លោក តាន់ ផាន់ណារ៉ា ប្រធាននាយកដ្ឋានសុខភាពសត្វ និងផលិតកម្មសត្វ បានថ្លែងប្រាប់អ្នកសារព័ត៌មាន នាឱកាសនោះថា ការដុតកម្ទេចចោលជ្រូកទាំងនេះ ជាការទប់ស្កាត់ការរីករាលដាលនៃជំងឺប៉េស្តក្នុងប្រទេសកម្ពុជា។ 

 

នេះមិនមែនជាលើកទីមួយទេ ដែលមាននាំចូលជ្រូកខុសច្បាប់និងកើតជំងឺប៉េស្តជ្រូក ហើយសកម្មភាពខុសច្បាប់នេះ នៅតែកើតមានជាបន្តបន្ទាប់។ លោក តាន់ ផាន់ណារ៉ា បន្ថែមដូច្នេះ៖ «ទោះយើងរឹតបន្តឹង តែការនាំចូលជ្រូកខុសច្បាប់នៅតែមាន។ ជាក់ស្ដែងក្រៅពីជ្រូក១០២ក្បាលដែលយើងបានកម្ទេចនេះ អាជ្ញាធរក៏បានរាយការណ៍ថា រកឃើញជ្រូកនាំចូលខុសច្បាប់ ៣០ក្បាលទៀត នៅបន្ទាយមានជ័យកើតជំងឺប៉េស្តជ្រូក ហើយយើងនឹងធ្វើដូចនេះ(ដុតកម្ទេច)បន្តទៀត»។

 

ប្រធាននាយកដ្ឋានសុខភាពសត្វ និងផលិតកម្មសត្វ បញ្ជាក់ទៀតថា កន្លងក្រសួងអនុញ្ញាតឲ្យតែជ្រូកដែលមានសុខភាពល្អប៉ុណ្ណោះ ចូលក្នុងកម្ពុជា ហើយការដែលសាច់ជ្រូកឡើងថ្លៃ មិនបានទាក់ទង នឹងការនាំចូលជ្រូកខុសច្បាប់នោះទេ។ «សាច់ជ្រូកឡើងថ្លៃ ព្រោះថ្លៃដើមឡើងថ្លៃ មិនមែនដោយសារនាំចូលជ្រូកខុសច្បាប់នោះទេ»។ នេះជាការអះអាងរបស់លោក តាន់ ផាន់ណារ៉ា។ 

 

ក្នុងរយៈពេល ៣ខែ អគ្គនាយកដ្ឋានសុខភាពសត្វ និងផលិតកម្មសត្វ បានបង្ក្រាបការនាំចូលសត្វខុសច្បាប់ចូលកម្ពុជា ចំនួន ១៩ករណី ដោយ១៦ករណី ជាការលួចនាំចូលជ្រូក ហើយដែល  ៣ករណី កើតមានជំងឺប៉េស្តជ្រូក៕