ក្នុងកិច្ចប្រជុំសភានៅថ្ងៃទី៨ ខែមេសា រដ្ឋមន្រ្តីសុខាភិបាលឥណ្ឌូណេស៊ី Budi Gunadi Sadiki បញ្ជាក់ ថា ឥណ្ឌូណេស៊ីនឹងទទួលវ៉ាក់សាំងរបស់ AstraZeneca ត្រឹមតែ២០លានដូសប៉ុណ្ណោះក្រោមកិច្ច ព្រមព្រៀងទ្វេភាគីជាមួយក្រុមហ៊ុន AstraZeneca ផ្ទាល់ក្នុងឆ្នាំ ២០២១នេះ។ ប៉ុន្តែក្រោមការឯកភាព គ្នាដំបូង ឥណ្ឌូណេស៊ីត្រូវទទួលបានវ៉ាក់សាំងដល់ទៅ៥០លានដូស។ វ៉ាក់សាំង៣០លានដូសដែល នៅសល់ នឹងត្រូវដឹកជញ្ជូនទៅដល់ឥណ្ឌូណេស៊ីនៅត្រីមាសទី២ ក្នុងឆ្នាំ២០២២ខាងមុខ។ 
 

ឥណ្ឌូណេស៊ី ក៏នឹងទទួលបានវ៉ាក់សាំងរបស់ AstraZeneca ចំនួន៥៤លានដូសផ្សេងទៀតតាម យន្តការ COVAX ផងដែរ។ ប៉ុន្តែការដឹកជញ្ជូនវ៉ាក់សាំងសម្រាប់ខែមេសានៅតែយឺតយ៉ាវ ព្រោះឥណ្ឌា បានរឹតត្បិត ការនាំចេញវ៉ាក់សាំងដើម្បីទុកសម្រាប់ប្រជាជនខ្លួនឱ្យបានគ្រប់គ្រាន់ក្នុងពេលប្រទេស កំពុងមានការឆ្លងរាលដាលកូវីដ-១៩ យ៉ាងខ្លាំង។ 
 

«វាជាអ្វីដែលយើងមិនអាចទទួលបានយកបានឡើយ។ យើងកំពុងចរចាជាមួយ AstraZeneca ។» លោក Budi បញ្ជាក់បែបនេះដែលត្រូវបានផ្សាយដោយទីភ្នាក់ងារព័ត៌មាន Reuters ។ 

មន្រ្តីជាន់ខ្ពស់ក្រសួងសុខាភិបាលឥណ្ឌូណេស៊ី បានអះអាងដែរថា ការពន្យារពេលនេះ អាចប៉ះពាល់ កម្មវិធីចាក់វ៉ាក់សាំងរបស់ឥណ្ឌូណេស៊ី ប្រសិនបើឥណ្ឌូណេស៊ី មិនទទួលបានវ៉ាក់សាំងផ្សេងបន្ថែម ទៀតជាការជំនួសទេនោះ។
 

ឥណ្ឌូណេស៊ីបានទទួលវ៉ាក់សាំងរបស់ AstraZeneca ចំនួន១,១លានដូស តាមយន្តការ COVAX តាំងពីខែមីនា។ បន្ថែមពីលើវ៉ាក់សាំងរបស់ AstraZeneca ប្រទេសនេះពឹងផ្អែកយ៉ាងខ្លាំងទៅលើ វ៉ាក់សាំងក្រុមហ៊ុនចិន Sinovac Biotech សម្រាប់កម្មវិធីចាក់វ៉ាក់សាំងរបស់ខ្លួន។ 
 

រដ្ឋាភិបាលឥណ្ឌូណេស៊ីបានចាប់ផ្តើមការចាក់វ៉ាក់សាំងក្នុងប្រទេសតាំងពីខែមករា ដោយរំពឹងអាចចាក់ ឱ្យប្រជាជនចំនួន១៨១,៥លាននាក់ក្នុងរយៈពេលមួយឆ្នាំ។ ឥណ្ឌូនេស៊ីបានចាក់វ៉ាក់សាំងដូស ទីមួយ ឱ្យប្រជាជនយ៉ាងហោចណាស់ជាង៩លាននាក់រួចមកហើយ។ 
 

ប្រទេសនៅតំបន់អាស៊ីអាគ្នេយ៍មួយនេះ មានស្ថានភាពឆ្លងរាលដាលធ្ងន់ធ្ងរជាងគេនៅក្នុងទ្វីបអាស៊ី។ គិតមកត្រឹមថ្ងៃទី៧ ខែមេសា ឥណ្ឌូណេស៊ីមានករណីវិជ្ជមានសរុបជាង ១,៥៤ លានករណី និងមាន អ្នកស្លាប់ជាង៤ម៉ឺននាក់៕