ដោយ៖ ស៊ុល រ៉វី

អាជ្ញាធរខេត្តកណ្តាល បានយកទីតាំងកីឡដ្ឋានក្រុងតាខ្មៅ ធ្វើជាផ្សារលក់ដូរ បន្លែ ត្រី សាច់ និងគ្រឿងឧបភោគ បរិភោគផ្សេងៗបណ្តោះអាសន្ន សម្រាប់ពលរដ្ឋរស់នៅក្នុងក្រុងតាខ្មៅ អំឡុងពេលបិទខ្ទប់ក្រុង។ ផ្សារបណ្តោះអាសន្ននេះ ត្រូវបានអាជ្ញាធររៀបចំឡើង បន្ទាប់ពីផ្សារតាខ្មៅចាស់ និងផ្សារតាខ្មៅថ្មី ត្រូវបានបិទរយៈពេល១៤ថ្ងៃ ដោយសារភាពចង្អៀតណែន ដែលជាហានិភ័យនៃការឆ្លងរាលដាលនៃជំងឺកូវីដ-១៩។

 

ផ្សារបណ្តោះអាសន្ននេះ ត្រូវបានអាជ្ញាធររៀបចំឡើង ដោយរក្សាគម្លាតពីគ្នា យ៉ាងហោច ១ម៉ែត្រកន្លះ  ហើយអាជីវករដែលមកលក់នៅទីនេះទាំងអស់ នេះ មិនត្រូវបានគិតថ្លៃកជួល ឬភាស៊ីទេ។ នេះបើតាមការអះអាងរបស់អភិបាលខេត្តកណ្តាល។

ក្រៅពីរៀបចំឱ្យអាជីវករលក់ដូរហើយនោះ លោក គង់ សោភ័ណ្ឌ ដែលបានចុះត្រួតពិនិត្យមើលការលក់ដូររបស់អាជីវករនៅផ្សារនេះ កាលពីរសៀលថ្ងៃទី ១៧ មេសានោះ បានអំពាវនាវ ឱ្យអាជីវករ អនុវត្តឲ្យបានម៉ឺងម៉ាត់ តាមវិធានអនាម័យ និងគោរពវិធានការ ៣កុំ ៣ការពារ។ មិនតែប៉ុណ្ណោះ លោក គង់ សោភ័ណ្ឌ ក៏ទទូចឱ្យឱ្យអាជីវករ កុំឆ្លៀតឱកាសលក់ដំឡើងថ្លៃទំនិញផងដែរ។

សូមជម្រាបថា វិធានការបិទខ្ទប់ (Lockdown) រាជធានីភ្នំពេញ និងក្រុងតាខ្មៅ ខេត្តកណ្ដាល ចាប់ពីថ្ងៃទី១៥ ដល់ថ្ងៃទី២៨ ខែមេសា ដែលបង្កើនលក្ខខណ្ឌដ៏តឹងរ៉ឹងបន្ថែមទៀត ទាក់ទងនឹងបែបបទធ្វើដំណើរ៕