ភ្នំពេញ៖ លោកស្រី ឱ វណ្ណឌីន ប្រធានគណៈកម្មការចំពោះកិច្ចចាក់វ៉ាក់សាំងកូវីដ១៩និងជាអ្នកនាំពាក្យក្រសួងសុខាភិបាល សម្រេចផ្អាកការចាក់វ៉ាក់សាំងរយៈពេល៣ថ្ងៃ គឺគិតចាប់ពីថ្ងៃទី១៧ដល់ថ្ងៃទី១៩ ហើយស្នើឲ្យពលរដ្ឋដែលធ្វើដំណើរទៅចាក់វ៉ាក់សាំងឲ្យត្រឡប់ទៅផ្ទះវិញផងដែរ។

 

«តាមការសម្រេចរបស់សម្ដេចនាយករដ្ឋមន្ត្រី ហ៊ុន សែន ការចាក់វ៉ាក់សាំងកូវីដ-១៩នៅរាជធានីភ្នំពេញ ត្រូវផ្អាកបណ្តោះអាសន្នជាបន្ទាន់ ចំនួន៣ថ្ងៃ ដោយគិតចាប់ពីថ្ងៃទី១៧ដល់១៩មេសាឆ្នាំ២០២១»។ នេះបើតាមការសារសំឡេងរបស់លោកស្រី ឱ វណ្ណឌីន ដែលចែកចាយក្នុងប្រព័ន្ធតេឡេក្រាមនៅព្រឹកថ្ងៃទី១៧មេសា ដោយបញ្ជាក់បន្ថែមថា នៅថ្ងៃទី២០មេសា ដំណើរការចាក់វ៉ាក់សាំងកូវីដ-១៩ នឹងដំណើរការជាធម្មតាឡើងវិញ។ 
 

ជាមួយគ្នាដែរ លោកស្រី ឱ វណ្ណឌីន ក៏បានអំពាវនាវឲ្យពលរដ្ឋដែលធ្វើដំណើរទៅចាក់វ៉ាក់សាំងត្រឡប់ទៅកាន់ផ្ទះរៀងៗខ្លួនវិញ ដោយរងចាំសេចក្តីជូនដំណឹងបន្ថែមអំពីការចាក់វ៉ាក់សាំងនេះ។ 

បើតាមរបាយការណ៍ក្រសួងសុខាភិបាលបានបង្ហាញថា រយៈពេល១៦ថ្ងៃនៃយុទ្ធនាការចាក់វ៉ាក់សាំងកូវីដ១៩ ស៊ីណូវ៉ាក់ ក្រុមគ្រូពេទ្យ បានចាក់ជូនមន្ត្រីរាជការនិងក្រុមអាទិភាពនៅទូទាំងប្រទេសបានជាង៥៦ម៉ឺននាក់៕