សហព័ន្ធកីឡាបាល់ទាត់ទ្វីបអឺរ៉ុប (UEFA) បានបង្ហាញទីក្រុងចំនួន៨ ចំណោម១២ ដែលអាចអនុញ្ញាតឱ្យមានអ្នកគាំទ្រចូលទស្សនាផ្ទាល់ ក្នុងការប្រកួតពានរង្វាន់អឺរ៉ុប Euro ឆ្នាំ ២០២០ បើទោះនៅមានការរាតត្បាតជំងឺកូវីដ-១៩។
ចំណោមក្រុងទាំង១២ ដែលត្រូវដឹកនាំធ្វើម្ចាស់ផ្ទះព្រឹត្តិការណ៍អឺរ៉ុប មានតែ៤ក្រុងប៉ុណ្ណោះរួមមានទីក្រុង មុយនិច (អាល្លឺម៉ង់), រ៉ូម (អ៊ីតាលី), ប៊ីលបៅ (អេស្ប៉ាញ) និងឌុយប្លាំង (អៀរឡង់) ដែលមានពេលរហូតដល់ថ្ងៃទី១៩ ខែមេសាដើម្បីផ្តល់ព័ត៌មានបន្ថែមជុំវិញការអនុញ្ញាតឱមានអ្នកគាំទ្រចូលទីលាន ឬក៏អត់។
ការប្រកួត Euro ២០២០ ដែលមានក្រុមជម្រើសជាតិ ២៤ប្រទេសចូលរួមបានពន្យារពេល១ឆ្នាំ ដោយសារការរីករាលដាលនៃជំងឺ COVID-19។ ដើមឡើយការប្រកួតដែលតម្រូវឱ្យរៀបចំ៤ឆ្នាំម្តង ត្រូវដំណើរការក្នុងខែមីនា ឆ្នាំ២០២០ តែត្រូវដូរទៅរៀបចំនៅឆ្នាំ ២០២១ វិញ ដែលចាប់ផ្តើមពីថ្ងៃទី១១ ខែមិថុនា ដល់ថ្ងៃទី១១ ខែកក្កដា ដោយត្រូវប្រើប្រាស់កីឡដ្ឋានធំៗចំនួន១២ ស្ថិតក្នុងទីក្រុង និងប្រទេសចំនួន១២ផ្សេងគ្នា។
ដោយឡែក្រុងចំនួន៨ រួមមានក្រុងឡុងដ៍ (អង់គ្លេស), ហ្គេសហ្គោ, អាំស្ទែដាំ (ហូឡង់), កូផិនហាហ្គែន (ដាណឺម៉ាក), ភីធ័រស្បឺក (រុស្ស៊ី), ប៊ុយដាប៉ែស (ហុងគ្រី), បាគូ (អាស៊ែបៃហ្សង់), និង ប៊ុយការ៉េស (រូម៉ានី) ត្រូវបាន UEFA ប្រកាសថាសុទ្ធតែឱ្យមានអ្នកគាំទ្រចូលកីឡដ្ឋាន ដោយកម្រិតចំនួនចន្លោះពី២៥ ទៅ៥០ភាគរយនៃចំនួនផ្ទុកសរុប។
ក្រុមទាំង២៤ដែលត្រូវប្រកួតប្រជែងគ្នាដណ្តើមពានរង្វាន់ Euro 2020៖
ពូល A តួកគី អ៊ីតាលី វែល និងស្វ៊ីស
ពូល B ដាណឺម៉ាក ហ្វាំងឡង់ បែលហ្ស៊ិក និងរុស្ស៊ី
ពូល C ហូឡង់ អ៊ុយក្រែន អូទ្រីស និងម៉ាសេដ្វានខាងជើង
ពូល D អង់គ្លេស ក្រូអាស៊ី ស្កុតឡែន និងឆែក
ពួល E អេស្ប៉ាញ ស៊ុយអែត ប៉ូឡូញ និងស្លូវេនី
ពូល F ហុងគ្រី ព័រទុយហ្គាល់ បារាំង និងអាល្លឺម៉ង់៕