តាមរយៈលិខិត ជូនទៅបណ្តាអង្គភាពក្រោមឱវាទនៃអគ្គនាយកដ្ឋានអន្តោប្រវេសន៍ នៅថ្ងៃទី៧ ខែមេសា លោក គៀត ច័ន្ទថារិទ្ធ ជំរុញឲ្យមន្រ្តីនគរបាល ដែលមិនទាន់បានចាក់វ៉ាក់សាំង ទៅចាក់វ៉ាក់សាំង។ ជាមួយគ្នានេះ លោក ប្រាប់ទៅគ្រប់នាយកដ្ឋានក្នុងអគ្គនាយកដ្ឋានអន្តោប្រវេសន៍ ឲ្យស្រង់ឈ្មោះមន្រ្តីនគរបាល ដែលបានចាក់វ៉ាក់សាំង និងស្រង់ឈ្មោះមន្រ្តីនគរបាល ដែលមិនទាន់បានចាក់វ៉ាក់សាំង ឲ្យបានទាំងអស់គ្នា ត្រឹមថ្ងៃទី១០ ខែមេសា។ 
 

បើតាមលិខិតរបស់លោក គៀត ច័ន្ទថារិទ្ធ មន្រ្តីនគរបាលនៃអគ្គនាយកដ្ឋានអន្តោប្រវេសន៍ជាង៨០ភាគរយហើយ បានចាក់វ៉ាក់សាំងបង្ការជំងឺកូវីដ-១៩ ដោយនៅតែមួយចំនួនប៉ុណ្ណោះ ដែលមិនទាន់បានចាក់។ លោក គៀត ច័ន្ទថារិទ្ធ ណែនាំថា មន្រ្តីណា ដែលមានបញ្ហាសុខភាព មិនអាចចាក់វ៉ាក់សាំងបាន ត្រូវមានលិខិតបញ្ជាក់ពីគ្រូពេទ្យ។ 
 

លោក ព្រុំ សុខា រដ្ឋមន្រ្តីក្រសួងមុខងារសាធារណៈ បានស្នើទៅគ្រប់ក្រសួង ស្ថាប័ន អង្គភាព រួមទាំងរាជធានី ខេត្ត ឲ្យស្រង់ឈ្មោះមន្រ្តីរាជការស៊ីវិល ដែលមិនបានចាក់វ៉ាក់សាំង ហើយបញ្ជូនទៅក្រសួងមុខងារសាធារណៈ ដើម្បីយកជូនសម្តេចនាយករដ្ឋមន្រ្តី ហ៊ុន សែន។ 
 

សម្តេចប្រមុខរដ្ឋាភិបាល ផ្ញើសារទៅកាន់មន្រ្តីរាជការថា បើអ្នកណា មិនព្រមទៅចាក់វ៉ាក់សាំងបង្ការជំងឺកូវីដ-១៩ អ្នកនោះមិនបាច់បាច់ចូលទៅធ្វើការនៅតាមស្ថាប័នខ្លួនវិញទេ៕