លោក វង្សី វិស្សុត បានបញ្ជាក់ថា វ៉ាក់សាំងបង្ការកូវីដ-១៩ សម្រាប់ចាក់ជូនប្រជាជននេះ វាមិនត្រឹមតែការពារអាយុជីវិតទេ។ តែវ៉ាក់សាំងបង្ការកូវីដ-១៩នេះ គឺជាអាវុធដ៏សំខាន់មួយសម្រាប់កម្ពុជាក្នុងការស្ដារសេដ្ឋកិច្ចឡើងវិញដែរ។ 

 

«កាលណាយើងបានចាក់វ៉ាក់សាំងអស់ លែងឆ្លង[កូវីដ-១៩] យើងអាចបើកសេដ្ឋកិច្ចធ្វើសកម្មភាពសេដ្ឋកិច្ចឡើងវិញ ហើយជីវភាពប្រជាជននឹងមានឡើងវិញ តាមរយៈការរកស៊ីវិញបានជាធម្មតា, តាមរយៈការបង្កើតការងារ បង្កើតការវិនិយោគ...។ បើអត់វ៉ាក់សាំងទេ គឺមិនអាចដោះស្រាយបញ្ហាអាយុជីវិត! មិនអាចទប់ស្កាត់ការរាតត្បាតជំងឺ! មិនអាចស្តារសេដ្ឋកិច្ចបានឡើងវិញទេ! ហើយក៏អាចមិនអាចឱ្យជីវភាព[របស់ប្រជាជន] មានប្រក្រតីភាពឡើងវិញទេ!»។ នេះជាការលើកឡើងរបស់លោក រង្សី វិស្សុត ។

 

កម្ពុជាមានវ៉ាក់សាំងរបស់ក្រុមហ៊ុនSinopharm និងវ៉ាក់សាំងរបស់ក្រុមហ៊ុនAstraZeneca ចំនួនជាង៩២ម៉ឺនដូស ខណៈកម្ពុជាក៏ត្រៀមចាក់សាំងរបស់ក្រុមហ៊ុនSinovac នាពេលឆាប់ៗ ក្រោយទទួលបាន១,៥លានដូសពីប្រទេសចិន  នាថ្ងៃទី២៦មីនានេះ។ កម្ពុជា ចាប់ផ្តើមចាក់វ៉ាក់សាំងបង្ការកូវីដ-១៩ជូនពលរដ្ឋ ចាប់តាំងពីថ្ងៃទី១០ កុម្ភៈ ឆ្នាំ២០២១ ។ 

 

រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការនៃក្រសួងសេដ្ឋកិច្ច និងហិរញ្ញវត្ថុ លោក វង្ស៊ី វិស្សុតបានអះអាងថា កម្ពុជានឹងមានវ៉ាក់សាំងបង្ការកូវីដ-១៩ ជាហូរហែរសម្រាប់ចាក់ជូនប្រជាជនយ៉ាងតិច១០លានដូស នៅបំណាច់ឆ្នាំ២០២១។

 

គិតត្រឹមថ្ងៃទី២៦មីនា កម្ពុជាមានពលរដ្ឋជាង៣៥ម៉ឺននាក់ បានចាក់វ៉ាក់សាំងបង្ការកូវីដ-១៩ ដោយក្នុងនោះ ជាង២៣ម៉ឺននាក់ ជាពលរដ្ឋអាទិភាព និងជាង១១ម៉ឺននាក់ទៀត ជាកងកម្លាំងយោធា។ ក្នុងចំណោមអ្នកចាក់វ៉ាក់សាំងនេះ មានជាង៨ពាន់នាក់ ចាក់វ៉ាក់សាំង COVISHIELD របស់ក្រុមហ៊ុន AstraZeneca ដែលផលិតនៅប្រទេសឥណ្ឌា។ កម្ពុជា មានគោលដៅចាក់វ៉ាក់សាំងជូនពលរដ្ឋឱ្យយ៉ាងហោចណាស់១០លាននាក់។  

 

កាលឆ្នាំ២០២០ កម្ពុជាបានចាយថវិកាអស់ជាង១ពាន់ដុល្លារសម្រាប់ទ្រទ្រង់សេដ្ឋកិច្ចជាតិ ដែលបណ្តាលមកពីការរាលដាលនៃជំងឺកូវីដ-១៩ជាសកលលោកនេះ។ កម្ពុជាក៏មានធនធានគ្រប់គ្រាន់សម្រាប់ទ្រទ្រង់សេដ្ឋកិច្ចនៅក្នុងឆ្នាំ២០២១ និងឆ្នាំ២០២២ផងដែរ សម្រាប់ឆ្លើយតបនឹងរាលដាលជំងឺនេះ។ នេះបើតាមលោក រង្សី វិស្សុត៕