អាជ្ញាធរបិទផ្សារអូរឬស្សីបណ្ដោះអាសន្ន ក្រោយរកឃើញអ្នកវិជ្ជមានកូវីដ-១៩

COVID-19

ជាតិ

អាជ្ញាធរបិទផ្សារអូរឬស្សីបណ្ដោះអាសន្ន ក្រោយរកឃើញអ្នកវិជ្ជមានកូវីដ-១៩

04, Apr 2021 , 10:37 am

រូបភាព

ដោយ: ថ្មីៗ

ដោយ៖ ប៉ូ សុភា

ភ្នំពេញ៖ អាជ្ញាធរសម្រេចផ្អាកដំណើរការមជ្ឈមណ្ឌលពាណិជ្ជកម្មផ្សារអូរស្សី រយៈពេល១៤ ថ្ងៃ ក្រោយពីមានអាជីវករ និងសន្តិសុខក្នុងផ្សារ ឆ្លងវីរុសកូវីដ-១៩ ជាបន្តបន្ទាប់។ នេះបើតាមសេចក្តីជូនដំណឹងរបស់រដ្ឋបាលរាជធានីភ្នំពេញ កាលពីថ្ងៃទី៣ មេសា ។

បើតាមរដ្ឋបាលរាជធានីភ្នំពេញ ក្នុងរយៈពេលចុងក្រោយនេះ មានអាជីករ និងកម្លាំងសន្តិសុខផ្សារមួយចំនួន បានឆ្លងវីរុសកូវីដ-១៩ ក្នុង« ព្រឹត្តិការណ៍សហគមន៍ ២០ កុម្ភៈ» បន្តបន្ទាប់ និងមានទីតាំងខុសៗគ្នាក្នុងបរិវេណផ្សារ ជាហេតុត្រូវចាំបាច់ អនុវត្តវិធានការសុខាភិបាល ដើម្បីទប់ស្កាត់ជាបន្ទាន់។

«ក្នុងអំឡុងពេល នៃការផ្អាកនោះ រដ្ឋបាលរាជធានីភ្នំពេញ នឹងធានារ៉ាប់រងលើការងារ សន្តិសុខ និងសុវត្ថិភាព ចំពោះសម្ភារ និងឥវ៉ាន់ប្រភេទរបស់អាជីករ ដែលបានរក្សាទុកក្នុងតូបនីមួយៗ មិនឱ្យមានការបាត់បង និងមិនតម្រូវឱ្យមានការបង់ប្រាក់ថ្លៃសេវាទៅលើភាគីពាក់ព័ន្ធណាមួយឡើយ»។ នេះបើតាមរដ្ឋបាលរាជធានីភ្នំពេញ ដែលបានបន្ថែមថា ផ្សារនេះ នឹងត្រូវផ្អាកបណ្ដោះអាសន្នចាប់ពីថ្ងៃទី៤ ដល់ថ្ងៃទី ១៧ ខែមេសា ឆ្នាំ២០២១។

ដោយឡែកចំពោះផលិតផល ដែលអាចខូចគុណភាពដូចជា បន្តែ ផ្លែឈើ ត្រី សាច់ ស៊ុត។ល។ អាជីករអាចទំនាក់ទំនងជាមួយគណៈកម្មការគ្រប់គ្រងផ្សារ ដើម្បីយកទៅរក្សាទុកដោយខ្លួនឯង ចៀសវាងការខូចខាតជាយថាហេតុ។ នេះជាការបញ្ជាក់របស់រដ្ឋបាលរាជធានីភ្នំពេញ៕