បើតាមការប្រកាសរបស់ក្រសួងសុខាភិបាល នៅថ្ងៃទី១២ មេសា មនុស្សទាំង៩នាក់ ដែលមិនទាន់មកទទួលការព្យាបាល ស្ថិតក្នុងចំណោមមនុស្សចំនួន ៥៦នាក់ ដែលក្រសួងសុខាភិបាលប្រកាសរកអត្តសញ្ញាណកាលពីថ្ងៃទី៩ មេសា កន្លងមក។

 

ក្នុងចំណោមមនុស្សទាំង៩នាក់ មាន៦នាក់ជាកម្មកររោងចក្រឌីនហាន ២នាក់ជាអាជីវករនៅផ្សារអូរឫស្សី និងម្នាក់ទៀតជាពលរដ្ឋរស់នៅ ក្នុងសង្កាត់ផ្សារកណ្ដាល ខណ្ឌដូនពេញ។ បើតាមក្រសួងសុខាភិបាល ក្នុងករណីសាមីខ្លួនមិនមកបង្ហាញខ្លួនតាមការកំណត់ រដ្ឋបាលរាជធានីភ្នំពេញ នឹងចាត់វិធានការតាមច្បាប់ ដោយកសាងសុំណុំរឿងបញ្ជូនទៅតុលា និងត្រូវផ្ដន្ទាទោសដាក់ពន្ធនាគារពីមួយឆ្នាំទៅប្រាំឆ្នាំ និងពិន័យជាប្រាក់ ៥លានរៀលទៅ ២០លានរៀល និងត្រូវផ្ដន្ទាទោសដាក់ពន្ធនាគារពី ៥ឆ្នាំទៅ ១០ឆ្នាំ ប្រសិនបុគ្គលនោះបានចម្លងវីរុសកូវីដ-១៩ ទៅបុគ្គលផ្សេងទៀត។

 

គិតមកដល់ពេលនេះ កម្ពុជាមានករណីឆ្លងកូវីដ-១៩ សរុប៤៥១៥ករណី ក្នុងនោះ៣៩៨២នាក់ពាក់ព័ន្ធនឹងព្រឹត្តិការណ៍សហគមន៍២០កុម្ភៈ។ អ្នកជំងឺសរុប២២១២ នាក់ បានជាសះស្បើយ រីឯអ្នកស្លាប់ឡើងដល់៣០នាក់៕