COVID-19
ជាតិ
២៩១នាក់ទៀតមានវិជ្ជមានកូវីដ-១៩នៅកម្ពុជា ហើយអ្នកស្លាប់ឡើងដល់៣៩នាក់
× មនុស្សចំនួន២៩១នាក់ទៀតមានវិជ្ជមានកូវីដ-១៩ នៅកម្ពុជា និងសះស្បើយ២៣នាក់។ នេះបើតាមរបាយការណ៍របស់ក្រសួងសុខាភិបាលនាថ្ងៃសៅរ៍ ទី១៧ ខែមេសា។ អ្នកស្លាប់មាន១នាក់ទៀត ដែលធ្វើឲ្យចំនួនសរុបឡើងដល់៣៩នាក់។
ក្នុងចំណោមករណីថ្មីទាំង២៩១ មាន ១ករណីនាំចូល ដោយអ្នកជំងឺជាស្ត្រីបារាំងអាយុ២៤ឆ្នាំ ដែលធ្វើដំណើរមកពីស្វីស ឆ្លងកាត់សិង្ហបុរី និងមកដល់កម្ពុជានៅថ្ងៃទី៣ ខែមេសា។ លទ្ធផលសំណាកលើកទី២ ឃើញវិជ្ជមានកូវីដ-១៩ ហើយត្រូវបានដាក់ឲ្យសម្រាកព្យាបាលនៅមជ្ឈមណ្ឌលជាតិកំចាត់ជំងឺរបេង និងហង់សិន។
២៩០ករណីទៀតសុទ្ធតែពាក់ព័ន្ធសហគមន៍២០កុម្ភៈ។ ២២៨ករណីនៅភ្នំពេញ មានជនជាតិខ្មែរ២២៥នាក់ ចិន២នាក់ និងវៀតណាម១នាក់ ដោយក្រសួងមិនទាន់បានផ្តល់ព័ត៌មានលំអិតទាក់ទងនឹងកន្លែងសម្រាកព្យាបាលរបស់ពួកគាត់នៅឡើយ។
១៤ករណីនៅខេត្តកណ្តាល សុទ្ធតែជាជនជាតិខ្មែរ ដោយស្ត្រី៤នាក់ និងបុរស៩នាក់ សម្រាកព្យាបាលនៅមន្ទីរពេទ្យបង្អែកជ័យជំនះ និងស្ត្រី១នាក់ទៀតសម្រាកនៅមណ្ឌលព្យាបាលស្រុកកោះធំ។
២៦នាក់នៅខេត្តព្រះសីហនុ មានអ្នកជំងឺ១នាក់ទៀតមរណភាព កាលពីថ្ងៃទី១៦ ខែមេសា រីឯ២៥នាក់ទៀត សម្រាកព្យាបាលនៅមន្ទីរពេទ្យបង្អែកខេត្តព្រះសីហនុ។
១២ករណីនៅតាកែវ សុទ្ធតែជាជនជាតិខ្មែរ មានស្ត្រី១០នាក់ និងបុរស២នាក់ ដែលត្រូវដាក់ឲ្យសម្រាកព្យាបាលនៅមន្ទីរពេទ្យខេត្ត។
ក្រៅពីនេះ ព្រៃវែងមាន២ករណីនៅស្រុកស្វាយអន្ទរ និងស្រុកព្រះស្តេច រីឯស្វាយរៀងមាន៨ករណី ដោយ៦នាក់ព្យាបាលនៅក្រុងបាវិត ១នាក់នៅពេទ្យសាមគ្គីរំដួល និង១នាក់នៅពេទ្យស្វាយជ្រុំ។
ករណីសះស្បើយមាន២៣នាក់ ដោយ៤នាក់នៅពោធិ៍សាត់ ៦នាក់នៅព្រះសីហនុ និង១៣នាក់នៅភ្នំពេញ។
គិតមកដល់ពេលនេះ កម្ពុជាមានករណីសរុបចំនួន៥៧៧១ ដោយ៥២២៨ពាក់ព័ន្ធសហគមន៍២០កុម្ភៈ។ អ្នកសះស្បើយសរុបមាន២៤១៦នាក់ និង៣៩នាក់បានទទួលមរណភាព៕
© រក្សាសិទ្ធិដោយ thmeythmey.com