សម្រាប់វគ្គបណ្តុះបណ្តាលដែលដំណើរការពីខែកញ្ញា មក កញ្ញា Pham Kieu Ly ទទួលសិក្ខាកាមភាគច្រើនបំផុតជាស្ត្រី ដោយពួកគេចង់ដឹងពីរបៀបថត របៀបសម្តែង ញញឹម ការជ្រើសរើសទីតាំង ការដាក់ដៃ និងសកម្មភាពសិល្បៈផ្សេងៗ ក្នុងការទាក់ទាញអ្នកទស្សនា (Followers, Viewers) ឲ្យបានច្រើន។

 

នៅវៀតណាម ពលរដ្ឋប្រមាណ៧០ភាគរយមានអាយុក្រោម៣៥ឆ្នាំ ហើយដូច្នេះហើយបានជា Pham Kieu Ly មានឃើញពីឱកាសរបស់ខ្លួនក្នុងការបើកវគ្គបណ្តុះបណ្តាលជំនាញប្រើប្រាស់បណ្តាញសង្គម ជាពិសេសសម្រាប់ស្ត្រី។ រៀនមួយថ្ងៃកន្លះ តម្លៃ១៣០ដុល្លារអាមេរិក ហើយអ្នកគ្រូរូបនេះ ទទួលបានសិស្សស្រីប្រមាណ៥០០នាក់ហើយ។

 

Kieu Ly បានថ្លែងប្រាប់ AFP ថា សិស្សស្រីៗនៅក្នុងវគ្គបណ្តុះបណ្តាលខ្លួនសុទ្ធតែចង់ចេះចង់ដឹងពីវិធីបង្ហោះ និងថតរូប សម្រាប់ការងារពួកគេ ហើយភាគច្រើនចង់កសាងទំនុកចិត្តរបស់ខ្លួនច្បាស់លាស់មុននឹងបង្ហោះអ្វីមួយនៅលើបណ្តាញសង្គម។ សិស្សមួយចំនួនចង់បង្ហោះពីរឿងផ្ទាល់ខ្លួន រីឯខ្លះទៀតជាអ្នករកស៊ីលក់ផលិតផលអនឡាញ និងខ្លះជាភ្នាក់ងារអចលនទ្រព្យ។

 

អ្នកដែលចូលរួមវគ្គបណ្តុះបណ្តាលសុទ្ធតែបានអះអាងពីការទទួលបានចំណេះដឹងច្បាស់លាស់ពីជំនាញថតរូប ការប្រើប្រាស់រូបត្រឹមត្រូវសម្រាប់ការលក់ផលិតផលនៅលើហ្វេសប៊ុកដែលមានអ្នកប្រើប្រាស់ជាង៥៣លាននាក់នៅវៀតណាម និងនៅតាមបណ្តាញសង្គមផ្សេងៗទៀត ដូចជា Instagram និង TikTok  ជាដើម៕