីយដ្ឋានអង្គរ សម្រាប់រយៈពេល១ខែ ដែលមានតម្លៃ ១០០ដុល្លារ ភ្ញៀវបរទេសអាចចូលរទស្សនាបានរយៈពេល២ខែ។ បើទិញបណ្ណសម្រាប់រយៈពេល៣ខែ ដែលមានតម្លៃ ២៥០ដុល្លារ ភ្ញៀវបរទេស អាចចូលទស្សនា បាន៦ខែ។ ប្រសិនបើទិញបណ្ណទស្សនា សម្រាប់រយៈពេល៦ខែ ដែលមានតម្លៃ ២៥០ដុល្លារវិញ ភ្ញៀវបរទេស អាចចេញ-ចូលទស្សនាតំបន់អង្គរ បានពេញ១ឆ្នាំតែម្តង។   
 

ប្រភេទបណ្ណចូលទស្សនារមណីយដ្ឋានអង្គរ សម្រាប់រយៈពេលវែង គឺច្រើនតែសម្រាប់ភ្ញៀវទេសចរ ឬជនបរទេស ដែលរៀបការជាមួយជនជាតិខ្មែរ, អ្នកកំពុងស្នាក់នៅធ្វើការ ឬប្រកបធុរកិច្ចនានាកម្ពុជា ពិសេសនៅខេត្តសៀមរាប។  
 

សូមជម្រាបថា ភ្ញៀវទេសចរបរទេស ដែលទៅកម្សាន្តនៅខេត្តសៀមរាប បានចាប់ថយចុះ តាំងពីមុនមានជំងឺរាតត្បាតកូវីដ-១៩ ទៅទៀត ពោលគឺតាំងពីអំឡុងឆ្នាំ២០១៩មកម្ល៉េះ។

វិបត្តិកូវីដ-១៩ បានក្លាយជាបន្ទុកបន្ថែមកាន់តែខ្លាំង សម្រាប់វិស័យខេត្តសៀមរាប ដោយសារតែចំនួនភ្ញៀវទេសបរទេស ចាប់ធ្លាក់ចុះយ៉ាងគំហុកតែម្តង។ រយៈពេលជាង១ឆ្នាំមកនេះ មិនថាវិស័យទេសចរក្នុងស្រុក ឬនៅក្នុងខេត្តសៀមរាបនោះទេ គឺពឹងផ្អែកស្ទើរទាំងស្រុងលើ ទេសចរជាតិ។ ប៉ុន្តែការឆ្លងរាលដាលជំងឺកូវីដ-១៩ ក្នុងសហគមន៍ជាបន្តបន្ទាប់នេះ បានធ្វើឱ្យទេសចរណ៍នៅកម្ពុជា កាន់តែយ៉ាប់យ៉ឺនមួយកម្រិតទៀត។
 

សូមបញ្ជាក់ថា រយៈពេល២ខែ ដើមឆ្នាំ២០២១នេះ ចំណូលពីការលក់សំបុត្រចូលទស្សនារមណីយដ្ឋានអង្គរ មានចំនួន ១៧២,៨២៣ដុល្លារ ពីទេសចរបរទេសចំនួន ៤.១៩៤នាក់។ ចំនួនទេសចរដែលបានទិញសំបុត្រចូលទស្សនាតំបន់អង្គរនេះ ស្មើតែជាង១ ភាគរយប៉ុណ្ណោះ នៃចំនួនទេសចរបរទេស ដែលបានទិញសំបុត្រចូលតំបន់អង្គរ ក្នុងរយៈពេលដូចគ្នា កាលពីឆ្នាំ២០២០។ 
 

  

ដោយឡែក កាលឆ្នាំ២០២០នៃវិបត្តិជំងឺកូវីដ-១៩ កម្ពុជាទទួលបានចំណូលជាង១៨,៦លានដុល្លារ ពីភ្ញៀវទេសចរបទេសជាង៤០ម៉ឺន ដែលទិញបណ្ណចូលទស្សនា«រមណីយដ្ឋានអង្គរ»។ ចំណូលនេះ ធ្លាក់ចុះរហូតជាង៨១ភាគរយ  បើធៀបនឹងឆ្នាំ២០១៩៕