ជាតិ
សេដ្ឋកិច្ច
អាមេរិកឱ្យ១,៦លានដុល្លារដល់កម្ពុជា ដើម្បីបោសសម្អាតគ្រាប់បែកចង្កោមសល់ពីសង្គ្រាម រូបថត៖ ពីហ្វេសប៊ុក លោក ហេង រតនា អគ្គនាយក CMAC
× ភ្នំពេញ៖ រដ្ឋាភិបាលអាមេរិកតាមរយៈអង្គការជំនួយប្រជាជនន័រវែស (NPA) បានផ្តល់ជំនួយជាថវិកាចំនួន១,៦លានដុល្លារ ដល់មជ្ឈមណ្ឌលសកម្មភាពកម្ចាត់មីនកម្ពុជា (CMAC) ដើម្បីបោសសម្អាតគ្រាប់បែកចង្កោមដែលនៅសល់ពីសង្រ្គាម នៅភាគខាងកើតនៃប្រទេសកម្ពុជា។ ជំនួយនេះ គឺបានចុះហត្ថលេខាដោយ លោក ហេង រតនា អគ្គនាយក CMAC ជាមួយនឹងលោក Rune Kristian Dale-Andresen ប្រធានអង្គការ NPA ប្រចាំកម្ពុជា នារសៀលថ្ងៃទី៩មេសា ឆ្នាំ២០២១។
លោក ហេង រតនា អះអាងលើទំព័រហ្វេសប៊ុករបស់លោកថា ថវិកាចំនួនថវិកា១,៦លានដុល្លារ ដែលជាជំនួយរបស់អាមេរិកនេះ គឺសម្រាប់ចំណាយរយៈពេល១ឆ្នាំ ចាប់ខែមីនា ឆ្នាំ២០២១ ដល់ ខែកុម្ភៈ ឆ្នាំ២០២២ លើគម្រោងអនុវត្តសកម្មភាពកម្ចាត់មីន។ លោក ហេង រតនា បានបញ្ជាក់ថា ការអនុវត្តគម្រោងនេះ ត្រូវប្រើប្រាស់កម្លាំងជំនាញរបស់អង្គភាព CMAC ជាង២០០នាក់។
លោក រម្លឹកថា សម្រាប់ឆ្នាំ២០២០-២០២១ CMAC បានសម្រចលទ្ធផល ក្នុងការរំដោះតំបន់គ្រាប់បែកចង្កោម បានចំនួន១១៣គម្រោង ដោយបានរកឃើញនិងកម្ទេចចោលគ្រាប់បែកចង្កោមនិងគ្រាប់យុទ្ធភ័ណ្ឌមិនទាន់ផ្ទុះគ្រប់ប្រភេទបានជាង១,១ម៉ឺនគ្រាប់។
ចាប់ពីឆ្នាំ១៩៧៩ ដល់ ឆ្នាំ២០២០ កម្ពុជាមានប្រជាពលរដ្ឋជិត២ម៉ឺននាក់បានស្លាប់ និងរងរបួសដោយពិការដាច់ដៃជើងជាង៤,៥ម៉ឺននាក់ផ្សេងទៀត ដោយសារគ្រាប់មីន និងគ្រាប់សំណល់ជាតិផ្ទុះ។
កម្ពុជា ត្រូវបន្តបោសសម្អាតផ្ទៃដី ដែលមានមីនចំនួន៨៤៥គីឡូម៉ែត្រការ៉េ និងផ្ទៃដី ដែលមានសំណល់ជាតិផ្ទុះពីសង្គ្រាមរួមទាំងគ្រាប់បែកចង្កោម ចំនួន១៣១៦គីឡូម៉ែត្រការ៉េ បន្ថែមទៀត ក្នុងការសម្រេចឱ្យបាននូវចក្ខុវិស័យតាមផែនការយុទ្ធសាស្ត្រជាតិ«កម្ពុជាមួយគ្មានមីនឆ្នាំ២០២៥»៕
Tag:
CMAC
មីន
គ្រាប់បែកចង្កោម
លោក ហេង រតនា
© រក្សាសិទ្ធិដោយ thmeythmey.com