ក្នុងចំណោមករណីថ្មីទាំង៩៦៧នាក់ដែលជាតួលេខខ្ពស់បំផុតមិនធ្លាប់មាននៅថ្ងៃ មានបីករណីជាករណីនាំចូល ឯករណីវិជ្ជមាន៩៦៤នាក់ទៀត ត្រូវរកឃើញនៅតាមមន្ទីរពេទ្យ និងការធ្វើតេស្តទូទាំងប្រទេស។ មិនមានរបាយការណ៍អ្នកស្លាប់ឡើយសម្រាប់ថ្ងៃទី១០ ខែមេសា ដែលធ្វើឱ្យចំនួនអ្នកស្លាប់សរុបមាន៩៧ដដែល។ តួលេខឆ្លងសរុបនៅថៃមានជាងបីម៉ឺននាក់។    

 

សម្រាប់របាយការណ៍២៤ម៉ោងចុងក្រោយទីក្រុងបាងកក ដែលកំពុងរងការវាយប្រហារដោយការឆ្លងជាចង្កោមចេញពីក្លិបកម្សាន្តនោះ មានករណីឆ្លងច្រើនជាងគេ ជាមួយករណីថ្មី២៣៦នាក់, ខេត្តឈៀងម៉ៃមាន១៨៩ករណី ជលបុរីមាន១៨០ករណី និងសមុទ្រសាគរ៤៨ករណីផងដែរ។ នេះបើតាមកាសែតបាងកកប៉ុស្តិ៍។

 

លោក Sophon Iamsirithaworn នាយករងនាយកដ្ឋានគ្រប់គ្រងជំងឺឆ្លងរបស់ថៃ លើកឡើងថា ករណីឆ្លងភាគច្រើនជាប់ទាក់ទងចង្កោមដែលផ្ទុះចេញពីកន្លែងកម្សាន្តមួយចំនួនក្នុងទីក្រុងបាងកក ហើយរាលដាលដល់បណ្ដាខេត្តនានា។ លោកចាត់ទុកស្ថានភាពបច្ចុប្បន្ន ជារឿងគួរឱ្យបារម្ភ ខណៈករណីឆ្លងជាច្រើន ក៏កើតចេញពីក្លិបកម្សាន្តតាមខេត្តថែមទៀត។

 

សម្រាប់ទីក្រុងបាងកក អភិបាលទីក្រុងនេះលោក Aswin Khwanmuang ជឿជាក់ថា មន្ទីរពេទ្យក្នុងក្រុងមានគ្រែគ្រប់គ្រាន់ដើម្បីទទួលអ្នកជំងឺ ខណៈករណីឆ្លងដែលផ្ដើមចេញពីកន្លែងកម្សាន្តក្នុងខណ្ឌ Thong Lor កើនឡើងរហ័ស។ លោកបន្តថា រដ្ឋបាលក្រុង មានមន្ទីរចល័តត្រៀមព្យាបាលអ្នកជំងឺ ដែលសាងសង់តាំងពីរលកឆ្លងទីមួយមក៕