ប្រភពដដែល ឱ្យដឹងទៀតថា ក្នុងចំណោមក្រុមមនុស្សដែលមានវិជ្ជមានជំងឺកូវីដ-១៩ ទាំង ៨៩១នាក់ មាន ៣៤៥នាក់ ពាក់ព័ន្ធនឹងការផ្ទុះចេញពីផ្សារអូរឫស្សី និងមនុស្សចំនួន ៥៤៦នាក់ទៀត ពាក់ព័ន្ធ នឹងរោងចក្រឌីន ហាន។ ក្រុមការងារស្រាវជ្រាវជំងឺកូវីដ-១៩ បន្តអំពាវនាវឲ្យអ្នកពាក់ព័ន្ធ នឹងក្រុមមនុស្សទាំងពីរទីតាំង រួសរាន់ទៅឲ្យគ្រូពេទ្យពិនិត្យយកសំណាក រកជំងឺកូវីដ-១៩ ដើម្បីទប់ស្កាត់ការឆ្លងរាលដាលកាន់តែធ្ងន់ធ្ងរ។ 

 

កាលពីថ្ងៃទី៣ ខែមេសា រដ្ឋបាលរាជធានីភ្នំពេញ បានប្រកាសបិទផ្សារអូរឫស្សី ជាបណ្ដោះអាសន្ន រយៈពេល ១៤ថ្ងៃ ក្រោយរកឃើញអាជីវករ និងសន្តិសុខផ្សារ មានវិជ្ជមានជំងឺកូវីដ-១៩។ សម្រាប់រោងចក្រឌីន ហាន ដែលស្ថិតក្នុងខណ្ឌមានជ័យវិញ ក៏ត្រូវបានបិទបណ្ដោះអាសន្នដែរ បន្ទាប់ពីកម្មករ កម្មការិនីជាច្រើននាក់ឆ្លងកូវីដ-១៩ និងអ្នកពាក់ព័ន្ធរាប់រយនាក់ទៀត។

 

បើតាមរបាយការណ៍របស់ក្រសួងសុខាភិបាល គិតមកដល់ពេលនេះ កម្ពុជាមានករណីឆ្លងកូវីដ-១៩ សរុប ៤ ២៣៨ករណី ក្នុងនោះ ៣៧០៥នាក់ ពាក់ព័ន្ធនឹងព្រឹត្តិការណ៍សហគមន៍ ២០កុម្ភៈ។ អ្នកជំងឺសរុប ២១៥២នាក់ បានជាសះស្បើយ រីឯអ្នកស្លាប់ឡើងដល់២៩នាក់។ អ្នកជំងឺកូវីដ-១៩ នៅកម្ពុជាបច្ចុប្បន្ន មានចំនួន ២ ០៥២នាក់ តែក្នុងនោះ មានអ្នកជំងឺ ១ ០៦៤ នាក់ នៅមិនទាន់ត្រូវបានបញ្ជូនទៅកាន់កន្លែងសម្រាកព្យាបាលនៅឡើយ។

 

ក្រៅពីភ្នំពេញ ដែលជាតំបន់មានហានិភ័យឆ្លងខ្ពស់ ក្នុងនោះមានខេត្តកណ្តាល ព្រះសីហនុ ព្រៃវែង ស្វាយរៀង សៀមរាប ត្បូងឃ្មុំ កំពង់ធំ កំពង់ចាម កែប តាកែវ បាត់ដំបង កំពត កំពង់ឆ្នាំង និងពោធិ៍សាត់ ដែលមានករណី២០កុម្ភៈ។ ក្នុងចំណោមនោះ ខេត្តមួយចំនួនដូចជាបាត់ដំបង និងកំពង់ធំ ក៏បានព្យាបាលសះស្បើយអស់ផងដែរ៕