សម្តេច ហ៊ុន សែន ដែលបានថ្លែងចេញពីគេហដ្ឋាននៅទីក្រុងតាខ្មៅ នាព្រឹកថ្ងៃទី១០មេសា បានបញ្ជាក់ថា រដ្ឋាភិបាលនៅតែបន្តរក្សាកំណើន ក្នុងការទទួលបានប្រាក់ចំណូលពីការប្រមូលពន្ធដារ និងពន្ធគយ នៅក្នុងវិបត្តិនៃជំងឺកូវីដ-១៩ ដែលកំពុងឆ្លងរាលដាលនៅកម្ពុជា។ 

 

«ខែ៣[ខែមីនា ឆ្នាំ២០២១] កន្លងទៅ ចំណូលថវិកាផ្នែកពន្ធដាទទួលបានជាង៦០០លានដុល្លារ និង ផ្នែកគយទទួលបានជាង ២០០លានដុល្លារ។ សរុបជាង ៨០០លានដុល្លារ។ បើពន្ធដារគិតទាំងខែ១ និងខែ២ បូកនឹងខែ៣ បានជាង ១ពាន់លានដុល្លារ រួចទៅ។ ឯផ្នែកគយទាំង៣ខែ បាន[ចំណូល] ជាង៦០០លានដុល្លាររួចទៅហើយ»។ នេះបើតាមសម្តេច ហ៊ុន សែន ។

 

ប្រមុខរដ្ឋាភិបាល សម្តេច ហ៊ុន សែន បានអះអាងថា ចំណូលថវិកាជាតិដែលបានពីការប្រមូលពន្ធដារ និងពន្ធគយ ក្នុងត្រីមាសមួយនៃឆ្នាំ២០២១នេះ រួមជាមួយនឹងសាច់ប្រាក់ដែលរដ្ឋាភិបាលបានសន្សំទុក គឺអាចធានាបើកប្រាក់បៀវត្សដល់មន្ត្រីរាជការរបស់ខ្លួនបាន ជាង៣ឆ្នាំទៀត៕