COVID-19
ជាតិ
អាជ្ញាធរខេត្តសៀមរាប សម្រេចបិទខ្ទប់សង្កាត់ស្វាយដង្គំ សាលាកំរើក និងសង្កាត់សៀមរាប ២សប្តាហ៍
× រដ្ឋបាលខេត្តសៀមរាប បានសម្រេចបិទខ្ទប់សង្កាត់ចំនួន ៣ រយៈពេល២សប្តាហ៍ គឺសង្កាត់ ស្វាយដង្គំ សង្កាត់សាលាកំរើក និងសង្កាត់សៀមរាប។ វិធានការបិទខ្ទប់នេះ ត្រូវអនុវត្តចាប់ពីម៉ោង ០ ថ្ងៃទី ១៦ មេសាបា រហូតដល់ថ្ងៃទី ២៩ មេសា ដើម្បីធានាដល់ប្រសិទ្ធភាពនៃការគ្រប់គ្រងការឆ្លង រាលដាលនៃជំងឺកូវីដ-១៩ នៅក្នុងភូមិសាស្ត្របិទខ្ទប់ និងទប់ស្កាត់ជំងឺនេះមិនឱ្យរាលដាលទៅតំបន់ផ្សេង។
គួរសម្គាល់ថា វិធានការនេះត្រូវបានដាក់ចេញបន្ទាប់ពី នៅប៉ុន្មានថ្ងៃមកនេះ មានអាជីវករផ្សារដល់ទៅ៧នាក់ហើយ ដែលមានវិជ្ជមានកូវីដ-១៩ គិតត្រឹមរសៀលថ្ងៃទី១៥ ខែមេសា។ ករណីទីមួយ គឺកើតលើឈ្មោះ អ៊ឹង ខៃលី ភេទប្រុស អាយុ២១ឆ្នាំ មុខរបរលក់គ្រឿងក្រអូបនៅផ្សារក្រោម ដែលពាក់ព័ន្ធនឹងបុរសអ្នករត់តាក់ស៊ី ដែលវិជ្ជមានកូវីដ១៩ នៅចុងខែមីនាកន្លងទៅ។ គិតត្រឹមថ្ងៃដដែល សម្រាប់ព្រឹត្តិការណ៍សហគមន៍ ២០កុម្ភៈ ខេត្តសៀមរាប មានករណីអ្នកវិជ្ជមានកូវីដ១៩ចំនួន ២០នាក់ហើយ ក្នុងនោះបានជាសះស្បើយចំនួន ៣នាក់។
តាមសេចក្តីសម្រេច របស់រដ្ឋបាលខេត្តសៀមរាប នៅអំឡុងពេលបិទខ្ទប់នេះ បុគ្គលគ្រប់រូប នឹងត្រូវបានហាមឃាត់ការធ្វើដំណើរចេញពីផ្ទះ លើកលែងតែចាំបាច់មួយចំនួន ដូចជាទៅកន្លែងធ្វើការ និងប្រកបអាជីវកម្ម ក្នុងតំបន់បិទខ្ទប់ ដោយមានលិខិតអនុញ្ញាតពីអាជ្ញាធរ។ ការធ្វើដំណើរទៅកន្លែងលក់ម្ហូប គ្រឿងឧបភោគបរិភោគ និងសម្ភារប្រើប្រាស់ចាំបាច់ប្រចាំថ្ងៃ និងការធ្វើដំណើរទៅមន្ទីរពេទ្យ មណ្ឌលសុខភាព ឬឱសថស្ថាន ដោយបញ្ហាសុខភាពបន្ទាន់ ក៏ស្ថិតក្នុងករណីលើកលែងដែរ។ ក្រៅពីនេះ ការធ្វើដំណើរបំពេញបេសកកម្មរបស់ក្រុមគ្រូពេទ្យ មន្ត្រីរាជការ ក្រុមពន្លត់អគ្គិភ័យ និងកម្លាំងប្រដាប់អាវុធ ក៏ដូចជាការធ្វើដំណើរចូលរួម ក្នុងសកម្មភាពបម្រើប្រយោជន៍សាធារណៈ និងការធ្វើដំណើរដោយមូលហេតុចាំបាច់ និងបន្ទាន់ ក៏ត្រូវមានការអនុញ្ញាត ពីអាជ្ញាធរជាមុនតាមការស្នើសុំដែលកំណត់របស់អាជ្ញាធរ ក៏នឹងត្រូវបានលើកលែងដែរ។
បើទោះជាស្ថិតក្នុងករណីលើកលែងការធ្វើដំណើរក៏ដោយ ប៉ុន្តែបុគ្គលគ្រប់រូប ត្រូវមានកាតព្វកិច្ច ពាក់ម៉ាស់ និងរក្សាគម្លាតសុវត្ថិភាព ព្រមទាំងប្រកាន់ខ្ជាប់ការអនាម័យ និងការវាស់កម្ដៅ ដើម្បីទប់ស្កាត់ការចម្លងមេរោគ។ នេះបើតាមសេចក្តីសម្រេចដដែល។
រាល់ការជួបជុំ និងប្រមូលផ្ដុំទាំងអស់ក្នុងតំបន់បិទខ្ទប់ ត្រូវបានហាមឃាត់ លើកលែងតែករណីចាំបាច់មួយចំនួនដូចជា ជួបជុំក្នុងចំណោមសមាជិកគ្រួសារក្នុងលំនៅដ្ឋាន ការរៀបចំពិធីបុណ្យសពតាមលំនៅដ្ឋានរៀងៗខ្លួន ការជួបជុំរបស់បុគ្គលិកសុខាភិបាល ដើម្បីយកសំណាកអ្នកពាក់ព័ន្ធកូវីដ-១៩ និងសង្គ្រោះបន្ទាន់ និងការជួបជុំ ដើម្បីបម្រើប្រយោជន៍សាធារណៈ។ នេះបើតាមសេចក្តីសម្រេចដដែល ដោយបានបន្តថា ចំពោះអាជីវកម្ម ដែលមិនមែនជាតម្រូវការ ក៏ត្រូវបានហាមឃាត់ លើកលែងតែករណីចាំបាច់មួយចំនួនដូចជា សកម្មភាពបំពេញការងារក្នុងក្របខណ្ឌសាធារណៈដូចជា កងកម្លាំប្រដាប់អាវុធ សេវាផ្គត់ផ្គង់អគ្គិសនី ទឹកស្អាត សេវាប្រមូល និងដឹកជញ្ជូនសំរាម ជាដើម។ អាជីវកម្ម តាមប្រព័ន្ធអនឡាញ ឱសថស្ថាន ការផ្គត់ផ្គង់ទំនិញដែលជាតម្រូវការចាំបាច់ ក៏ត្រូវបានអនុញ្ញាត។ រាល់ការធ្វើដំណើរដែលត្រូវបានអនុញ្ញាតនេះ នឹងត្រូវហាមឃាត់ក្នុងចន្លោះម៉ោង៨ ដល់ម៉ោង៥ភ្លឺ លើកលែងតែមូលហេតុសុខភាពបន្ទាន់។ ចំពោះបុគ្គលណាដែលល្មើសវិធានការ អំឡុងពេលបិទខ្ទប់នេះ នឹងត្រូវទទួលទោសដែលចែងដោយច្បាប់ស្ដីពីវិធានការទប់ស្កាត់ការឆ្លងរាលដាលនៃជំងឺកូវីដ-១៩៕
© រក្សាសិទ្ធិដោយ thmeythmey.com