ប្រមុខរដ្ឋាភិបាលកម្ពុជា បានអរគុណដល់សមាគមមីក្រូហិរញ្ញវត្ថុកម្ពុជា និងធនាគារជាតិកម្ពុជា ដែលមានវិធានការជួយសម្រួលការសងប្រាក់ ដល់អ្នកមានជំងឺកូវីដ-១៩ និងស្នើបន្ថែមពេលសងប្រាក់ដល់អ្នកកើតជំងឺកូវីដ-១៩។

 

ធនាគារ-គ្រឹះស្ថានមីក្រូហិរញ្ញវត្ថុ កាលពីថ្ងៃទី៧ មេសា បានចេញសេចក្ដីប្រកាសថា រាល់អតិថិជនដែលឆ្លងជំងឺកូវីដ-១៩ ត្រូវបង្ហាញលទ្ធផលតេស្តវិជ្ជមានកូវីដ-១៩ ដែលចេញដោយអាជ្ញាធរ ទៅកាន់ធនាគារ ឬគ្រឹះស្ថានមីក្រូហិរញ្ញវត្ថុ ដើម្បីទទួលបានការលើកលែងបង់ប្រាក់ដើមរយៈពេល៣ខែ។ និងអនុញ្ញាតមិនឲ្យបង់ការប្រាក់រយៈពេល១ខែ ហើយរួចផុតពីការផាកពិន័យគ្រប់យ៉ាង។

 

វិធានការនេះត្រូវបានប្រមុខរដ្ឋាភិបាលសម្ដេច ហ៊ុន សែន គាំទ្រយ៉ាងពេញទំហឹង ប៉ុន្តែនាយករដ្ឋមន្រ្តីបានស្នើដល់ធនាគារ-គ្រឹះស្ថានមីក្រូហិរញ្ញវត្ថុ ពិចារណា ក្នុងការបន្ថែមពេលដើម្បីបង់ប្រាក់។ «ចំណុចនេះល្អហើយ បើសិនអាចបន្ថែមពេលបានក៏គួរតែបន្ថែម។ ឧទាហរណ៍៖ លើកលែងការប្រាក់រយៈពេល១ខែ ប្រសិនបើពន្យាបាន ២ខែវាជាការល្អ នេះជាការស្នើរបស់ខ្ញុំ»។ នេះជាប្រសាសន៍របស់នាយករដ្ឋមន្រ្តី ហ៊ុន សែន។

 

ក្នុងន័យនេះសម្ដេចចង់ឲ្យធនាគារ-គ្រឹះស្ថានមីក្រូហិរញ្ញវត្ថុ ពិចារណាលើអតិថិជនរបស់ខ្លួន ក្នុងអំឡុងវិបត្តិកូវីដ-១៩ ព្រោះមិនមែនគ្រប់អតិថិជនសុទ្ធតែលំបាកនោះទេ ក្នុងស្ថានភាពនេះ ដោយមានអ្នកខ្លះ ទទួលបានប្រាក់ចំណូលកើនឡើងក៏មាន។

 

គិតត្រឹមដំណាច់ខែកុម្ភៈឆ្នាំ២០២១ សមាគមធនាគារ និងសមាគមមីក្រូហិរញ្ញវត្ថុ មានអតិថិជនប្រមាណ៣៤ម៉ឺននាក់ ទទួលបានការរៀបចំឥណទានឡើងវិញ ក្នុងទំហំឥណទានប្រមាណ៤ពាន់លានដុល្លារ ដោយក្នុងនោះ សមាគមមីក្រូហិរញ្ញវត្ថុកម្ពុជា បានរៀបចំឥណទានឡើងវិញជូនអតិថិជនរហូតដល់៣០ម៉ឺននាក់ ក្នុងទំហំឥណទាន ១,៤ពាន់លានដុល្លារ៕