សម្តេច ហ៊ុន សែន មានប្រសាសន៍ថា ការជ្រើសតាំងលោក ថងលួន ស៊ីសូលីត ឲ្យធ្វើជាប្រធានាធិបតី គឺបង្ហាញឲ្យឃើញពីការជឿទុកចិត្តខ្ពស់របស់ប្រជាជនឡាវ ចំពោះសមត្ថភាពដឹកនាំនិងការលះបង់របស់លោក ក្នុងការបម្រើជាតិមាតុភូមិ។  
 

តាមលិខិតចុះហត្ថលេខានៅថ្ងៃទី២២ ខែមីនា ឆ្នាំ២០២១ នាយករដ្ឋមន្រ្តីកម្ពុជា ថ្លែងទៅកាន់ប្រធានាធិបតីឡាវថ្មីថា៖«ទំនាក់ទំនងមិត្តភាពដ៏រឹងមាំ និងកិច្ចសហប្រតិបត្តិការដ៏ជិតស្និទ្ធលើគ្រប់វិស័យរវាងប្រទេសយើង ដែលផ្អែកលើស្មារតីនៃភាពជាអ្នកជិតខាង និងសាមគ្គីភាពជាបងប្អូន មិនត្រឹមតែបានចូលរួមចំណែកដល់សុខុមាលភាពរបស់ប្រជាជនយើងទាំងពីរប៉ុណ្ណោះទេ ព្រមទាំងពិភពលោកទាំងមូលផងដែរ»។ 
 

មុនក្លាយជាប្រធានាធិបតី លោក ថងលួន ស៊ីសូលីត កាន់តំណែងជានាយករដ្ឋមន្រ្តីរយៈពេល៥ឆ្នាំ គឺចាប់តាំងពីឆ្នាំ២០១៦មក។ ការជ្រើសតាំងលោក ថងលួន ស៊ីសូលីត ជាប្រធានាធិបតី ធ្វើឡើងក្នុងកិច្ចប្រជុំលើកដំបូងនៃសភាឡាវអាណត្តិទី៩ នៅថ្ងៃទី២២ ខែមីនា។ ក្រៅពីតំណែងជាប្រធានាធិបតី លោក ថងលួន ស៊ីសូលីត ដែលមានវ័យ៧៥ឆ្នាំ ក៏កំពុងកាន់តំណែងជាអគ្គលេខាធិការបក្សកុម្មុយនីស្តឡាវ។
 

ចំណែកតំណែងនាយករដ្ឋមន្ត្រីរបស់លោក ថងសួន ស៊ីសូលីត គឺធ្លាប់ទៅលើលោក ផាន់ខាំ វិផាវណ្ណ ដែលជាអនុប្រធានាធិបតី។ តំណែងអនុប្រធាធិបតីនេះ ត្រូវបានប្រគល់ទៅឲ្យឥស្សរជានពីររូព គឺអ្នកស្រី ផានី យ៉ាធូទូ ដែលជាអតីតប្រធានសភា និងលោក ប៊ុនថង ជិតម៉ានី ដែលជាឧបនាយករដ្ឋមន្រ្តី។ ដោយឡែក ប្រធានសភាថ្មី គឺលោក សៃសំផន ភូមិវិហាន។ 
 

ក្នុងលិខិតរបស់ខ្លួន នាយករដ្ឋមន្រ្តីកម្ពុជា បង្ហាញការប្តេជ្ញាចិត្តថា នឹងធ្វើការងារយ៉ាងជិតស្និទ្ធជាមួយនាយករដ្ឋមន្រ្តីឡាវថ្មី ដែលបន្តវេនពីលោក ថងលួន ស៊ីសូលីត  ដើម្បីពង្រឹងទំនាក់ទំនងរវាងកម្ពុជានិងឡាវ និងដើម្បីនាំមកនូវផលប្រយោជន៍សម្រាប់ប្រជាជននៃប្រទេសទាំងពីរ៕