មេដឹកនាំអាមេរិក និងរុស្ស៊ី បានជជែកគ្នាតាមទូរសព្ទជាមួយគ្នានៅថ្ងៃទី១៣ ខែមេសា ដោយបញ្ហាអ៊ុយក្រែនជាប្រធានបទសំខាន់។ នេះជាការសន្ទនាតាមទូរសព្ទលើកទីពីររវាងប្រធានាធិបតីអាមេរិក និងរុស្ស៊ី ដែលធ្វើឡើងស្របពេលស្ថានការណ៍តាមបណ្ដោយព្រំដែនរុស្ស៊ី-អ៊ុយក្រែនតានតឹងខ្លាំង ដោយសារការបង្កើនវត្តមានយោធារបស់រុស្ស៊ី។

 

បើតាមសេចក្ដីថ្លែងការណ៍របស់សេតវិមាន លោក ចូ បៃឌិន បានបង្ហាញក្ដីបារម្ភទាក់ទងការបង្កើនចំនួនទ័ពយ៉ាងរហ័សរបស់រុស្ស៊ីនៅតំបន់គ្រីមេ និងព្រំដែនជាមួយអ៊ុយក្រែន ហើយក៏ស្នើឱ្យលោក ពូទីន បន្ធូរភាពតានតឹង។ ប្រធានាធិបតីអាមេរិក ក៏បង្ហាញការតាំងចិត្តក្នុងការបង្កើតទំនាក់ទំនងមានស្ថិរភាព និងអាចទស្សទាយបានជាមួយរុស្ស៊ីដែលស្របតាមប្រយោជន៍អាមេរិក និងស្នើរៀបចំជំនួបកំពូលនៅប្រទេសទីបីណាមួយដើម្បីជជែកពីបញ្ហាដែលប្រទេសទាំងពីរជួបប្រទះ។

 

វាជារឿងគួរឱ្យភ្ញាក់ផ្អើលដែលលោក បៃឌិន ស្នើជួបលោក ពូទីន ផ្ទាល់បែបនេះ។ លោក ពូទីន ក៏ធ្លាប់ចង់ជួបលោក បៃឌិន ដែរតែតាមប្រព័ន្ធអនឡាញពេលលោក បៃឌិន ថា លោកជាឃាតករ។ មេដឹកនាំរុស្ស៊ីរូបនេះ ធ្លាប់មានជំនួបបែបនេះនៅឆ្នាំ២០១៨ ជាមួយលោក ដូណាល់ ត្រាំ នៅទឹកដីហ្វាំងឡង់។ អ្នកនាំពាក្យសេតវិមាន Jen Psaki បញ្ជាក់ថា ជំនួបត្រូវបានស្នើហើយ ដែលអាចធ្វើនៅរដូវខាងមុខ។

 

សេចក្ដីប្រកាសរបស់វិមានក្រេមឡាំងវិញបញ្ជាក់ថា រុស្ស៊ី និងអាមេរិកបង្ហាញការត្រៀមខ្លួនបន្តកិច្ចសន្ទនាលើបញ្ហាសំខាន់ដើម្បីធានាសន្តិសុខសាកលលោក។ សេចក្ដីប្រកាសដដែលក៏លើកឡើងពីសំណើរបស់លោក បៃឌិន តែមិនបញ្ជាក់ថា លោក ពូទីន ទទួលយកឬអត់ឡើយ។

 

ស្របពេលបារម្ភពីលទ្ធភាពដែលរុស្ស៊ីអាមេរិកបើកយុទ្ធនាការចូលអ៊ុយក្រែន រដ្ឋមន្ត្រីការបរទេអ៊ុយក្រែន Dmytro Kuleba បានធ្វើដំណើរទៅកាន់ទីស្នាក់ការសម្ពន្ធយោធាណាតូ ដោយជួបមន្រ្តីជាន់ខ្ពស់ណាតូ ក៏ដូចជារដ្ឋមន្រ្តីការបរទេសអាមេរិក អាន់តូនី ប្ល៊ីងខិន ផងដែរ។ លោក ប្ល៊ីងខិន ត្រូវបានរាយការណ៍ថា បង្ហាញការគាំទ្រលើទីក្រងកៀវ៕