អន្តរជាតិ
រដ្ឋអាជ្ញាអ៊ីរ៉ង់ថ្លែងថាមន្ត្រីយោធា១០នាក់ត្រូវបានចោទប្រកាន់ជុំវិញការបាញ់ទម្លាក់យន្តហោះអ៊ុយក្រែន
រូបឯកសារ៖ បំណែកយន្ដហោះប៊ូអ៊ីង 737-800 របស់ក្រុមហ៊ុនអាកាសចរណ៍អ៊ុយក្រែន ដែលបានធ្លាក់ ក្រោយពីហោះឡើងពីអាកាសយានដ្ឋាន Imam Khomeini ក្នុងប្រទេសអ៊ីរ៉ង់ ថ្ងៃទី៨ ខែមករា ឆ្នាំ២០២០។
×![]()
ដោយ: VOA
ប្រព័ន្ធផ្សព្វផ្សាយព័ត៌មានរបស់ប្រទេសអ៊ីរ៉ង់បានដកស្រង់សម្តីរបស់រដ្ឋអាជ្ញាតុលាការយោធា ដែលត្រូវចាកចេញពីតួនាទីរបស់ខ្លួននៅក្នុងទីក្រុងតេហេរ៉ង់ថា មានមន្ត្រីយោធាចំនួន១០នាក់ត្រូវបានចោទប្រកាន់ជុំវិញការបាញ់ទម្លាក់យន្តហោះដឹកអ្នកដំណើររបស់ប្រទេសអ៊ុយក្រែនក្នុងឆ្នាំ២០២០។
លោករដ្ឋអាជ្ញា Gholamabbas Torki បានបញ្ជាក់យ៉ាងដូចនេះ នៅថ្ងៃអង្គារ ក្នុងពេលដែលលោកប្រគល់កិច្ចការទៅឲ្យអ្នកថ្មីដែលមកជំនួសរូបលោកប៉ុន្តែលោកមិនបានបញ្ជាក់ពីឈ្មោះមន្ត្រីទាំងនោះទេ។ កាលពីខែមករា ឆ្នាំ២០២០កន្លងទៅ ប្រទេសអ៊ីរ៉ង់ បានបដិសេធបីថ្ងៃជាប់ៗគ្នា ប៉ុន្តែចុងក្រោយ បានទទួលស្គាល់ថាកងកម្លាំងរបស់ខ្លួន ជាអ្នកបាញ់ទម្លាក់យន្តហោះដឹកអ្នកដំណើរប្រទេសអ៊ុយក្រែននោះដោយភាន់ច្រឡំ ដោយបានបាញ់គ្រាប់មីស៊ីលប្រភេទពីដីទៅអាកាសចំនួនពីរគ្រាប់។
ប្រទេសអ៊ីរ៉ង់ បានចេញផ្សាយរបាយការណ៍ចុងក្រោយមួយរបស់ខ្លួននៅក្នុងខែមីនា ជុំវិញឧបទ្ទវហេតុធ្លាក់យន្តហោះនោះ ដោយពុំបង្ហាញព័ត៌មានលម្អិតជុំវិញបញ្ហានេះឡើយ។ ការប្រកាសក្នុងរបាយការណ៍នេះ បានធ្វើឲ្យប្រទេសពាក់ព័ន្ធមួយចំនួនមានការខឹងសម្បា និងធ្វើឲ្យអ្នកស៊ើបអង្កេតអង្គការសហប្រជាជាតិ សម្តែងការព្រួយបារម្ភជុំវិញរឿងនេះផងដែរ។
ការបាញ់នោះកើតមានឡើងក្នុងថ្ងៃតែមួយដែលអ៊ីរ៉ង់បានវាយប្រហារដោយគ្រាប់មីស៊ីលលើមូលដ្ឋានកងទ័ពសហរដ្ឋអាមេរិកនៅក្នុងប្រទេសអ៊ីរ៉ាក់ដើម្បីសងសឹកចំពោះការវាយប្រហារដោយយន្តហោះដ្រូនរបស់អាមេរិកាំងដែលបានសម្លាប់ឧត្តមសេនីយ៍កំពូលរបស់អ៊ីរ៉ង់មួយរូប៕
© រក្សាសិទ្ធិដោយ thmeythmey.com
