អូឡាំពិកទីក្រុងតូក្យូ នឹងក្លាយជាព្រឹត្តិការណ៍អូឡាំពិកលើកដំបូងដែលមិនអនុញ្ញាតឱ្យមានអ្នកគាំទ្រពីក្រៅប្រទេស។ គណៈកម្មាធិការអូឡាំពិកឆ្នាំ២០២០ សម្រេចបែបនេះនាកិច្ចប្រជុំថ្ងៃទី២២ ខែមីនា។ អ្នកស្រី Seiko Hashimoto ប្រធានគណៈកម្មាធិការរៀបចំកីឡាអូឡាំពិកក្រុងតូក្យូ បានហៅការសម្រេចចិត្តនេះថាជាការខកចិត្ត។ 
 

យ៉ាងណាមិញ ជប៉ុន មិនអាចជៀសផុតពីការសម្រេចនេះទេ ព្រោះពួកគេព្យាយាមរៀបចំព្រឹត្តិការណ៍នេះដោយសុវត្ថិភាព អំឡុងជំងឺកូវីដ-១៩ រាតត្បាត។ នាយកផ្នែកកីឡារបស់គណៈកម្មាធិការរៀបចំ អ្នកស្រី Mikako Kotani ទទួលស្គាល់ថា នេះជាការបាត់បង់នូវភាពសុខដុម និងភាពសម្បូរបែបនៃព្រឹត្តិការណ៍លំដាប់ពិភពលោកមួយនេះ។
 

បើទោះមានការសម្រេចយ៉ាងនេះក្តី ប៉ុន្តែអ្នកស្រី Kotani ជឿជាក់ថាអ្នកទស្សនាជាពលរដ្ឋជប៉ុននឹងអាចកែប្រែស្ថានភាពនេះបាន តាមរយៈការគាំទ្រអត្តពលិកគ្រប់សញ្ជាតិ ដែលធ្វើឱ្យទីក្រុងតូក្យូទាំងមូលនឹងមានអារម្មណ៍ដូចជាពិភពលោកកំពុងចូលរួមព្រឹត្តិការណ៍រដូវក្តៅនេះអ៊ីចឹងដែរ។
 

មួយវិញទៀត គណៈកម្មាធិការអូឡាំពិកអន្តរជាតិ (IOC) រាយការណ៍ថា ស្ថាប័នខ្លួនបានស្វែងរកដំណោះស្រាយមួយ ជុំវិញការលើកលែងសម្រាប់ភ្ញៀវក្រៅប្រទេសមួយចំនួន។ IOC ចង់ឱ្យជប៉ុនអនុញ្ញាតឱ្យក្រុមគ្រួសាររបស់អត្តពលិកពីក្រៅប្រទេសចូលរួមព្រឹត្តិការណ៍នេះ។ ប៉ុន្តលោក Toshiro Muto នាយកប្រតិបត្តិអូឡាំពិកក្រុងតូក្យូឆ្នាំ ២០២០ អះអាងនៅថ្ងៃទី២២ ខែមីនាថា មិនទាន់មានការសម្រេចចិត្តចុងក្រោយណាមួយលើករណីនេះឡើយ៕