លោកស៊ុន ចាន់ថុល បានបញ្ជាក់ថា ស្ពាននេះ គ្រោងបើកសម្ពោធឱ្យប្រើប្រាស់ជាផ្លូវការ នៅថ្ងៃទី២៤ មីនា ប៉ុន្តែដោយសារបញ្ហាឆ្លងកូវីដ-១៩ នៃព្រឹត្តិការណ៍២០កុម្ភៈមិនទាន់បញ្ចប់ ទើបសម្ដេច ហ៊ុន សែន សម្រេចលើកពេលសម្ពោធវិញ។ រដ្ឋមន្រ្តីក្រសួងសាធារណការ បានបញ្ជាក់ដូច្នេះថា៖« សម្តេចនាយករដ្ឋមន្ត្រីបានឯកភាពបើកឱ្យបងប្អូនប្រជាពលរដ្ឋប្រើប្រាស់ស្ពាននេះជាបណ្ដោះអាសន្នចាប់ពីថ្ងៃនេះទៅ រង់ចាំពេលវេលាសមស្របណាមួយ ដើម្បីបើកសម្ពោធឱ្យប្រើប្រាស់ជាផ្លូវការ»។ 

 

ស្ពានមិត្តភាពកម្ពុជា-ចិន ស្ទឹងត្រង់-ក្រូចឆ្មារ គឺមានប្រវែង១,១៣១ម៉ែត្រ ហើយត្រូវបានសាងសងចប់មុនគម្រោងរយៈពេលពីរខែ ពោលគឺមុនគម្រោងបញ្ចប់នៅខែឧសភា។ ស្ពាននេះ ឆ្លងកាត់ទន្លេមេគង្គតភ្ជាប់រវាងស្រុកក្រូចឆ្មារ ខេត្តត្បូងឃ្មុំ ជាមួយនឹងស្រុកស្ទឹងត្រង់ខេត្តកំពង់ចាម ។ គម្រោងស្ពានមិត្តភាពកម្ពុជា-ចិនទី៨នេះ បានបើកការដ្ឋានសាងសង់ កាលពីថ្ងៃទី១ធ្នូ ឆ្នាំ២០១៧។ 

 

គម្រោងស្ពាននេះ ចំណាយថវិកាប្រមាណ៥៨,៤២លានដុល្លារអាមេរិក ជាគម្រោងហិរញ្ញប្បទានឥតសំណងពីរដ្ឋាភិបាលចិន និងថវិកាបដិភាគពីរាជរដ្ឋាភិបាលកម្ពុជា។ នេះបើតាមការចេញផ្សាយរបស់ក្រសួងសាធារណការ ដោយបញ្ជាក់ថា ស្ពាននេះនឹងជួយទាញភូមិសាស្រ្តរវាងខេត្តកំពង់ចាម និងខេត្តត្បូងឃ្មុំឱ្យកាន់តែកៀកជិតគ្នា ជាពិសេសសម្រួលដល់ការធ្វើដំណើររបស់ប្រជាពលរដ្ឋ ការដឹកជញ្ជូនទំនិញកសិផលទៅកាន់ទីផ្សារ និងជំរុញកំណើនសេដ្ឋកិច្ចជាតិបានមួយកម្រិតថែមទៀតផង៕