បម្រាមគោចរ ថ្ងៃទី១ ៖ អាជ្ញាធរឃាត់ម៉ូតូ និងរថយន្ត២០គ្រឿង តែមិនរឹបអូសឡើយ

COVID-19

ជាតិ

សង្គមជាតិ

បម្រាមគោចរ ថ្ងៃទី១ ៖ អាជ្ញាធរឃាត់ម៉ូតូ និងរថយន្ត២០គ្រឿង តែមិនរឹបអូសឡើយ

03, Apr 2021 , 3:39 pm

រូបភាព

ដោយ:

ភ្នំពេញ៖ អាជ្ញាធររាជធានីភ្នំពេញបានឃាត់មនុស្ស រួមទាំងម៉ូតូ និងរថយន្តប្រមាណ២០គ្រឿង កាលពីយប់ថ្ងៃទី២ ខែមេសា នៃការអនុវត្តបម្រាមគោចរ។ ប៉ុន្តែអាជ្ញាធរ មិនទាន់ដាក់ពិន័យ និងរឹបអូសមធ្យោបាយធ្វើដំណើរទៅរក្សាទុកឡើយ ដោយគ្រាន់តែណែនាំពលរដ្ឋសិន។ នេះបើតាម លោក ឃួង ស្រេង អភិបាលរាជធានីភ្នំពេញ។

ដើម្បីជ្រាបកាន់តែច្បាស់សូមតាមដានស្តាប់ប្រសាសន៍របស់លោក ឃួង ស្រេង អភិបាលរាជធានីភ្នំពេញខាងក្រោមនេះ៖

នាយប់ថ្ងៃទី ២ ខែមេសាលោក ឃួង ស្រេង បានចុះពិនិត្យមើលដោយផ្ទាល់នៃការអនុវត្តវិធានការរដ្ឋបាលថ្ងៃទីពីរ ប្រឆាំងនឹងការរាតត្បាតនៃជំងឺកូវីដ ១៩។

លោក ឃួង ស្រេង អភិបាលរាជធានីភ្នំពេញ បានបញ្ជាក់ក្នុងកិច្ចសម្ភាសជាមួយសារព័ត៌មានថ្មីៗតាមទូរសព្ទនៅថ្ងៃទី៣ ខែមេសាថា បើកាលណាពលរដ្ឋដែលបានធ្វើដំណើរនៅពេលយប់ ហើយត្រូវបានអាជ្ញាធរចុះណែនាំម្តង ហើយមិនអនុវត្តតាមការណែនាំនោះ ពួកគេនឹងប្រឈមមុខឃាត់ខ្លួន រួចឲ្យធ្វើចត្តាឡីស័ក និងរឹបអូសយានជំនិះទៀតផង។

«យប់មិញគឺយើងគ្រាន់តែឃាត់ខ្លួន១០-២០នាក់ តែណែនាំគាត់ឲ្យទៅផ្ទះវិញ ហើយគ្រាន់តែឲ្យគាត់ធ្វើកិច្ចសន្យា ក៏ឲ្យគាត់ទៅៗ ហើយកុំឲ្យគាត់ដើរទៀតនៅថ្ងៃខាងមុខ។ ប្រាប់ហើយ បើណែនាំហើយ ពួកគាត់មិនអនុវត្តតាមទៀត ខ្ញុំបានជម្រាបពួកគាត់ហើយ យប់នេះនឹងអនុវត្តតឹងរ៉ឹងហើយ»។ នេះជាការលើកឡើងរបស់លោក ឃួង ស្រេង។

លោកអភិបាលរាជធានីភ្នំពេញ បានសង្កេតឃើញថា ពលរដ្ឋនៅរាជធានីភ្នំពេញ បានចូលរួមអនុវត្តបម្រាមគោចរនេះបានល្អប្រសើរ ដើម្បីរួមគ្នាទប់ស្កាត់ជំងឺកូវីដ-១៩។

លោក ឃួង ស្រេង អភិបាលរាជធានីភ្នំពេញ បានចេញសេចក្តីសម្រេចស្តីពីការអនុវត្តវិធានការរដ្ឋបាលបណ្តោះអាសន្ន ដើម្បីទប់ស្កាត់ការរីករាលដាលជំងឺកូវីដ-១៩ ក្នុងរាជធានីភ្នំពេញ ដែលមានថិរវេលាអនុវត្តរយៈពេលពេល២សប្តាហ៍ គិតចាប់ពីថ្ងៃទី១ ដល់ថ្ងៃទី១៤ ខែមេសា។ សេចក្តីសម្រេចនេះ បានកំណត់ឲ្យមានការធ្វើចរាចរណ៍និងធ្វើដំណើរ ក្នុងចន្លោះពីម៉ោង៨យប់ដល់ម៉ោង៥ភ្លឺ បើគ្មានភារកិច្ចចាំបាច់៕