ចិនដែលអះអាងថា កោះតៃវ៉ាន់ជាទឹកដីរបស់ខ្លួននោះ តែងតែធ្វើសកម្មភាពយោធានៅក្បែរកោះតៃវ៉ាន់ ដើម្បីកំញើញទឹកដីមួយនេះ។ សកម្មភាពរបស់ចិន ធ្វើឱ្យតៃវ៉ាន់ប្រឹងធ្វើទំនើបកម្មយោធារបស់ ខ្លួន ទាំងស្រវាស្រទេញទិញសពា្វវុធពីបរទេស និងទាំងពង្រឹងសមត្ថភាពក្នុងស្រុកផង។  
 

នៅថ្ងៃទី២៥ ខែមីនា មន្ត្រីតៃវ៉ាន់ ប្រកាសពីការផលិតមីស៊ីលចម្ងាយឆ្ងាយរបស់ខ្លួន។ នាកិច្ចប្រជុំសភា រដ្ឋមន្រ្តីការពារជាតិតៃវ៉ាន់លោក Chiu Kuo-cheng បានអះអាងថា ការអភិវឌ្ឍមីស៊ីលដែលមាន សមត្ថភាពវាយប្រហារក្នុងរយៈចម្ងាយឆ្ងាយ ជាអាទិភាពមួយ។ 
 

«យើងសង្ឃឹមថា វាអាចបាញ់បានក្នុងរយៈចម្ងាយឆ្ងាយ ហើយត្រឹមត្រូវ និងអាចចល័តបាន»។ លោក Chiu បន្ថែមដូចនេះ។ បើតាមទីភ្នាក់ងារព័ត៌មាន Reuters លោក Leng Chin-hsu នាយករង វិទ្យាស្ថានវិទ្យាសាស្ត្រ និងបច្ចេកវិទ្យាដែលជាកន្លែងស្រាវជ្រាវនិងផលិតអាវុធតៃវ៉ាន់ បានបញ្ជាក់ថា មីស៊ីលរយៈចម្ងាយឆ្ងាយ ត្រូវបានចាប់ផ្តើមផលិតហើយ ហើយមីស៊ីលរយៈចម្ងាយឆ្ងាយ៣ប្រភេទ ទៀតកំពុងស្ថិតក្រោមការអភិវឌ្ឍ។
 

ប៉ុន្មានខែថ្មីៗនេះ វិទ្យាស្ថានដែលដឹកនាំការអភិវឌ្ឍអាវុធរបស់កោះតៃវ៉ាន់ បានសាកល្បងមីស៊ីលជា បន្តបន្ទាប់នៅឆ្នេរសមុទ្រភាគអាគ្នេយ៍របស់ខ្លួន។ ប្រព័ន្ធផ្សព្វផ្សាយតៃវ៉ាន់បានផ្តិតយករូបភាពការ បាញ់មីស៊ីល ព្រមទាំងផ្សាយសេចក្តីណែនាំ ឱ្យជើងហោះហើរនានាចៀសវាងហោះមកក្បែរតំបន់ ដែលកំណត់សម្រាប់បាញ់មីស៊ីលសាកល្បង។ 

សូមបញ្ជាក់ថា កោះតៃវ៉ាន់ មានរដ្ឋធានីវ៉ាស៊ីនតោនជាអ្នកផ្គត់ផ្គង់អាវុធបរទេសដ៏ធំខណៈ កោះនេះតែងចង់បង្កើតឱ្យមានតុល្យភាពយោធាជាមួយចិន៕