ប្រធានសមាគមសហគ្រិនវ័យក្មេងកម្ពុជា សាខាខេត្តសៀមរាប លោក ថោង ប៊ុនថារី លើកឡើងថា ស្ថានភាពសេដ្ឋកិច្ចក្នុងខេត្តសៀមរាបនៅពេលនេះ គឺដុនដាបខ្លាំងដែលមិនធ្លាប់មានពីមុនមក។ យ៉ាងណា លោកថារី ពន្យល់ថា មុនផ្ទុះកូវីដ ស្ថានភាពភ្ញៀវទេសចរក្នុងខេត្តសៀមរាបបានធ្លាក់ចុះប្រមាណជិត២ឆ្នាំ បូករួមការអភិវឌ្ឍផ្លូវក្នុងក្រុងក៏ធ្វើឲ្យអាជីវកម្មមួយចំនួនធំ មានការប្រឈមខ្លាំងផងដែរ។

 

ក្នុងកាលៈទេសៈនេះ ដើម្បីឲ្យអាជីវកម្មមួយនៅអាចបន្តឈរជើងទៅមុខបាន លោក ថោង ប៊ុនថារី ប្រាប់ពីដំណោះស្រាយចំនួន៤ ដែលគួរគិតមុនគេ។ ទី១ ត្រូវគិតពីខ្លួនឯង ធ្វើយ៉ាងណាមានភាពរឹងមាំ នឹងនរ កុំបាក់ទឹកចិត្ត ទី២ ការជំរុញលើកទឹកចិត្តពីគ្រួសារ និងឲ្យពួកគាត់យល់ពីស្ថានការដែលកំពុងជួបប្រទះ ទី៣ សហគ្រិនទាំងអស់ត្រូវមើលឲ្យឃើញពីបញ្ហា និងការលំបាករបស់ខ្លួន និងត្រូវរៀបចំការសន្សំសំចៃនានាលើការចំណាយក្នុងស្ថាប័ន។ លោក ប៊ុនថារី ណែនាំឲ្យសហគ្រិនទាំងអស់ គួរគិតពីការបង្វែរអាជីវកម្មទៅបណ្ដាស្រុកជុំវិញ ព្រោះថា អាជីវកម្មខ្លះមិនអាចដំណើរក្នុងក្រុងដូចពីមុន តែតាមបណ្ដាស្រុកជុំវិញនៅអាចធ្វើបាន ឬក៏អាចពង្រីកទៅបណ្ដាខេត្តមួយចំនួនផងដែរ ដែលមិនសូវប៉ះពាល់ខ្លាំងក្នុងវិបត្តិកូវីដនេះ។ 

 

បន្ថែមពីនេះ ប្រធានសមាគមសហគ្រិនវ័យក្មេងកម្ពុជា ខេត្តសៀមរាបក៏ណែនាំឲ្យម្ចាស់អាជីវកម្មទាំងអស់ ត្រូវត្រៀមខ្លួនដូចជាពង្រឹងស្ថាប័នអាជីវកម្មខ្លួនឡើងវិញ ដោយមិនត្រូវបោះបង់អាជីព ឬចំណេះជំនាញខ្លួនដែលខំកសាង១០ទៅ២០ឆ្នាំចោល រួចទៅបង្កើតអ្វីដែលថ្មីនោះទេ ព្រោះវាអាចមានហានិភ័យខ្ពស់សម្រាប់សហគ្រិនទាំងនោះ៕